Ads by Google Ads by Google

E na o le $1.5 miliona ua taunu’u i le LBJ

Na faailoa e le pulega a le Falema’i o le LBJ i le Komiti a le Soifua Maloloina/LBJ a le Senate e faapea, mai le pili tupe e $3 miliona na pasia e le Fono ma sainia e le kovana mo le falema’i, e na o le $1.5 miliona ua uma ona totogi atu e le malo ma le faaupuga, se’i maua se isi tupe ona totogi faauma atu lea.

O lea molimau mai le Taitaifono o le Komiti Faafoe a le LBJ ia Moananu Va na teena e le Teutupe a le malo ia Magalei Logovi’i faapea, ua mafua ona le uma atu le tupe i le falemai ona o loo tau saili se tupe.

“O loo i ai le $4.6 miliona i totonu o le teugatupe lea e faatupe mai ai le pili e $3 miliona mo le falema’i, afai foi e manao nei le Senate e faauma nei le $1.5 miliona o loo totoe, e mafai ona ou faia nei lava, ae ina ia manino i le komiti, ou te le’i i ai i le taimi na sainia ai e le kovana ma le falemai le feagaiga e uiga i le tupe lea, ou te le malamalama foi i tuutuuga uma o le maliliega sa faia,” o le tali lea a Magalei.

Ae na toe saunoa Moananu e faapea, o le saunoaga a le alii kovana ina ua latou sainia le maliliega i le masina na tea nei, “O le a tuu mai le $1.5 miliona, ae a uma le tolu vaiaso ona toe totogi faauma mai lea sei maua se tupe.”

E lei lelei i finagalo o le taitaifono o le komiti a le Senate ia Galea’i Tuufuli ma afioga i Senatoa tulaga o le mataupu e pei ona vavao ai le falemai ma le malo e uiga i le tupe, ona o loo maualuga le talitonuga o le Senate, o loo lava le tupe i totonu o le Teugatupe o Taui mo Tagata Faigaluega sa fuafua e faatupe mai ai le tulafono lenei.

“O le a le uiga o lena tala se’i maua se tupe ona faauma atu lea o le isi $1.5 miliona,?” o le saunoaga lea a Galea’i agai i molimau.

O molimau e aofia ai Moananu Va, o le pule o le LBJ ia Michael Gerstenberger ma Magalei.

O se tasi o mataupu na tele i ai fesili a le komiti, o le aiaiga lea ua sainia e le kovana ma le falemai mo le $3 miliona, e ui o loo talitonu le Senate e leai ni aiaiga ma nisi lava lavelave na tuuina atu e le Fono ina ua latou pasia le tupe mo le falema’i, peita’i e atagia mai i tusitusiga sa faia i le taimi o le maliliega e i ai aiaiga faapitoa ua faia e le kovana

O nisi o ia aiaiga faapitoa e aofia ai le taofi o le tupe mai le tuuina atu i le falema’i pe afai e i ai se faaletonu i le faaaogaina ma le toe totogiina atu o le loan, faapea ai ma le tuuina atu lea o le tupe e maua mai i le lafoga e 2% i kuata ta’itasi, peitai sa pasia i le tulafono e ta’i masina lava ma tu’u atu le tupe.

Na fesili Senatoa Mauga Tasi Asuega ia Gerstenberger pe ua uma totogi uma atu e le malo tupe fesoasoani mo le falemai i le tausaga lenei, ae na tali le pulesili a le falemai, ua uma ona totogi uma atu tupe e oo mai i le masina o Fepuari, sei vagana ai lava tupe mai le tausaga tupe 2011 o loo nofo aitalafu ai pea le malo.

Fai mai Gerstenberger, i lalo o le tulafono, o le aso 5 o masina taitasi e tatau ona tuu atu ai e le malo le tupe ua faatulafonoina i teugatupe a le falemai, peitai na tali Magalei, e ui o loo manino le tulaga lea i le tulafono, peitai afai e oo atu i le aso 5 o le masina e na o le $15 le tupe o loo i totonu o teugatupe a le malo, o lona uiga e na o le pau lea o le tupe na te tuuina atu i le falemai.

Sa faailoa foi e Magalei i le komiti e faapea, e le aoga ona toe talanoa i tupe o le tausaga tupe 2011 ua te’a, ae sili ona talanoa i tupe o loo maua i le taimi lenei, aua e le o sona faaletonu na mafua ai ona le totogiina atu tupe ia i le falemai, ae ona ua leai lava se tupe a le malo

“E leai lava se tagata faigaluega a le malo e le mana’o ia maua pea sana siaki, e oo lava foi ia te outou Senatoa, tou te mananao uma lava ia maua atu pea a outou siaki, e faapena fo’i a’u,” o le saunoaga lea a Magalei.

Na oo suesuega a le komiti i nisi o mataupu ma tautua a le falema’i e aofia ai le polokalame lea e auina atu ai tagata i fafo mo togafitiga, le Off Island Referral Program, pe o faapefea mai le polokalame lea i le taimi nei.

Na taua e Gerstenberger e faapea, o le polokalame lenei na amata taofia mai i le 2008 ina ua leai se tupe e faatupe ai, ma o aso uma lava e talanoa ai le pulega a le falemai i auala e mafai ai ona fesoasoani i tagata o loo sili ona tigaina ma manaomia togafitiga mo latou gasegase.

O nisi o tagata e pei ona taua e le pulesili i lana molimau ua maliliu a’o tau faatalitali ai se tupe e auina atu ai i fafo mo togafitiga.

O se pili tupe e $8 miliona na faaulu e le kovana i le fono i le masina na tea nei, e fesoasoani e faatupe ai le polokalame lenei na teena e le Senate i le taeao ananafi.