Ads by Google Ads by Google

Fa’aaliga galuega Saeanisi fanau a’oga K-8

A’o le’i mae’a ona fa’amasinoina galuega fa’atino fa’asaeanisi a le fanau a’oga mai aoga tulaga muamua - Elementary - i le teritori, sa matua iloga ona fa’afiafiaina mafaufau o i latou o lo’o fa’amasino, faia’oga ma pulea’oga ae maise lava matua, i le sogasoga ma le lautele o le atamai ua mafai ona fa’atino e fanau latou poloketi fa’asaeanisi.

 

“O le tausaga lenei, e faigata le togiga o nei galuega, o le to’atele o le fanau e laiti mai vasega amata, ae ua matua teumau i o latou loto a latou galuega fa’atino, ma tali i fesili, Fa’afetai i le fanau i le taumafai,” o se fa’amatalaga lea a Samuel Meleisea mai le National Park, sa avea ma fa’amasino.

 

Ua iloga le matagofie, aua o lo’o ua auai uma mai sui mai le Manu’atele, e pei o Falesao Elementary lea sa tula’i mai ai Deangelo Si’imalevai ma lana poloketi fa’asaeanisi - “Pe Fa’apefea ona fa’atumau le felesi o au fugala’au i sau Teu Matagofie?” O tali ua tu’uina mai - ia tipi au fugala’au fa’asipa aua le fa’agatasia, a mae’a o le ipu vai atoa, e ao ina tu’uina i ai le 3 sipuni ti o le suka, tolu fo’i sipuni ti o le clorox. Ia matua liu suavaia fa’atasi uma nei mea, ona tu’uina loa lea i ai o au fugala’au ma laula’au ua e filifili e fa’atulaga ai lau teu matagofie.

 

E tolu aso atoatoa e ola ai lau teu lea, ae ua e va’aia fo’i, ua matala mai isi fuga o i ai fa’atasi i lau fugala’au, pe afai o se fugala’au e matala fa’asolosolo ona fua.

 

O Jacob Muese mai Manulele Tausala Level K5 sa ia fa’atinoa le su’esu’ega, “O a mea e ola, ae o a mea e pe?” Ua tele mea sa fa’avasega e ia, ae o le la’au, o le loi ma le limu, sa ola, ae o le sioka, penitala ma le vase e pe ia mea.

 

O le ali’i o Romeo Vasega Falani mai Faleasao Elementary Manu’a, sa ia sau ma lana poloketi: “O le a le vai suavaia e mafaia ona ave’esea le lanu o le lauti Samoa?” Na ia fa’aaogaina vaila’au e tolu, o le Suavai Manino, o le Vineka ma le Alcohol po’o le pia. Na maua ane o le tama o le Pia po’o le alcohol lea e na te mafaia le mea lea, ma ua fa’ailoa mai ai, e faia fo’i lea tulaga e le Pia i lou puta pe a inu pia so’o.

 

O Tafaifa Lokeni mai Kokoland ae Level 1 sa ia taumafai e fa’ailoa mai le gaosiga o le aisikulimi, ma sa ia fa’aaogaina le Cool Whip, susu, salt, vanila ma taga pepa ziplock laititi e tasi ma le ziplock lapo’a e tasi, ma le taga aisa. E tu’ufa’atasia uma isi mea i le taga pepa la’ititi ae o le masima ma le aisa e tu’u i le tagapepa lapo’a, lafo i ai ma le taga pepa la’ititi ua mae’a seu fa’atasia ai isi mea uma, ona to’aga lea e lulu ma maua ai le aisikulimi vanila matagofie.

 

O Pesaleli Filimino Level 8 mai Faleasao Elementary sa ia faia le galuega fa’atino: “Pe aoga le Asprin e ola ai La’au?” I lana su’esu’ega mae’ae’a, ua iloa ai, “E leai na’o tagata e ola lelei i le Asprin ae o la’au e mamate ai!”

 

O le fa’afeusua’iga o la’au tamato ma isalaelu, sa fa’atino lea e Isaia Gurr o Tafeta, e aoga i le Manumalo Baptist. Ua iloga i lana galuega fa’atino, e matua ola lelei lava tamato mai le pogati ua mae’a soso’o i ai o le Isalaelu. I le taimi e fua ai, e maua au tamato toe maua fo’i au isalaelu mai le la’au lava e tasi. E afua lea tulaga, ona e aiga lelei nei la’au.

 

O le tama’ita’i o Reneueta Mayer Level 7 o Alofau Elementary sa ia fa’atinoa le galuega: “O a vai inu e tele ai le acid?” I mea sa ia fa’ailo ua iloa ane ai, o le apainu o le Sprite e tele i le acid ma le Vinegar suavaia.

 

O Alijah Baqui mai Peteli Academy, Level 8, ua ia fa’aalia lana poloketi: “Fa’aaoga Polokaka, Lever, ma isi mea faigaluega laiti e fa’atino ai galuega e si’i i luga!” O ia lenei o lo’o tausaili, pe mata e toe manumalo lana galuega fa’atino i lenei tausaga, aua e fa’alua ona ia maua le tulaga muamua i ana poloketi o le tausaga o vasega 6 - Malosi’aga mai le “Geothermal,” sa ia fa’aalia ai le aoga ma tulaga e le aoga ai. O lana poloketi o le Water Rocket i lana vasega fitu na toe manumalo fo’i i lana gategory. Lea ua se’e mai i le vaega o Masini, pe mata e a mai lana taumafaiga.

 

O lo’o matua tele le sosia o lenei galuega fa’atino a le fanau, ma e silia ma le 100 poloketi sa maimoaina i totonu o le maota i lea taeao.