Eseese finagalo Lolo ma Faleomavaega faatatau National Guard

Na taua e le afioga i le ali’i kovana ia Lolo Matalasi Moliga i le fonotaga tuu sa’o mai Hawaii ma lana kapeneta (video conference) i le vaiaso na te’a nei, le eseese o la lagona ma le Faipule i Uosigitone e fa’atatau i le mataupu o le National Guard mo Amerika Samoa.

 

Sa ia faailoa i le kapeneta e faapea, ua uma ona ia tapenaina ni tusitusiga mo fesootaiga ma le laumua i Uosigitone, ina ia mafai ai ona faagaioi le mataupu o se National Guard mo Amerika Samoa.

 

O nei fesootaiga e pei ona saunoa Lolo, sa aofia ai fo’i ma ni feso’otaiga ma le ofisa o le alii faipule i Uosigitone, le tofa ia Faleomavaega Eni Hunkin, ae foliga mai e i ai se eseesega i tulaga o talitonuga e faatatau i lenei mataupu i le va o ia ma Faleomavaega.

 

“Ua uma ona ma faasoa ma le afioga i le alii lutena kovana e faatatau i le mataupu lenei, i lo ma talitonuga ma le afioga a Lemanu Peleti Mauga, o le National Guard a Amerika Samoa e i lalo o le vaavaaiga a le kovana ma le lutena kovana, peita’i o le talitonuga o le tatou faipule i Uosigitone, o le tatou National Guard e tatau ona taoto atu i lalo o le vaavaaiga a le setete o Hawaii,” o le saunoaga lea a Lolo.

 

E talitonu le alii kovana e pei ona ia faailoa i lana kapeneta, afai o le talitonuga lea o Faleomavaega e faatatau i le National Guard pe a faavaeina, lona uiga ua le aoga atoa lava le mafuaaga na ala ai ona a’e se tofa e faavae le National Guard mo Amerika Samoa.

 

“O le ma talitonuga ma Lemanu i le faavaeina o se National Guard mo Amerika Samoa, ina ia mafai ai ona vave sauni i latou ia e tali atu i taimi e tutupu mai ai ni fa’alavelave i totonu o le atunuu, nai lo le tau fa’atali i se isi taimi i luma atu,” o le isi lea saunoaga a le alii kovana.

 

Sa talosagaina loa e Lolo i latou sa tautua i vaega au a le malo tele, po o fitafita tuai ua lava lo latou silafia i le mataupu lenei, ina ia amata tapenapena ni a latou finagalo e fesoasoani atu ai i le lagolagoina o lenei mataupu aoga mo le atunuu.

 

Saunoa Lolo e faapea, o le autu lena na ala ai ona faavae le la faigamalo ma Lemanu, ina ia fesoasoani i le atunuu mo le faia o ni suiga, ma o ni isi o nei suiga e tatau ona fai ina ia faamalieina ai le atunuu i soo se vaega o le tautua a le malo.

 

O ni isi o ia vaega o le tautua a le malo e aofia ai le vaavaai i auala e siitia ai tautua ma auaunaga a tagata faigaluega, aemaise ai o le vaavaai i auala e manuia ai le atunuu.

 

Mo se faataitaiga o fuafuaga ina ia laugatasia le atunuu atoa i le aso o le fu’a na se’i mavae atu nei, na finagalo ai Lolo ina ia siitia i le $7 le maualuga o le pepa taumafa mo tagata uma o le atunuu e maua le avanoa e maimoa ai i polokalame o le fu’a, ina ia lagonaina ai le taua o i latou i le malo.

 

Sa ia faailoa i le kapeneta e faapea, tusa lava pe matagofie polokalame o le sisiga fu’a, ae a fo’i le tagata i lona aiga e le i tausami, lona uiga e leai atoa se aoga o nei mau polokalame mananaia i le manatu o le tagata ona ua misi le tausami a’o i ai i polokalame o le fu’a.

 

Ae i tulaga o tautua ma auaunaga a tagata faigaluega ma le malo, sa ia toe fautuaina ai faatonusili ina ia silasila toto’a i auala e faamalosia ai tulafono mo tagata faigaluega, ina ia aua nei faia pito tasi faaiuga ae tatau ona faavae i luga o tulafono.

 

Mo se faataitaiga e pei ona saunoa le alii kovana, o lo o i ai lava ni isi o tagata faigaluega o lo o faasea i le tau tuli o i latou e a latou pule, pe afai e i ai se faaletonu i le faatinoina o a latou galuega.

 

Na fautua Lolo i faatonusili ina ia galulue faatasi ma le faatonusili o le Matagaluega e Pulea Tagata Faigaluega a le malo ina ia faamanino tulafono e lima taitaiina ai taiala mo galuega a tagata faigaluega, ma iloilo po o usitaia e le tagata faigaluega tulafono ma ta’iala o le galuega, ina ia fesoasoani ai i faaiuga fai pe a tutupu mai ni mataupu i totonu o matagaluega ma tagata faigaluega a le malo.

 

Ae i tulaga o livi tausaga ma livi ma’i e pei ona taua fo’i i sana tusi sa tuuina atu i faatonusili o ofisa ma matagaluega a le malo, sa ia toe fautuaina ai lana kapeneta ina ia faaauau pea ona galulue faatasi ma le susuga ia Sonny L. Thompson ma lana matagaluega, ina ia mautinoa e usitaia tulaga o le tulafono e faatatau i livi ma’i ma livi tausaga.

 

Na taua e Lolo e faapea, o lea ua maea ona tuu atu se fautuaga a le Loia Sili e faatatau i le maualuluga e tatau ona i ai livi tausaga ma livi ma’i a soo se tagata faigaluega, ma ua ia faatulagaina ai loa le aso 30 Setema 2014, e tatau ona oo atu ai i le aso lea ua maea ona foia le faafitauli i le tele o livi a ni isi o tagata faigaluega o lo o i ai.

Comment Here