E eseese molimau ia ua taulimaina nei e le Komiti Suesue a le Senate (SIC) e faatatau i le faaaogaina o tupe sa faafoe ai le taligamalo a Amerika Samoa, mo le Faaaliga lona 10 o Tu ma Aganuu a le Pasefika (11th Pacific of Arts Festival) i le 2008, mai sui o le komiti o le Festival ma sui o le malo sa fesiligia i lenei mataupu.

O faamatalaga a sui e toatolu o le Komiti Faafoe o le Arts Festival ina ua fesiligia e le SIC i le masina na te’a nei e uiga i mea sa faaaoga i ai le tupe, sa latou taua ai e faapea, o latou e le’i maua ni o latou totogi, ae sa ofo fua atu o latou taimi faatasi ai fo’i ma isi tagata faigaluega a le malo, e fesoasoani ai i le faamoemoe o le atunuu, peitai ina ua fesiligia e le SIC le teutupe a le malo ma nisi o molimau i le vaiaso nei, na faamaonia ai e le Teutupe i le SIC, o le $200,000 o loo fesiligia i le ripoti sa faaalu e totogi ai sui o le komiti faafoe a le Arts Festival, e aofia ai ma i latou e toatolu ua uma ona fesiligia.

O sui e toatolu o le komiti faafoe a le Arts Festival sa fesiligia e le SIC i le masina na te’a nei e aofia ai Fagafaga Daniel Langkilde lea na ia faailoa i le SIC, o ia sa avea ma teutupe a le komiti. Lauti Simona ma Leala Elisara.

O le tele o vaega o le ripoti o loo taua ai vaega sa faaalu i ai tupe a le Arts Festival, e le’i silafia e Fagafaga, Lauti ma Leala.

Mo se faataitaiga, na fesiligia e le SIC i latou nei pe o le a le $201,144 lea o loo taua i le ripoti na aumai i le Ofisa o le Paketi, o loo totogi ai ‘volunteers’, ae na tali molimau, latou te le iloaina lea tupe.

Na fesili le komiti i molimau ia e toatolu pe sa maua ni o latou totogi, ae na tali Leala, “o matou uma nei sa ofo fua atu o matou taimi mo le faamoemoe o le atunuu, e aofia ai ma isi tagata faigaluega a le malo, sa matou galulue fua.”

Na pau le totogi na faamaonia e Fagafaga i luma o le komisi sa ia mauaina, o le avea ai lea o ia ma teutupe a le komiti, ona o le isi lea aiaiga mo le faaaogaina o le $339 sa fesoasoani mai ai le Initeria ia Amerika Samoa mo le Festival, e totogi ai le tagata na te faamaumauina le faaaogaina o le tupe, ae o le ofofuaina atu o lona taimi mo le Festival sa faia e aunoa ma se totogi.

Ae ina ua fesiligia e le taitaifono o le SIC ia Lualemaga Faoa le teutupe a le malo o Magalei Logovii i le vaiaso na te’a nei, e uiga i le $200,000 o loo taua i le ripoti sa totogi atu i ‘volunteers,’ na taua ai e Magalei e faapea, o le tupe lea sa totogi ai sui o le komiti faafoe o le Arts Festival, ae le o volunteers e pei ona taua.

“Sa i ai lo’u manatu o tagata faigaluega uma o le malo na ofo fua atu o latou taimi e galulue ai faataulaga ofo ‘volunteers’ mo le Festival, sa faia uma uma ia tautua e aunoa ma se totogi, ae ua faateia le komiti ina ua maua mai le ripoti, e silia i le $200,000 o loo alu e totogi ai volunteers,” o le saunoaga lea a Lualemaga.

Ina ua maua le avanoa o Magalei e faamalamalama ai le mataupu lea, sa ia faailoa ai i luma o le komiti e faapea, o le tupe e pei ona fesiligia sa totogi ai Fagafaga, o Lauti ma isi totino e toa 8 o le Komiti Faafoe o le Festival.

“O tagata uma lava sa volunteers o latou taimi mo le festival e aofia ai ma a’u lea e tautala atu, e le’i maua ni o matou totogi,” o le saunoaga lea a Magalei.

O le isi mataupu na manino ai foi i le iloiloga lea, o le $25,500 sa totogi atu i le igoa o Virginia Samuelu.

O le afioga i le alii Senatoa ia Fuata Dr. Tagiilima Iatala na fesiligia Virginia pe i ai sona sootaga ma le komiti o le Arts Festival, ona o lea o lo o i ai le tupe o loo taua i le ripoti sa totogi atu i lalo o lona igoa.

Na taua e Samuelu i le SIC e faapea, e leai sona sootaga ma le komiti faafoe a le Arts Festival, ae o le siaki o loo fesiligia ai lona igoa, o le siaki lea sa faaaoga mo le Tauvaga Tausala a le Pasefika (Miss South Pacific Pageant lea na taualuga i ai polokalame o le 2008.

Talu ai o ia o le faatonu o le Tauvaga, o le mafuaaga lea na ala ai ona totogi atu i le siaki i lalo o lona igoa, ina ia faafaigofie ai ona tala le tupe ma faaaoga e fai ai faailoga tupe mo le tauvaga, e pei ona faamalamalama e Samuelu i luma o le SIC.

O isi tupe o loo paso ai le komiti e faavasega, o le $153,602 o loo taua sa faaalu mo le Samoan Heritage i Hawaii ma le $741,924 o loo taua i le ripoti o ‘disbursement to delegates

Ua talosagaina e le alii Senatoa o Galea’i Tuufuli le afioga Lualemaga ina ia teena le ripoti a le komiti faafoe o le Arts Festival, ae tuuina atu i le Suetusi a le teritori mo le faia i ai o se iloiloga, ina ia mafai ai ona faamaonia vaega uma o loo i totonu o le ripoti.

O loo faaauau pea suesuega a le SIC i le taimi nei, mo nisi o mataupu o loo fia malamalama i ai le komiti.

O le tupe na faagaioi ai polokalame o le Arts Festival e aofia ai le $2.5 miliona na pasia mai e le Fono mai le nonogatupe e $20 miliona a le malo, o le $339 mai le Initeria, ma le $485,500 mai foa’i ma tupe na alolofa mai ai le atunuu, pisinisi ma ekalesia.