Ads by Google Ads by Google

E! Ua Maliliu toa, Maumau ai Au’upega o le Taua

Taualoa e le CIA - Latou na Maliliu a’o Faia Tiute Fa’a-Sipai

Ua fa’ato’a fa’alauiloa mai nei e le CIA le lisi o suafa o i latou na maliliu a’o latou faia le galuega fa’aleoleo nana pe fa’asipai fo’i i so’o se atunu’u o le lalolagi fa’atasi ai ma Amerika lava latou, talu mai le tausaga e 1980.

Ua fa’ailoa mai fo’i, ua ala ona fa’atuai ona faia e le CIA lea tulaga, ona o le manatu, ina ne’i afaina le tele o galuega sailiili fa’alilolilo a le CIA o lo’o fa’aauau pea i nisi o nei mataupu sa auai sui ua maliliu nei ona e le’i mae’a lava le tele o nei galuega su’esu’e sa mafua ai ona fasiotia nisi o nei sipai Amerika.

Ua fa’ailoa mai, e to’atasi lava le sui Sipai, e fa’apena fo’i ona tofu ma fetu pupula ua fa’apipi’ia lea i le puipui o le Fale tele o le CIA i Northern Virginia i Amerika. I le taimi nei ua atoa lelei le 103 fetu pupula ua i ai, ma o le aofai fo’i lea o i latou o sipai Amerika ua maliliu talu mai ona fa’atuina le CIA i le tausaga e 1947.

O nei fetu ua tofusia fo’i ma latou suafa ua fa’apipi’ia i ai, peita’i e i ai lava fetu ua i ai, ae le’i fa’aigoaina, ona o le fanoga e pei ona fa’aalia i luga, ina ne’i tusia, ona mataulia ai lea e nisi sa a’afia i nei sailiga nisi o lo’o fa’aauauina lea fo’i taua lelei, po’o tiute faia fa’anana ae alia’i ai fa’ai’uga lelei o ni sailiga o lo’o faia ina ia maua tonu i latou e ao ina fa’asalaina tonu ona o ni soligatulafono.

“O i latou uma nei ua mae’a fa’afetuina ma ua fa’aalia i le puipui ua i tua atu nei o a’u, o i latou uma nei sa latou fa’alogo i le vala’au mo se e fia tau’avea nei tiute fita, ma o mai ai e ofo mai i latou e fa’ataunu’uina nei tautua fita ae sili fo’i ona mo’omia i galuega fa’aleoleo su’esu’e.”

“E ui ina e le o fa’aalia suafa o nisi, ae o suafa na a fa’aalia, ua i ai nisi foi o fa’aauauina o latou tiute e ono maumau ai laotu soifua. O le taua ma le fili o Terarisi e le o se taua faigofie lava, ae ua sili ona taugata ma ua maumau ai le soifua o nisi o leoleo nana sili ona atamamai, ona o nei tiute fa’asipai e ao ina latou fai!”
O le sui mulimuli lava o tusia lona igoa, o le ali’i o Jeff Patneau, na maliu o ia i le tausaga 2008 i se ta’avale na lavea i Yemen, ma ua mae’a ai lona ola i lea lava taimi. O ia lea ua atoa tonu i ai le 103 ua mafai ona fa’aalia o latou suafa. Ua fa’ailoa mai o le igoa o lea ali’i talavou, ua lisia lea i le lisi o suafa o i latou e to’a 15 ua fa’apea e ao ina fa’alauiloa i lenei tausaga, ae o nisi e ao ina fa’amauina pea e le CIA ae ia fa’alilo pea lo latou fa’alauiloga, se’ia alagatatau e tusa ai o lagona o ta’ita’i o le CIA.

Na faia se fonotaga a le CIA i lana komiti fa’afoe, ma latou faaalia ai, o le to’atele o nei fetu, e ao lava ina taofiofia pea latou igoa se’ia mae’a lelei galuega fa’atino i a latou poloketi sa faigaluega ai. O se tasi ua fa’apipi’ia lona suafa, ma o se tasi o le to’a 15 na fa’alauiloa o Mathew K.Gannon lea na maliu i le pomuga o le va’alele a le Pan Am Malaga 103 i Lockerbie, Scotland i le 1998.

Na fa’asalalau mai lava i le amataga o lea ali’i o le CIA ae le’i faia lava se fa’amatalaga a le CIA ma fa’alauiloa sa faigaluega ia i latou lea ali’i se’ia o’o mai i le vaiaso na te’a nei a’o loma ai le aso Tu’ugamau lenei e fa’ailo ai lo latou fa’amanu’alia a’o faia o latou tiute fa’aleoleo nana.

O le isi fo’i sui o Leslianne Shedd lea na maliu ia Novema 1996 i se malaga fo’i a se va’alele i luga a’e o Comoro’s Island i le Indian Ocean.

Na fa’alauiloa fo’i le tama’ita’i lenei o se tasi e faigaluega i se Tautua fa’amiliteri mai se atunu’u e le o se atunu’u i sasa’e tutotonu, ae le’i mafai fo’i ona fa’ailoa patino e le CIA lenei tama’ita’i se’ia o’o mai lava i lenei tausaga. Peita’i o gaoioiga sa faia e nei sui, sa fa’ailoa ai, na taumafai Shedd e na te fa’asaoina le ola o isi sa latou auai fa’atasi i lea lava pa’uga o le va’alele lea.

Saunia: Leua Aiono Frost