Ads by Google Ads by Google

Fa’a 5 ona tatu’i foliga o se ali’i ma maliu ai

Na taua e le alii o Migo Misa i luma o le Faamasinoga Maualuga i le aso ananafi, e faa 5 ona ia tatu’iina foliga o le alii o Sio ‘Chico’ Faumui i le po o le aso 4 o Iuni 2011 i Malaeimi, ma o tu’i ia ma manu’a tigaina ai lea alii ma i’u ina maliu ai o ia.

O le molimau fo’i lea a Sefo Siaulaiga ma Nemaia Poamo ina ua tali ioe uma nei alii i le solitulafono o le faatamala faaletulafono, ua mafua ai ona oo le maliu i se isi tagata, e pei ona fofogaina i luma o le faamasinoga maualuga i le aso ananafi, e ui e le’i fesiligia e le faamasinoga pe faafia ona la tatu’iina foliga o Faumui.

O Misa, Siaulaiga ma Poamo, na uluai tuuaia i latou e le malo i le moliaga o le fasioti tagata i le tulaga lua, ona o le faalavelave lea na maua ai le tino maliu o le alii o Faumui o taatia i se auala alo i le nuu o Malaeimi i le tausaga na te’a nei.

Ao faagasolo ai taualumaga o faamasinoga a alii nei e toatolu, na faaiuina i le aso ananafi ina ua talia e le faamasinoga la latou maliliega na saini ma le malo, ina ua talosaga le malo e talia suiga ua latou faia i uluai moliaga sa tuuaia ai alii nei e toatolu.

I le tali ioe ai la o Misa i le moliaga e pei ona toe teuteuina e le malo, na ia tautino ai i luma o le faamasinoga e faapea, i se taimi o le aso 4 Iuni 2011 i Malaeimi Amerika Samoa, sa ia faatinoina ai ma le faatamala faaletulafono se gaioiga na mafua ai ona oo le maliu ia Faumui.

O le mea sa tupu e pei ona ioeina e Misa, sa ia taua ai lona tatu’iina faatele lea o foliga o Faumui i ona lima ma manu’a ai o ia, ma o ia manu’a na mafua ai ona oo le oti ia te ia.

E faapena foi le faamatalaga a le alii o Poamo e pei ona taua i taualumaga o lana maliliega sa saini ma le malo, lea o lo o taua ai lona faatinoina o ni gaioiga i se auala faatamala i lalo o le tulafono, e ala i lona tatuiina lea o foliga o Faumui ma manu’a tigaina ai o ia, ma o ia manu’a na mafua ai ona oo le maliu ia te ia.

Sa faapea foi le tali a le alii o Siaulaiga ina ua fesiligia o ia e le faamasinoga e tusa ai o lona aafiaga i le faalavelave na mafua ai ona oo le maliu ia Faumui. Na taua e Siaulaiga e faapea, o ia le isi tagata na aafia i le misa lea na tulai mai i Malaeimi i le tausaga na te’a nei, ma mafua ai loa ona oso atu ma tatu’i foliga o le alii na manu’a, ma o ia manu’a na mafua ai ona oo le oti ia te ia.

Ua malie le loia a le malo o Mitzie Jessop Folau e taofiofi le vave  tuuina atu o sana faafinauga i le faamasinoga mo se faasalaga mo i latou nei e toatolu, sei maea ona faitau muamua i le ripoti a le Ofisa Faanofovaavaaia, ona faatoa tuuina atu lea o sana faafinauga i le faamasinoga, peitai ua malamalama i latou nei e toatolu, tusa lava pe finau atu loia i le faamasinoga mo se faasalaga mama mo i latou, e pule le faamasinoga pe talia pe teena ia faafinauga.

Ua latou malamalama foi ma iloa, afai e tuuina mai se faasalaga a le faamasinoga ae le tusa ai ma o latou loto, e le mafai ona toe suia a latou tali ioe ua maea ona tuuina atu i le faamasinoga.

Na faila muamua e le malo sa latou maliliega sa sainia ma i latou nei e toatolu ae na teena e le faamasinoga.

O se tasi o tulaga mataina na alia’e mai i le mataupu lenei, o le fesiligia lea e le faamasinoga o le itu a le malo, pe na faapefea ona toe ulufale mai i le atunuu le isi alii e toatolu ai i latou o lo o tuuaia, o ia lea o Sefo Siaulaiga, poo Raponi Siaulaiga.

O Siaulaiga na faasa e le faamasinoga ona toe ulufale mai i le teritori mo le 10 tausaga, ina ua faamaonia sana solitulafono sa faia i le 2007, lea na faafalepuipui ai o ia i le toese i Tafuna ma tipoti ai loa i Samoa i le 2009.

Ae ina ua tulai mai le mataupu e pei ona maliu ai Faumui lea foi na aafia ai ma le igoa o Siaulaiga, sa fesiligia ai loa e le faamasinoga le malo pe na faapefea ona toe  oo mai lenei alii i le atunuu. I faamaumauga na mafai ona maua e le faamasinoga, sa taua ai le lelei pea lea o pepa nofomau a Siaulaiga i le taimi na loka ai o ia i le masina o Iuni 2011.

O lo o taofia pea i latou nei i le toese i Tafuna e faatali ai le aso 12 Tesema lea ua faamoemoe e lau ai a latou faasalaga.

O le solitulafono o le faatamala faaletulafono ua mafua ai ona oo le maliu i se tagata, o se solitulafono o le vaega D o solitulafono mamafa, lea e mafai ona faasala ai se tasi i le toesemo le umi e le silia i le 5 tausaga, pe faasala foi i le salatupe e le sili atu i le $5,000 poo le faasala foi i faasalaga uma ia e lua.

I faamaumauga a le faamasinoga o lo o taua ai e faapea, o le mataupu lenei na afua mai i se misa na tulai mai i le va o alii ua molia ma le alii ua maliu, ma faaoolima ai loa i latou nei e toatolua ia Faumui, ma taatia ai lona tino pe tusa ma le 15 futu le mamao ese mai i le aualatele a le malo.

Fai mai faamaumauga a le faamasinoga, na toe foi Poamo ma Siaulaiga i le vaega o lo o taatia ai le tino o Faumui, ma la faaaoga ni ma’a e tatu’i ai lona tino, mulimuli ane alu atu loa ma Misa ma se fagupia ma ta ai loa foliga o Faumui. Ina ua fesiligia e leoleo i latou nei e toatolu, sa latou ioeina ai lo latou faaoolima ia Faumui.