Ads by Google Ads by Google

E le o le Faletupe o Atina’e mafua’aga tuai o galuega

O le tele o fale o lo o fausia i lalo o le polokalama feterale o le 1602, a le Faletupe o Atina’e, ua toeitiiti lava mae’a, e pei ona taua i le molimau a le alii Peresetene o le Faletupe i luma o le Komiti o le Faagaioiga o le malo, a le Maota o Sui i le vaiaso na tea nei.

Na taua e le tofa Lolo Moliga e fa’apea, pe tusa ma le 70% o ia galuega ua mae’a, fa’atasi ai ma le silia i le 30% o galuega, ua toe tai 2 masina ona faamae’aina lea.  Ae se’i vagana ni galuega pe a ma le tolu i le fa, o lo o fuafua e fa’amaea ae e le’i o’o i le aso 31 o Tesema 2012.

Saunoa Lolo, e le o le faletupe lea e mafua ai ona taofia nisi o galuega, po o le tuai ona fa’amae’a o nisi galuega, ae e mafua mai lava i le tagata e ana le galuega, ona ua i ai nisi o fa’aopoopoga ua ia manatu e toe fai, ma atili ai lava ona tosotoso i tua le taimi e tatau ona maea ai le galuega.

I lana uluai folasaga, na ia taua ai e faapea, o le polokalama o le 1602 o lo o faatupe mai e le feterale i le aofai e $30,778,499, ma o lea vaega tupe ua mae’a ona tufatufa ma fa’asoa atu i tagata sa tusi talosaga atu i le polokalama.

I se ripoti na tu’uina atu e Lolo i luma o le komiti, o lo o taua, e toa 132 tagata ua faamanuiaina i le polokalama. E le i faailoa mai ai le aofai o le tupe sa nono atu i tagata taitoatasi, ae o nisi o i latou o lo o i ai o latou suafa i le lisi, e aofia ai tagata faipisinisi, o sui o le kapeneta a le kovana, faapea ai ma ni faipule o le maota o sui.

Na fesiligia e le alii faipule ia Larry Sanitoa ia le mafuaaga ua ala ai ona le mae’a nisi o galuega, lea e pei ona vaaia nisi o fale fou ua na o le tu tu, pe faamata o le tupe le isi mafuaaga ua ala ai ona le maea ia galuega.

Saunoa Lolo, e le tuuaia le faletupe i le taofia lea o nisi o galuega poo le tuai foi ona maea, ae tuuaia lava le tagata e ana ia le galuega.

Ina ua sainia le feagaiga i le va o le tagata e ana ia le galuega ma le faletupe, na taua ai le totogiina atu lea e le faletupe o le 85% mo le tau o le galuega, ae o le 15% e totogi e le tagata.

Fai mai Lolo, afai la ua maea le tupe sa tuuina atu e le polokalama, o le vaega o le galuega o lo o totoe, e tatau ona faatupe e le tagata e ana ia le galuega. Afai foi sa i ai nisi vaega sa toe faaopoopo i le ata o le fale, o vaega ia e tatau ona faatupe e le tagata.

Sa ia faamaonia i luma o le komiti, le i ai o ni fale ua maea ona fausia ma ua nonofo mautotogi ai foi tagata e maualalo le tupe maua, ae o nisi fale o lo o faatali le ASPA mo le tosoina o moli ma faauma nisi o galuega laiti.

O ripoti ua salalau solo i le atunuu faapea ua mafua ona tu tu nisi o fale ua le maea ona ua leai se tupe, na saunoa i ai Lolo e faapea, e le sa’o ia faamatalaga ona o lea ua maea ona faasoasoa atu le tupe atoa sa tuuina mai e le feterale mo le polokalama.

Sa ia faamanino foi i luma o le komiti e faapea, e le mafai ona so’ona tala mai i tua e le Faletupe se vaega tupe ma talia se talosaga, sei vagana ua faamaonia mai e le Faletupe a le malo tele vaega uma e manaomia mo se talosaga.

Sa ia taua foi i luma o le komiti, o lo o mama le polokalama mai le tele o tuuaiga e pei ona salalau solo i le atunuu.