Ads by Google Ads by Google

'ESE'ESE MAFUA’AGA E MALILIU AI TAGATA LBJ

E 'ese'ese mafua'aga e ala ai ona maliliu tagata i le falema'i i Fagaalu, e pei ona ta'ua e le pulesili o le falema'i ia Michael Gerstenberger i sana molimau i luma o le komiti a le Senate i le vaiaso nei.

O ni isi o ia mafua'aga e tele e pei ona ta'ua e Gerstenberger e aofia ai le tulaga lea, afai e taunu'u atu le gasegase e maua i le gasegase o le fatu, ae e a'afia fo'i o ia i le gasegase o fatu ga’o e le mafai e le foma’i ona tu'u atu i ai le fuala'au lea e mafai ai ona togafitia le gasegase o le fatu ae a'afia ai ona fatu ga’o.

O lona uiga, e tatau ona sa'ili e le foma'i se fuala'au talafeagai mo le gasegase o le fatu, ma ia aua ai fo'i nei a'afia fatu ga’o o le gasegase.

Fai mai Gerstenberger, tusa lava pe fa'apea o le fuala'au o le fatu lea e malosi ma maloloina ai le gasegase, ae afai e a'afia ai isi vaega o lona soifua maloloina, e le mafai lava ona tu'uina atu i ai.

Ae sili atu le matuia o le mata'upu pe afai e a'afia le gasegase i isi ma’i e pei o le suka, toto maualuga ma isi lava gasegase pipisi fa'apena.

O ni isi ia o le vaega o le molimau a le ali'i pule o le LBJ sa tu'uina atu i luma o le falema'i i le vaiaso nei, ina ua fesiligia o ia e Senatoa i le mafua'aga e ala ai ona to'atele tagata e maliliu i le falema'i.

Sa fia malamalama le tofa ia Velega Savali Jr i le mafua'aga e ala ai ona maliliu tagata i le falema'i ae pe to'a fia fo'i tagata o lo o maliliu.

Saunoa Velega, o le to'atele o tagata o lo o ta'ua i ripoti o lo o maliliu, o tagata e fa'anatinati atu i le falema'i ona o gasegase e a'afia ai o latou soifua maloloina, ma o i latou ia e le umi se taimi e taunu'u ai i le falema'i ae maliliu loa.

Fai mai Velega, e fia malamalama lona sui pe aisea e maliliu ai tagata nei i le falema’i, pe ona o le mea ua le lava vaila'au e togafiti ai i latou, pe ona ua leai ni foma’i e agava'a i le fa'atinoina o tiute fa'afoma'i, pe ona o ni isi lava mafua'aga e pei ona ta'ua e le ali'i pule e aofia ai ma le tele naua o gasegase 'ese'ese o lo o a'afia ai le tagata ma'i.

E tusa ai ma fa'amaumauga na tu'u atu e Gerstenberger i le komiti sa ia ta'ua ai e fa'apea, a maualuga le aofa'i o tagata maliliu i le masina o le to'a 30 pe sili atu fo'i, ae o le kuata pe a ma le to'a 120.

O lea fuainumera e le'i talitonuina e ni isi o Senatoa, ona sa ta'ua e Senatoa Fuata Iatala e fa'apea, sa ia asia le fale maliu i se tasi o po, ma ia matauina ai le to'atele o tagata maliliu o lo o i ai, ua tumu ma ua le ofi le fale maliu.

Sa ia ta'ua fo'i e fa'apea, o le to'atele o tagata maliliu o pepe ma fanau laiti, ma, o le isi lena fesili o lo o tula'i mai i le taimi nei, pe aisea e mafuli ai tagata maliliu i fanau laiti, pe o le mea e le o lelei le togafitiina o fanau pe ona o vaila'au ma fuala'au e le o lava?

Na fa'amatala ma loimata e le tina o Fatima Oloapu mai Aua i le Samoa News e fa'apea, o lana tama e 4 tausaga le matua na mafua ona maliu ona o le tigaina o lona ma’i na a'afia ai, lea e o fa'atasi le fiva ma le nimonia (Pneumonia).

O le masina o Ianuari na maliu ai lenei alualutoto e pei ona fa'aalia e lona tina i le Samoa News, ina ua atoa le 2 aso talu ona taunu'u lona tino i le falema'i ae maliu loa.

E ui i le tele o manatu ma fa'asea mai tagata fai mai o le falema'i o le LBJ e le tatau ona toe taua o se falema’i, ae tatau loa ona fa'aigoa o le fale oti, peita'i na taua e se tasi o tama ua silia ma le 25 tausaga talu  ona tautua i le falema’i, tusa lava pe musu tagata e maliliu, o le iuga lava lea o le olaga lenei o le oti, pau le mea malie lea ua matauina i ni isi o tagata, e fiafia e ola ae fefe i le oti.