Nofo fa’avauvau Samoa - Maliu le Auaunau a le Atua: Rev. Oka Fauolo

Ua lagia Sinave ma Moto’otua! Ua lagona fo’i le leo i Rama i Mataniufeagaimaleata, le malae o le Talalelei ua ao ai Samoa, ma sa avea ai le lana Auauna o se punavai manino e fa’ao’o ai le Upu i loto ma agaga o tagata o Samoa, lona atunu’u pele.

Ae ui o lea, le Fa’afetai  a Samoa i lona Atua, le Atua o Isaraelu, ona o le meaalofa sa ia aumaia mo Samoa, o lana ua manava ana galuega, ua fa’amae’aina lona vala’auina, ma ua taoto e fa’atali lona vala’au mai i le toe tutu i le ola e fa’avavau.

Fa’afetai le faiva o le fa’asaoina o agaga, aua sa le faigofie ona asa le ala o le vaotuitui o agaga, i le sese ma le agasala sa fitaituga ai lana Auauna. E tauia e le Atua galuega lelei uma sa e faia, mo ou tagata! Le ua iloga i faitoto’a o lou malo, le avea filemu o le manava ola mai lou tino augase, ua fa’amalo’ulo’u lau ‘au’auna ma ua ia silafia mamao mai, ua tatau ona e manava mai ou faiva, e vi’ia ai pea le Tama o i le Lagi, ona o lou soifua tima’i i le to’atele e ala i le laugaina o le Upu a le Atua.

O lenei Faife’au Toeaina ua loa ona auauna mai i le Ekalesia Fa’apotopotoga Kerisiano i Samoa ma e tele fo’i tofiga a le Ekalesia sa ia tau’avea mai. E maliu nei o ia, o lo’o ia tula’i pea e avea ma Taitaifono o Ekalesia So’ofa’atasi, peita’i, e umi fo’i se taimi sa ia nofoia ai le tofiga Taitaifono o le Ekalesia Fa’apotopotoga Kerisiano i Samoa, le Ekalesia sa a’oa’oina ai o ia e avea ma Failauga o le Upu.

Ua fa’ailoa mai o le itula e 2:05 i le taeao lava o le aso Tofi na maliu filemu ai o ia i lona maota i Vaoala, a’o fa’atasia ma le Faletua loto fa’avauvau ma le fanau. Ina ua fesiligia le tina So’oletauaotumua Fauolo i se toe upu a le Auauna ma o le tama o le aiga, sa ia fa’apea ai, “Na ia tima’i mai ia te a’u ma le fanau, ‘aua le fetagisi, ae ia outou loto tetele ma ia outou fiafia.”

Ua fa’ailoa mai e So’otauaotumua - “O lo’o matou taumafai lava e usitaia lona toe upu ia i matou ma le fanau, peitai, e le faigofie lava le matuitui o le oti, ua motusia ai le mafutaga ua loa ma e sili ona mafana ia te a’u ma le fanau.”

O se tasi mea e sili ona fa’agalogata ai le tama o le aiga e le faletua ma le fanau, ona o lana auaunaga i le Atua ma le atunu’u. “ O ana galuega sa faia ma fa’amae’aina a’o soifua ma galue i le galuega a le Atua, ua avea ma mea e amana’ia ai i matou ma le fanau.”

O i latou fo’i o lona aiga sa auai i lea taimi fa’avauvau, ua aofia ai ma le afioga le Ao Mamalu o le Malo o Samoa, TuiAtua Tupua Tamasese Tufuga Taisi Tupuola Efi ma sa latou lagona uma le misi alofa i lenei tama, aua e moni lava o le ‘au’auna, ae matua tele ana taleni e ala ai ona tele fo’i i latou e fiafia e fetufa’i ma ia.

Ina ua mae’a ona latou feiloa’i i le susuga le Auauna a le Atua, sa tula’i loa le susuga Rev. Ioane Petaia ma faia se latou sauniga lotu e molita’i ai le fa’afetai ma le vi’iga i le Atua ona o lana meaalofa taua sa ia fa’aaogaina i lenei lalolagi i ana galuega lelei e tele.

