Ua fa’aalia e nisi o fitafita tuai ma o latou aiga lo latou sapasapaia o le fuafuaga a le ali’i kovana, e sainia ai se polokalama a fa’alauiloa ai suafa o fitafita ua maliliu i le taua, e ala i le fa’aaogaina o laisene e fa’apipi’i i luma o ta’avale a tagata o latou aiga.O le vaiaso nei na taua e le ali’i kovana ia Togiola Tulafono, na te sainia ai se poloaiga fa’a kovana e fa’aaogaina ai le polokalama lea e taua o le “Gold Star Family”, lea o lo’o fa’aaoga e le tele o Setete o le malo tele, ina ia fa’aaoga fo’i i totonu o Amerika Samoa.O le agaga o lenei fa’amoemoe e pei ona saunoa le ali’i kovana, ia mafai ai ona fa’alauiloa ma manatua pea le tautua sa ofoina mai e tama fanau a le atunu’u na maliliu ona o le latou tautoga i tautua i totonu o vaega au a le malo tele o Amerika.Ina ua fesiligia e le Samoa News i le aso ananafi nisi o totino o le Vaega o Fitafita Tuai e uiga i lenei mataupu, sa latou taua ai lo latou lagolagoina o lenei fa’amoemoe.Na taua e se tasi o fitafita tuai e le’i finagalo e fa’alauiloa lona suafa, o le fuafuaga lenei a le kovana, o se gaioiga ua leva ona tatau ona fai, ina ia aloaia ma manatua ai pea le tautua a tama fanau a le atunu’u.“E lagona le fa’anoanoa ona o lea ua fa’atoa a’e se finagalo o le kovana na te faia ai lenei fuafuaga, ae o lea ua toe tasi le tausaga mae’a lana nofoaiga, e foliga mai sa le’i manatu mamafa i ai i le tele o tausaga o lana nofoaiga,” o le saunoaga lea a se tasi o fitafita tuai.Na taua e isi sui e to’alua o le vaega o le Army Fa’aleoleo sa mafai ona fesiligia e le Samoa News i le aso Faraile na te’a nei, o se manatu lelei ma talafeagai ua saunoa i ai le ali’i kovana, e le gata e aoga mo i fitafita o lo’o tautua pea i le taimi nei, ae fa’apitoa mo aiga o Toa o Samoa ua maliliu mai le taua.Sa taua e i laua ia, tusa lava pe ua maliu le fitafita, peita’i o le taua o le tautoga sa ia faia e toe fa’amanatu mai ai le saolotoga ua mafai ona maua e lona atunu’u, o lona aiga ma le lalolagi ona o le tautua toto sa ia ofoina atu.Saunoa le afioga i le ali’i pule o le Ofisa o Ta’avale Afi a le malo i Tafuna, afioga Fa’amausili Mau Jr, o se fuafuaga taua ma le aoga ua mafai ona fa’alauiloa e le ali’i kovana, ina ia iloa ai aiga o i latou sa tautua i vaega au ua maliliu.“O se fuafuaga talafeagai ma lelei lea ua saunoa i ai le ta’ita’i o le atunu’u, ma o se fuafuaga fo’i e lagolagoina ma sapasapaia e lo’u Ofisa,” o le saunoaga lea a Fa’amausili.Saunoa Fa’amausili, o totonu o Amerika o lo’o faia ai pea lenei tautua e le mafai ona tu’uina i lalo, ma o le agaga taua o lenei auaunaga, ia mafai pea e aiga o fitafita ua maliliu ona tauave ma fa’ailoa le tautoga sa ofoina atu e le latou tagata, po’o se tama, tina, uso, tuafafine po’o se to’alua fo’i o se tagata.“O se auaunaga e lagonaina ai le taua ma le toe manatuaina o le tautua sa ofoina atu e le fitafita ua maliu,” o le saunoaga lea a Fa’amausili.