O LE PUSI UA PE

E ta ane loa le 12 i le leva o le po ae faatoa manatua e Sione lana maile fagafao o lo o i fafo, e pei lava o le tausiga o se tamaititi, e alofa ma faapelepele lava i ai, ae fetaui lava le tatala atu e Sione o le faitotoa ae ona vaaia lana ta’ifau o lo o ta’aalo mai ma le tama’i pusi a le toeaina o Ufi, ma le vaai atu, ua pe si pusi i faiga a lana maile.

Tamoe atu Sione ua aumai i totonu o lana maile toe sii mai ma le pusi lea ua pe, ma le vaai atu, ua palapala uma le tino o si pusi, ona faasaga atu loa lea o le tama ma ote i lana tama’i maile, “Sole Whiskey, makua’i e leaga kele sole, vaai la i ai o lea ua pe le pusi ia ke oe ...” E lei toe faatali le alii ae ua laa atu loa i tua o le sink ma faataele lelei ai le tino o le pusi, ua fufulu ese uma palapala ma le toto sa pisia ai lona tino, ona faamago lea o le tino i le dryer mo le umi toeititi oo i le 3 itula, ona toe tolotolo lea o le alii ma toe faataatia le pusi i luma o le fale o si toeaina o Ufi.

E usu atu Sione i le taeao ae tei i le tala ata ane i ai o Ufi, “sole, faakoa ou vaai lea i se pusi alii ga kagu aku fo’i agagafi iga ua pe ae malama age gei le kaeao ua koe kaokooko  mai foi i luma o le fale ua koe ola mai foe, e sa’o lava la e 9 ola o le pusi alii”.

Ua na o le u o nifo  Sione ma valaau ane ia Ufi, “e sao lava la le kala sa ou faalogo muamua ai, fai mai e pule lava le pusi i le aofai o ola e fia ola ai, e ke kau kigaiga fua e kau maikau ola o le pusi, e pule lava le pusi i le aofa’i o oga ola ...”

FAAETEETE I LE MAILE FEAI

I se tasi o faleoloa e pipii ai le faasalalauga faapea, “Faaeteete i le maile feai”. O tagata uma la e aga’i atu i le faleoloa lenei, e muamua lava tilotilo solo ao lei ulufale i totonu o le faleoloa ina ua tau atu i le faasalalauga lea, ina nei osofai e le maile se isi.

Oo i le isi aso faasasao atu lava le tamaloa o Lua, tilotilo atu o le matua tele lava o le maile lea e i luma o le counter o le faleoloa, fesili loa i le faatauoloa, “sole, o le a se vavega sa fai ua mafua ai ona feai lau maile alii”, tali le faatauoloa, “E leai, e le feai le maile, o le soli soo se tagata pe a o mai i totonu o le faleoloa”.