Ads by Google Ads by Google

FA’AAOGA FANA MEATA'ALO E FA’AFEFE AI LE FA’ATAU'OLOA

Ua manino i fa'amaumauga a le Fa'amasinoga Maualuga, o le fana lea na fa'aaoga e le ali'i o Asotasi Maiava e fa'afefe ai le fa'atau'oloa o se fale'oloa i Ottoville i le tausaga na te'a nei, ina ua latou osofaia ma ni ali'i laiti se to’alua e 14 tausaga le matutua o le isi ae 17 le tasi, o se fana meata'alo.

O lea fana o lo o i ai nei i le potu e teu ai mea molimau a le malo, i le Ofisa o Leoleo i Fagatogo ma le fa'amoemoe, afai ae mae'a le lauina o le fa'asalaga a le ali'i o Maiava i le aso Faraile o le vaiaso nei, ona faia loa lea o se poloa'iga a le Fa'amasinoga e fa'atamaia ai lea fana.

O se ali'i leoleo mai le Ofisa 'autu i Fagatogo na alu atu ma se atigi pusa i le fa'amasinoga i le aso ananafi, e momoli aloa'ia atu le fana lea i luma o ali'i fa'amasino, ina ia mafai ai ona silasila le fa'amasino i le aupega sa fa'aaogaina e le ali'i ua ta’usalaina nei i le moliaga o le taupulepule lea e fa'atino le solitulafono o le faomea, e pei ona tali ioe ai i lalo o se maliliega sa ia sainia ma le malo, lea fo'i na talia e le fa'amasinoga,.

I fa'amaumauga a le fa'amasinoga o lo o ta'ua ai e fa'apea, e lata loa ina tapuni le fale'oloa na a'afia i le po o le aso 22 Setema 2011, ae ulufale loa Maiava, 20 tausaga le matua ma ali'i talavou e to'alua i totonu o le fale'oloa, e kava o latou tino i 'ofu mafanafana atoa ai ma pulou e ufi atoa ai o latou foliga.

Na ona ulufale lava o le 'au ula ia i totonu o le fale'oloa, fa'asiilima loa e Maiava le fa'atau'oloa ma fai i ai e aumai uma tupe o lo o i totonu o le masini tupe, ma e lei fa'atali le fa'atau'oloa i se isi lava sekone, ae sa ia usita'i i le fa'atonuga e ala i lona tu'uina atu o tupe i le 'au faomea.

E 'ese mai ai i le tupe sa fa'apea fo'i ona fao fa'amalosi e le 'au faomea pepa sikaleti ma pepa fai telefoni.

Na ona te’a 'ese atu lava o le 'au gaoi a'apa atu loa ma le fa'atau'oloa i lana telefoni ma vili ai loa leoleo, ae o le taimi lava fo'i lea sa ia toe va'ai ai loa i le masini pu’eata o le fale'oloa, lea sa maua uma ai lava gaoioiga sa faia e le 'au faomea, ma o le ata lea sa mafai ona pu’eina i totonu o le fale'oloa, na o ma leoleo ma fa'aali solo i aiga tua'oi pe fa'amata e leai se isi o i latou e ono mafai ona fa'ailoaina mai foliga mo’i o le 'au faomea.

E lei atoa se lua itula talu ona sa'ili e leoleo le 'au ula ia ae maua loa ma auina atu loa i le Ofisa mo su'esu'ega, mulimuli ane ai tutula'i i luma o le fa'amasinoga ona o tu'uaiga fa'asaga ia te i latou.

O ali'i talavou e to'alua o lo o i ai pea le la mata'upu i luma o le fa'amasinoga fa'aitumalo, sei vagana ai Maiava lea ua i luma o le fa'amasinoga lana mata'upu, ma ua fa'amoemoe o le aso Faraile o le vaiaso fou lea o le a lau ai lona fa'asalaga.

E le o mafai ona tatalaina i tua Maiava mai le to'ese i Tafuna, ina ua le mafai e lona aiga ona totogi le $100,000 lea sa fa'atulaga e le fa'amasinoga e totogi ona  fa'atoa mafai lea ona tatala o ia i tua mai le to'ese.

Ua silia laitiiti lava ma le 4 masina talu ona loka Maiava i le falepuipui i Tafuna.

Ina ua talia e le fa'amasinoga le tali ioe a Maiava i le moliaga o le taupulepule lea e fa'atino le solitulafono o le faomea, na talosaga  ai loa le malo ina ia solofua isi moliaga e lua sa o latou tu'ua'ia ai o ia, o le faomea i le tulaga muamua, ma le moliaga mama o le fa'aaoga fa'asolitulafono o se fana.

O le moliaga lea ua tali ioe ai Maiava, e mafai ona fa'asala ai o ia i le to'ese mo le umi e le itiiti ifo i le 5 tausaga, e le sili atu fo'i ma le 15 tausaga le matua.