Ads by Google Ads by Google

Fa’aalia le to’atama’i a Togiola i le aufaigaluega a le LBJ

TOGIOLA:  E alu a le nusipepa e su’e mea leaga

I lana polokalama i le Aso To’ona’i na te’a nei, na le gata ina fa’aalia le to’atama’i o le alii kovana i foma’i, tausi ma’i ma tagata faigaluega o le falema’i lea na fuafua le latou solo tete’e i le Aso Tofi o le vaiaso ua mavae, ae fa’apea fo’i le nusipepa na fa’asalalauina tala o lea fa’alavelave.

Na ta’ua e le afioga Togiola Tulafono, o i latou ia na fuafua e fai le latou solo tete’e, e na’o le pau lava le mea na manana’o i ai o le tau fa’aleaga o le malo.  Sa ia fa’aalia lona le fiafia ia i latou sa i le paka i Utulei, ae le gata i lea, sa ia ta’ua le fa’amaumau taimi o a latou gaioiga.

Na ia ta’ua fo’i e fa’apea, afai na maliu se tasi i lea aso na fuafua ai lenei solo tete’e, e le ua mafua ona o ia, ae ona ua le galulue le aufaigaluega a le LBJ i le tautuaina o le lautele.

Na liliu Togiola i le nusipepa ma ia fa’apea, o le galuega a le nusipepa o lo o faia, o le sailiili i mea e fa’aleaga ai o ia ma le malo, ma o se faataitaiga sili o ia faiga tau faaleaga e pei ona saunoa Togiola, o le tusia lea e le nusipepa na o tala e faaleaga ai le kovana i le leai o se taimi e feiloai ai ma sui o fomai na fuafua le latou solo tete’e, ae ua le faasalalauina le tele o isi galuega lelei ma fetufaaiga sa faia e le kovana ma le pulega a le falemai.

“E alu a le nusipepa e su’e mea leaga e aumai ma faailoa mai i luma, ua tau fo’i ma le silasila a le atunu’u nei mea, ua tiga mata,” o le isi lea saunoaga a le alii kovana.

Saunoa Togiola, o le taimi lea ao faatalitali sui o fomai sa fuafua le latou solo tetee mo se avanoa latou te fono ai, ae o le taimi lea o loo latou fono ai ma le pulega a le falemai, i ni auala e foia ai faafitauli o loo tulai mai i le falemai.

“Ou te le iloa poo le a le mea lea na tau o mai le vaega lea e ta’u mai ia te a’u, ai na o mai e tau aumai le latou tau faaleaga i le malo, ae ua le o e fai galuega na  tofia i ai i latou, aua pau mea ia ua ma’imau ai, e le gata ua ma’imau ai itula tai 8 e galulue ai, maimau ai le latou tau tua sa tatau ona ofoina atu mo le atunuu, ma’imau atu ai ma nofoa sa nonofo ai, ae o mai nofonofo mai i lo’u ofisa, ma le manatu ia tupu mai ai se mea e faavae ai se tau faaleaga faasaga i le malo,” o le saunoaga lea a le alii kovana.

Na taua foi e Togiola lona le fiafia i saini ia na faalauiloa e le nusipepa mai i le au tete’e, e faatatau i le kovana ma le fautuaga, e aua le taaalo polokiki i ola o tagata.

Saunoa Togiola, afai sa i ai ni soifua na maimau i le aso lea, e mafua mai ona o le le o o leau tete’e ia na tau o atu i lona ofisa e fai galuega sa tofia i ai i latou e le falemai.

O le fonotaga a le alii kovana ma le pulega a le LBJ i le aso lea, sa fetufaai ai i auala e mafai ai ona foia faafitauli e pei ona tulai mai i le faatautaiga o galuega a le falemai.

Saunoa Togiola, o le latou fonotaga lea sa ia faailoa atu ai loa i le pulega a le falemai lana faaiuga ua i ai, pe afai e tumau pea la latou fuafuaga i le faamalolo lea o tagata faigaluega.

Na faamanino e Togiola e faapea, e le faapea na mafua ona le alu ane e feiloai ma sui o le vaega tetee ona o lona musu, peitai sa matua leai lava sona avanoa i lea aso, ona sa tumu lana kalena i ana fonotaga.

Fai mai Togiola, o se taimi o i luma o le a ia tuuina mai ai le kopi o lana kalena i le aso lea ina ia manino ai le atunuu i le mataupu na tulai mai, ae i ai lona talitonuga, e le mafai foi ona soona alu atu se tagata ma’i mana’o e vaai le fomai, sei vaaga ua faatulaga na “appointment”, ona faatoa maua lea o le avanoa e vaai ai i le foma’i.

Na faaiu le saunoaga a le alii kovana i lona faapea atu i le atunuu, afai e i ai nisi e fia faaalia ni a latou faasea i lenei mataupu, ia sauni mai i le vaiaso nei o le a maua ai foi le isi avanoa latou te fetufaai ai.