E le’i fa’atulagaina  atoatoa ona toe sauniga ma aso patino e fa’ataunu’uina ai, peita’i, ua moe nei o ia i le Maota o Ligaliga ina ia tatalia se fa’ai’uga a le Tina ma le fanau, ae maise le pa’ia o Aiga i ona toe sauniga ona fa’ato’a fa’alauiloa mai lea.

O lenei Faife’au Toea’ina sa avea ma Failautusi a le EFKS po’o le LMS i tausaga e tele ma soso’o ai ma lona avea ma Taitaifono i lana lava lea Ekalesia.  Na tele fo’i tausaga o avea o ia ma Pule A’oga i le Kolisi Fa’afaife’au i Malua

E maliu Oka Fauolo ua atoa lelei le 82 tausaga o lona soifuaga, ma ua atoa fo’i le 10 tausaga o lo’o fesaga’i o ia ma gasegase tau le fatu. Ua matua pisi lava le telefoni latou, i le to’atele o aiga, o uo mamae ma e pele ia Oka Fauolo ua latou fa’ailoa atu lo latou nofo fa’anoanoa fa’atasi ma le faletua ma le fanau ona o le maliu o Oka.

I se molimau a le tina e tusa ai o le tama o le aiga, sa ia fa’apea ai, “O se tama ua tele ni fa’amanuiaga ua ou maua ai. Ua ou o’o i le tele o atunu’u e tau le o’o i ai lenei lo’omatua ona o ona tofiga, ma e tele na’ua mea ua fa’ao’o i ai lo’u tina fa’atauva’a e le Atua, ona o le auaunaga a le tama o le aiga.”

“Na ia avea a’u i Roma ma Ierusalema, ina ua ma’i fo’i, e so’o se mea lava e mana’omia mai ai e alu atu i atunu’u mamao, e tautoso atu ai lava ma a’u, e tusa lava pe tau leai se tupe, e mana’o lava ou te alu, ona ou alu lava fo’i lea.”

O ia e pei la ao le tina o le fanau, e alofa tele i le fanau ma latou fanau. O ana aga e faia ia te ia, i aso faiso’o, e le o faigofie ona galo i le tina, “E na te tusia lava se tusi ia te a’u, po’o fea o alu agai i ai. O le fanau fo’i, e tele atu taimi e fiafia ai i latou e fa’atasitasi ma le latou tama.

“A ou vala’auina se tasi i se mea ou te mana’o ai, e matele lava ina latou fa’ailoa mai o lea e tu’i pe fofo vae o le latou tama o lo’o tu’i ona vae.” O nisi mea ou te ula ai ia te ia, o le fai mai loa o le a alu i sana fonotaga, o’u fai atu loa i ai, “Ia alu loa i lau vaega lena e toe faia lava ou tala!” E matua ita lava le tama i lena mea pe a ou fai atu fa’apena ia te ia. O lana tali, “Aua ne’i e toe faia mai se tala fa’apena ia te a’u.”

Ua fa’aalia fo’i e le tina, e o’o loa i le galuega a le Atua, e matua le fa’alavelave lava o ia i se mea e tapena i ai le tama aua o ia o le Faifeau a le Atua.

Na ulufale Oka Fauolo i Malua i le tausaga e 1953 ma na fa’au’u mai i le tausaga e 1958. E ui lava fo’i ina ua fa’ama’ia le tama o le aiga i lona fatu, ae le’i manatu o ia ina ia tu’ua ai le galuega a le Atua ona ua ma’i. Na fa’amatala e le tina le ulua’i aso lava na fa’ato’a oso ai le fatu o le tama, “O le aso na faia ai le galuega a faifeau a’o’oga i Malua, ae ua alu fo’i ia, ua sasa i lalo le vao i le mugala, ina ua mae’a ona toe malamalama mai o ia, sa ou otegiaina si toeaina ma lalau le fia tama malosi ua manatu ifo lava o toe tutusa aso i le malosi, e faia ai galuega fa’apea!”

 I lona fa’ataotolia lea, sa asia ai fo’i o ia e le Palemia, Tofilau Eti Alesana, ma o i’ina na pei e mimita ai le tama o le aiga, ina ua fa’aigoa o ia e le Palemia o le Povi malosi i lona tago atu sasa ma tase’i la’au tetele. Na te’ena e ia le taotoga o le fatu sa tatau ona faia mo ia a’o le’i afina tele lona fatu i le taimi lea, ma ua toe afaina ane nei lona fatu, ae le’i faia lava e taotoga muamua na fa’atonuina e le foma’i fa’apitoa lea!

