Fa’aaoga e se ali’i se agaese e fa’ao’o ai manu’a i lona tama

O le ali’i talavou lea o lo o tu’uaia i lona faaaoga o se agaese e fa’ao’olima ai i lona tama i le Aso Sa na te’a nei, o lo o taofia pea i le toese i Tafuna ma le faamoemoe o le taeao nei e tatau ona faila ai moliaga faasaga ia te ia.

 

Ina ua mae’a le fa’alavelave na auina atu ai loa le tama i le potu tipitipi a le falema’i o le LBJ mo togafitiga, ma le faamoemoe afai e mae’a ona togafiti ona manu’a, ona taofia ai pea lea o ia i le potu tipitipi ona o le tulaga matuia o manu’a na aafia ai o ia.

 

O ananafi na tula’i ai le ali’i o lo o tu’uaia i lenei mataupu i luma o le faamasinoga faaitumalo, peitai na faailoa e le itu a le malo i le faamasinoga, o lo o galulue pea leoleo i le tau faamae’aina o le latou ripoti, ma e tatau ona oo atu i le taeao nei ua maea ona faila moliaga faasaga i lenei mataupu.

 

Na talia e le ali’i faamasino ia John L. Ward II le talosaga a le malo ma poloaina ai loa le ua molia ina ia taofia pea i le toese mo le 48 itula.

 

I faamaumauga a le faamasinoga o lo o taua ai e faapea, pe tusa o le itula e 3:53 i le afiafi o le aso Sa na te’a nei, Iuni 23, 2013 na logoina ai e se molimau mai Malaeimi le Ofisa o Leoleo i Tafuna, ona o se tagata ua manu’a na faaoolima i ai le isi ali’i i se agaese, ma o lo o fealualua’i solo lea ali’i ma se agaese i tua o le latou fale.

 

E le’i umi se taimi ae taunuu leoleo i le nofoaga na tulai mai ai le faalavelave, ma vaaia ai e leoleo le ua molia o lo o fealua’i solo ma se agaese i lona lima i tua o le latou fale.

 

Na taumafai leoleo e faatoa filemu le mafaufau o le ali’i ua molia ma mafai ai loa ona avese mai le agaese sa uu i lona lima, ae auina atu loa o ia i le Ofisa mo suesuega, mulimuli ane faatoa iloa le igoa o le ali’i ua molia, o ia o Mark Mulipola.

 

Na taua e le tina o le ali’i ua molia i leoleo e faapea, o le faalavelave na tula’i mai ina ua faatonu e le tamå ua manu’a lona atali’i (le ua molia) e alu e ao mai ni laau laau e fai ai le vai mo ana fofo Samoa o lo o fai, ae musu le ua molia.

 

Ina ua musu le ua molia e usita’i i le faatonuga a lona tama, na faatonu ai loa e le tama lana fanau laiti e to’alua e o e ao mai lau laau e vai ai le vai mo ana fofo.

 

Ina ua uma ona fofo le ma’i a le tama, na toe fo’i ai loa le ma’i ae tu le tama i luga ma savali aga’i atu i le isi a latou fale o lo o i le pito i luma, a’o savali atu o ia aga’i i le latou fale i luma, na faafuase’i ona osofa’i e lona atalii o ia i le agaese, e ala i le taina lea e le ua molia lona ulu i le agaese.

 

Na taua e le tina i leoleo e faapea, o le ta muamua na lavea ai le ulu o lona toalua, ae o le ta lona lua na lavea ai lona lima ina ua taumafai e faaaoga lona lima agavale e tali ai le alu atu a le agaese.

 

Pe tusa o le itula e 5:00 i le afiafi lava lea na toe asia ai e leoleo le falema’i, ma iloa ai o lo o i ai pea le tama i le potu tipitipi mo ona togafitiga.

 

Na faailoa e se tama’ita’i foma’i i leoleo e faapea, talu ai o le tulaga tuga i manu’a o le tama, e ono taofia ai pea o ia i le potu tipitipi sei mautinoa e le foma’i ua tulaga manuia lona manu’a, ona faatoa toe faia lea i ai o se isi faaiuga.

 

O le ali’i foma’i ia Dr. Kumar na faia togafitiga mo le na manu’a i lenei mataupu.

 

Comment Here