Ads by Google Ads by Google

E ono fa’aitiitia siaki o lafoga aufaigaluega malo

Na ta’ua e le alii pule o le Ofisa o Lafoga ia Melvin Joseph i le Komiti o Sailiga o Alamanuia a le maota o sui i le taeao ananafi, le fa’aitiitia o siaki mo lafoga a tagata faigaluega o le malo, ona o lea ua fuafua le malo, e fa’ato’a ai i’ina le 2% lea sa tatau ona tipi mai i a latou totogi, mo le tausaga 2011.

O lea tulaga na fa’atula’i, i le iloiloga mo le fa’aauauina o le lafoga 2%, lea na fa’amuta ia Ianuari 1, 2012.

O le masina o Aperila, o le tausaga ua tuana’i, na pasia ai e le Fono Faitulafono ma sainia e le Kovana Sili le faaopoopoga o le lafoga e 2% i totogi uma lava o loo maua i Amerika Samoa, seia o’o mai ia Ianuari 1, 2012.

Na faamanino e Joseph i luma o le komiti e fa’apea, o le tupe lea sa tatau ona maua mai i le lafoga e 2% talu mai uluai masina o le tausaga na te’a nei, o le a fa’atoa tipi mai i le taimi e maua ai siaki o lafoga.

Na talu ona fa’amalosia le lafoga 2%, e tusa ma le $1.1 miliona sa mafai ona aoina, peitai na ta’ua e Joseph, afai ae mae’a ona ao ma le vaega tupe lea ua fa’amoemoe e tipi mai i siaki o lafoga toe fa’afoi, e ono o’o atu i le $1.6 miliona pe sili atu foi le tupe o le a fa’aopooopo i teugatupe a le malo, ae le’i fa’aopoopo i ai lafoga mai pisinisi tua ma kamupani.

Ae na saunoa Kovana Togiola Tulafono i luma o le Fono i le Aso Gafua o le vaiaso nei, o le tupe e tusa ma le $1.6 miliona lea sa maua mai i le lafoga lea, ua uma ona fa’aalu e totogi ai le aitalafu a le malo mai le tausaga tupe 2010.

Sa ia talosagaina foi le Fono ina ia toe silasila toto’a i se auala e mafai ai ona toe fa’aauau pea lea tulafono, ina ia mafai ai ona maua pea e le malo lea fesoasoani tau tupe.

Ina ua fesiligia nisi o tagata faigaluega a le malo i le aso ananafi e tusa ai o lea tulaga, sa fa’aalia ai e nisi o i latou lo latou faanoanoa, ona o lea foi o le a fa’aitiitia ai fua a latou siaki mo lafoga toe fa’afo’i, ae sa tatau lava i le malo ona tipi le tupe lenei i le tausaga na te’a nei.

“Aisea na le tipia ai e le malo le lafoga lea e 2% mai o matou totogi i le taimi na sainia ai lenei tulafono, a’o lenei ua faaputuputu ma le faamoemoe faatoa tipi pe a faila lafoga a tagata,?” o le fa’asea lea a le isi ali’i faigaluega a le malo, e le i mana’o e fa’alauiloa lona suafa.

Na ta’ua e le alii lea, o le to’atele o tagata faigaluega a le malo, ua tulimata’i uma le latou va’ai i le taimi e maua ai siaki mo lafoga, e fesoasoani ai i nisi foi mana’oga o aiga.

O se tasi o tina e galue i se tasi o fale’aiga i le taulaga sa ia fa’ailoa i le Samoa News e fa’apea, ina ua sainia lenei tulafono, e le gata sa tipi e lana kamupani lana lafoga e 2%, ae sa toe tipi atu ai ma le 2% mo masina amata o le tausaga, o le taimi nei, e leai se mea o le a faaitiitia ai fua le siaki o lana lafoga ona o lea ua maea ona tipi uma lana vaega mo le malo.

Na faamanino e Joseph i luma o le komiti e faapea, e tusa ma le $4 miliona le tupe e tatau ona maua e le malo mai le lafoga lenei e 2%, pe afai ae maea ona aoina, fuafua lea i le aofai o loo i ai le tupe o loo alu i totogi o tagata faigaluega uma lava i le teritori, lea e tusa ma le $200 miliona.

Talu ai le tele o lenei fesoasoani tau tupe mo le malo, na toe fautuaina ai e susuga Joseph le komiti ina ua fesiligia o ia, e tele atu le tupe e maua e le malo pe afai ae toe faaauau le tipiina o le lafoga e 2% mo le tausaga atoa lenei, nai lo le taofi ae pasia se isi lafoga fou.

Saunoa le alii faipule ia Vaamua Henry Sesepasara e faapea, o se tulaga faanoanoa la pe afai o le a faaitiitia siaki o lafoga a tagata faigaluega a le malo, ona o lea faatoa tipi ai i le taimi lea le lafoga e 2% sa tatau ona totogi i le tausaga na tea nei.

Na tomumu le isi tama e faigaluega i se vaega o Ofisa o le malo ma faapea lana saunoaga, e faigofie le tulafono pe ana faapea e faatino e le malo lana vaega, o le tipi lea o le lafoga mai totogi o tagata i le tausaga na tea nei, ae o le faatalitali seia oo i le taimi mulimuli, ua foliga mamafa ai le avega ona o lea o le a tele se vaega o siaki a tagata o le a aveese mai ai.

E ui o lea, na faafetai lea tama i le i ai lea o sona sao o loo tuuina atu mo le atina’eina o le malo, aemaise ai taimi pagatia e pei ona i ai le malo i le itu tau tupe i le taimi nei.