Na fa’amavae mai le Auauna ma le faletua mai le galuega i Malua i le tausaga e 1994, ma sa ia fa’asaga atu e tusia le tala’aga o le Ekalesia Fa’apotopotoga Kerisiano i Samoa ma sa ia fa’amae’aina lea tusi  i le tausaga e 2005. Na ia fa’aigoaina lea tusi, “O le Vavega o el Alofa.”

Ua fa’ailoa mai e 802 itulau o le tusi lea, ae na ia fa’ailoa mai i lea tusi le tala’aga o le Ekalesia mai le tausaga e 1761 se’ia pa’ia le tausaga 1999, ma na faia lava le galuega e ui ina ua lagona e ia ua afaina tele lona fatu. Sa ia te ia le fa’anaunauta’iga, ina ia mae’a lava le galuega a’o le’i goto lona la.

Sa ia fa’ailoa mai, “Pe afai ae le uma le tusi lenei ona ua ou oti, ia tu’u pea ia, o le finagalo lena o le Atua.” Fa’aalia fo’i le finagalo o’otia o le afafine la’ititi o Oka, le tama’ita’i faia’oga i Amerika Samoa i le tatou Kolisi Tu’ufa’atasi, Keseta Okenaisa Fauolo Manila, “E le faigofie lenei vaitaimi fa’avauvau ua o’o mai, ae o sa’afi’afiga mo le tama pele, e tumau pea lea ia i matou i aso uma.”

E to’afa alo o le susuga le Faifeau Toea’ina ma le faletua, 13 fanau a fanau ma le to’atasi lava o fanau a fanau a la’ua alo. O lo’o ua i ai le suli o Tuimavave ua fa’aauauina le tautua a matua i le galuega a le Atua lea e faifeau i Palmerston North i Niu Sila.

Na soifua mai Oka Fauolo ia Matu i le aso 12, 1930 i le afio’aga o Falealili ae na si’itia ma alaala ma ona matua i Fusi Safotulafai Savaii. Na auina atu o ia i le avanoa fa’asikolasipi i a’oa’oga fa’afaife’au i Niu Sila ma toe taliu mai i le tausaga e 1963. Na faigaluega o ia o se faia’oga ma o le pule a’oga fo’i i le A’oga Fa’afaife’au i Malua mai le tausaga e 1979 se’ia o’o i le 1994.

E le’i avea lava Oka Fauolo ma se Faife’au tausinu’u a le Ekalesia, ae ona ua ia umia le fa’ailoga Masters i Mataupu Silisili, i le Feagaiga Tuai mai le Iunivesite o Niu Ioka, o lea sa tele ai tulaga tofi o le Ekalesia sa ia tula’i ma auauna ai.

O lana toe upu i le tina ma le fanau, ia fa’amalolosi, onosa’i ma ia fiafia, peita’i, e le’i mailoa i le taimi nei le fa’atulagaga a Aiga ae maise le faletua ma le fanau i ona toe sauniga, a’o lona sa ua i ai lea i le Maota i Ligaliga Moto’otua. O le a toe fofoga mai se isi fa’aaliga fa’alauaitele e tusa ai o se fanoga o le Ekalesia ma ona toe sauniga pe a mae’a feutaga’i ia tulaga uma.

E fa’afetaia fo’i e le tatou nei malo ma ona tagatanu’u le susuga le Auauna, aua e le’i leva atu, sa auai mai ai o ia i le tatou nei malo e molita’i mai se si’i fa’aaloalo i le to’esea o le afioga le Alofioamoa Tufele Li’amatua ma o le afioga fo’i le Ao o le Malo Samoa, TuiAtua Tupua Tamasese Efi sa la’ua va’ava’alua mai e fa’ao’o mai lea masi’i fa’aaloalo ona o tulaga o so’otaga tau aiga! O lana toe saunoaga fo’i lea i le Malumalu EFKAS i Lauli’i, o lona toe leo lea sa lagona i o tatou eleele.