Ads by Google Ads by Google

E sui pe leai?

Felanulanua’i foliga vaaia o le palota

E felanulanua’i foliga ua vaaia nei i le faaiuga o le palota a le atunuu na mae’a atu nei, faapea ai ma le vaega faaiu lea ua alo atu i ai paga e toalua mo le sailia o se Kovana ma le Lutena Kovana, le paga a Faoa Aitofele Sunia ma Taufetee John Faumuina, faapea ai le paga a Lolo Matalasi Moliga ma Lemanu Peleti Mauga.

Ua le utuva le faafofoga a le atunuu i faasalalauga i luga o leitio ma televise, aemaise ai foi tusitusiga i luga o nusipepa, e faatatau lava i manulauti a vaega e lua ia ua aga atu nei mo le vaega faaiu o le faiga palota i le vaiaso fou.

A’o lumana’i le palota i le vaiaso na te’a nei, sa faafofoga le atunuu i le tele o folafolaga mai sui tauva sa lautogia mo le faamoemoe, ma taua ai e nisi o sui tauva le upu e faapea, UA FUMFA le malo ma ua tatau ona fai se SUIGA i le faigamalo o lo o i ai nei, peitai o lea foi ua finau mai le faigamalo o lo o i ai nei, afai ae latou tulai mai i le taitaiina o le malo, o le suiga fou lena aua o lea a fou le kovana toe fou foi le lutena kovana.

Peitai o le mea malie ua maitauina e le au le osi faapea ai ma le vaega lea ua le iloa poo fea tonu le paga e palota i ai, e foliga mai ua aga eseese uma tagata i nai toe aso faaiu o lo o totoe o le palota, ona o lea ua toe tolu aso oo i le palota, ae o lea ua tele le mau ripoti ua oo mai i le Samoa News e faatatau lea i gaioiga a ni isi ua fai e momono faalilolilo ai la latou faatosina mo le palota.

O faiga faatosina na alia’e ai igoa o ni aoga se lua i le atunuu faapea ai ma igoa o ni faiaoga e faapea, ua faatonu e faiaoga nei tamaiti aoga o a la vasega e aua ne’i palota i se tasi o sui tauva.

E tasi le aoga na mafai ona fesiligia e le Samoa News i le aso ananafi, ae le’i mafai ona fesiligia le isi aoga e uiga i lenei mataupu.

E ui sa tuuina muamua mai se faamatalaga a le sui o le aoga lea na maua le avanoa e talanoa ai ma le Samoa News e uiga i lenei mataupu, peitai ina ua maea ona talanoa le sui o le aoga i le faiaoga  o lo o taua lona suafa, na toe suia ai loa lona manatu e aua ne’i faalauiloaina le igoa o le latou aoga.

E faafa ona taumafai le Samoa News e saili sona avanoa i le pule o le isi aoga peitai e le’i manuia. E vili muamua atu ae fai mai le tali telefoni, o lo o pisi, na toe vili faalua ae tali mai, o lo o fai lana fono, na toe vili faatonu ae tali mai o lo o fai lana taumafataga o le aoauli, ae ina ua toe vili faa fa atu ae tali mai le teine tali telefoni ua malaga i le fale.

Na taua e matua o fanau aoga ia o lo o tuuaia sa faia i ai le faatosina a faiaoga e toalua, o aafiaga o latou manatu i lenei mataupu, ona ua avea faiga faapolokiki ma itu e aafia atu ai fanau aoga.

“Afai ua tau faaleaga i le sui tauva, e lelei le fai sa’o i ai ae aua le faaaogaina fanau laiti e faaauala mai ai ituaiga lagona ia,” o le faasea lea a se tasi o matua.

Ae na taua e se sui o le paga o lo o aafia e faapea, e le o se mea tatau le faaaoga o fanau aoga e auala mai ai faatosina i le taimi o le palota, e le gata e le palota fanau aoga ae o le a avea gaioiga nei ma itu e aafia ai o latou mafaufau mu’amu’a ma le mama i faiga eleele  a le polokiki.

O le vaega lona lua e malie ai foliga o le palota, o lea ua i luma o le faamasinoga maualuga se tagi sa faaulu e ni isi o sui sa tauva i le tofi faipule a lo la itumalo ae ua le faamanuiaina, faasaga i le sui lea ua manumalo mai i le isi nofoa o le itumalo, ma tuuaia ai le sui ua manumalo i le tele o le mau faamatalaga.

O le tagi a Lucia Bartley ma Esther Wall, faasaga ia Florence Saulo lea ua manumalo mai i le isi nofoa o le itumalo o Tualauta, o lo o tuuaia ai o ia ma le Komesina o Palotaga i lo le le tausisi lea i tulafono tau palota, faatasi ai ma isi mataupu e faatatau i le agavaa o se tasi e avea ai ma sui tauva.

Ua taoto atu nei lenei mataupu i luma o le faamasinoga ma ua sauni le faamasinoga mo le faailoaina mai o le aso e fofogaina ai lenei mataupu.

O le isi vaaiga lea ua tulai mai i lenei vaiaso i le maea ai o le palota i le aso 6 Novema, o le aso Tofi na tea nei na faalauiloa ai le avea o le afioga ia Maugaoalii Leapai Sipa Anoai ma faipule o le Itumalo #8, ina ua faia se se’i e saili ai poo ai o laua ma le faipule o lo o i ai nei ia Vailiuama Steve Leasiolagi e manumalo i le nofoa, ina ua tutusa a laua palota i le tai 207 i le palota na mae’a atu nei.

Talu mai lava le taimi na maea ai le palota, sa nofo tatalo sui tauva ma i latou sa lagolagoina i laua, poo ai o le a manumalo i le se’i.

O le afioaga ia Maugaoalii sa avea muamua foi ma faipule o le afioaga i Fagatogo i nofoaiga a le Fono ua maea atu.

Ua sauni paga e lua mo a laua gaioiga faaiu ao lumanai ai le palota i le aso Lua o le vaiaso fou, Novema 20, 2012.

O le aso lea ua faamoemoe e faia ai se faatasiga faaiu a le paga a Lolo/Lemanu i le malae i Fagatogo, lea ua faamoemoe e faatasi

Ua vaaia le nofo tatalo o le atunuu mo lana sailiga tofi i le vaiaso fou, ina ia iu ma le manuia le faamoemoe, o le sailia lea o ni taitai mo Amerika Samoa i le lumana’i.

O paga e lua ia o le a alo atu mo le palota i le vaiaso fou, o ni taitai ua atoatoa  uma i ai le atamai ma le faatuatuaga o le atunuu, e mafai ai ona o latou faafoeina le Sa o Amerika Samoa mo le isi 4 tausaga.

O lau palota i le aso 20 Novema, o le faaalia lena o lou aia tatau e saili ai se taitai mo lou atunuu i le lumanai.