E TELE A MEA A LA'U TAMA LE LA

Ua uma lelei ona fai le tonu a Kuisi ma lana tama o Sitaka i a la mea e fai, aua o le tama lea o Sitaka, o le ‘ai lava i le fale o Kuisi i po uma lava. Ua o'o loa i le po lena na ta'a’oto’oto ai le 'au vaega lena e momoe, te'i a ua fai atu le tama o Kuisi, "O lo'u fia alu i le afafine o le faife’au, ae pona ou te ma !!!!."

O le Sitaka, e tau fa'asoso le taule'ale'a lenei, le ituaiga tagata fo'i lea e pupula mai, e 'ese lava le mea la e mafaufau i ai, ae lea e te fiu e fa'atalitali po 'o le a sona manatu, ae o le la e tau mafaufau lava.

Na i'u lava ina maua mai e si tama o Kuisi le tonu, "Ua maua le tonu, o le ta o i ai e tatou te talanoa…va'ai oe, lea o le a ou fai atu lava i so 'o se mea lava, ia ae lagolago mai lava e oe.."

Fai mai ma le tamaloa o Sitaka, "Ia ua lelei….so 'o se mea lava e te fai mai ae o le a lagolago atu….a ea ?." fai mai loa ma Kuisi, "Va'ai oe, e te ‘ai i la matou fale pe a leaga mai lau lagolago, ua e iloa ?."

Ia ua o'o i le afiafi ua o i le voli, uma loa la latou 'au, o le mea na saofa’i ai le afafine o le faife’au ma nonofo ai loa ma tama sese ia, o Kuisi, "Oi talofa…ua laki lava le 'au le la ua leaga lo’u vae…" oso mai Sataka, "E sa’o lelei…a ku'i e lau kama e fiki lava le polo e sau ua liu mafolafola…."

Faiatu loa ia Pepe, le afafine  o le faife’au, "E na ou va'ai ia oe ananafi o e alu atu i la outou ta'avale fou lava, a ea ?". ae fai mai Kuisi, "E le fou kele..o si ka'avale lava na fa'akau mai e lo'u kama e fafaga ai pua’a…e ma te o ai ma la’u kama o Sitaka….". ia ao le taimi lena ua 'ata'ata lava le tama o Sitaka.

Toe fai loa Pepe, "e fia tou pasi la e i ai, pei lava ua atoa le sefulu, aua ou te faitau atu a, e sefulu lelei a outou pasi…a ea ali'i Kuisi ?." ae fai le tama o Kuisi, "E leai ga'o le lima lava !!!!!. ae oso atu le tamaloa o Sitaka, "Pepelo ia, e kele a lakou pasi la e i ai,"

Fai mai si teine o Pepe, "E pei a e sefulu lua tou taxi la e i ai, a ali'i Kuisi ?." ae fai mai fo'i le tama o Kuisi, "E leai ga'o le lima lava…." ae oso mai fo'i lana tama-susu lea o Sitaka, "O le pepelo…..e sa'o oe e sefulu lua a latou taxi la e i ai."

Va'ai atu Pepe i le tulivae o Kuisi, pei a o se lafa le mea la e tu mai ai, fai atu loa Kuisi, "Sole o le a le na  mea e ola mai ai…pei a o se lafa..a ea ?." ae fai mai Kuisi, "Oi e tasi lava…!!'. ae oso mai lana tama fa'avalevale lea e Sitaka, "PEPELO IA…E KASI E KU I LOGA KULIVAE AE KELE LAVA NA I LONA MULI (tulou)…." na tu loa i luga ia Pepe, ua le mafai ona tatali lona fia ata, 'ao le kaimi lega ua o'o i le isi iku o le gu'u le kuliga o le ko'alua lea….

 O A'U E 'IGO'IGO TELE A I NA MEA.

Ua ‘ave’ave i le a’oga lona atali'i ua maua le poto, ia ma o'o ai lava i le sikolasipi, ia ua i'u mai le a’oga o le tama, ua tau le iloa fa'a-Samoa e tele lava ina nanu i le tele o taimi e fai ai ana tala. Fa'apea loa le toeaina i le olomatua, "Si o'u atali'i o le mea lea, na ‘ave ma le fa'amoemoe ina ia maua le poto ma le atamai ae o le mea lea ua sau ua ova le poto…ua sese le Ofisa o A’oga, ua ‘ave si o'u atali'i i le a’oga e leai ni tagata Samoa…!!"

O'o loa i le taeao o le a alu le toeaina e fagota, ae 'oso atu si ona atali'i, "Ta o ali'i Daddy.." ia 'oso mai loa le tama lea i totonu o le va'a, alu loa le faiva a le to'alua lea, ia ua feslli lava le toeaina i le a’oga.

Ia e tasi le fesili, ae sau le tali o le fai o le umi, ae o le leiloa isi mea ua fa'amatala mai,  fa'ato'a uma mai. Fa'apea le toeaina, "Ua ova le poto o lona atali'i….e sili ai ona aua le toe fesili i ai, aua o le mea lava o le a maua….e tasi le fesili, ae sau le tali e uma ai le aso…"

Ua fai si mamao i tai i le tua'au, ua tiga taliga o le toeaina i le fesili so'o mai o lona atali'i, "Oi Dad, e te iloaina le mea e ta'u o le Biology….ae a le mea i igoa o le socialogy…..ae a le mea e igoa o le physiology…" ua le mafai lava le toeaina le tiga o ona taliga, tago lou ua fuli le va'a.

Va'ai atu le toeaina ua pa'u i lalo lona atali'i, e'e mai i le fia ola i lona tama, ae fai atu le tama, "OI E TE ILOA LE IGOA O LE MEA O LE SWIMMLOGY….E SE'I E VA’AI LA I  AI, E ‘ESE LAVA LE POTO I LE A’OGA..E 'ESE FO’I LE POTO I LE 'AAU I LE SAMI……TA FETAUI I UTA….FA'APEA LAVA OE IA E TUTUSA LE NANU SO'O MA LE LE ILOA 'AAU…..!!!!