Ads by Google Ads by Google

E le o aafia le Tri Marine i tulafono fou a le malo feterale i tulaga o faiga faiva

Ua faamaonia mai e le sui sooupu o le kamupani a le Tri Marine ia Dan Sullivan e faapea, e le o aafia le latou kamupani i ni isi o tulafono ua tuuina atu e le malo feterale i auala e faatino ai lana auaunaga i tulaga e pei o le teuina ma le fagotaina o i’a mo le gaosia o ana oloa o lo o auina atu i maketi i fafo.

 

O ni isi o ia tulafono fou e aofia ai le faaaoga o auala e faasao ai le i’a o le tafolå (dolphin) mai le fagotaina i taimi e fagota ai e vaa fagota le tuna mo le gaosia o apa meaai o lo o auina atu i maketi i fafo.

 

I le vaiaso na te’a nei na faaalia ai e ni isi o kamupani i’a tetele se tolu i totonu o le malo o Amerika e pei o le StarKist Co, Bumble Bee Foods, LLC ma le Chicken of the Sea International, ona o le tulafono fou na faamatuu mai e le Vaega o Faiga Faiva i luga o le sami, (U.S National Marine Fishery Services) i le tatau lea ona faailoa i faamaumauga o fagotaga ituaiga i’a o lo o maua mai e vaa fagota, ina ia mautinoa ai e le o fagotaina ai ma le i’a o le tafolå (dolphin).

 

“O le tulafono fou lea ua tuuina mai e le malo feterale mo kamupani i’a uma lava i totonu o Amerika, e le o aafia ai le kamupani a le Tri Marine e pei ona faatinoina ai lana tautua i totonu o Amerika Samoa,” o le saunoaga lea a Sullivan.

 

Ina ua fesiligia e le Samoa News ituaiga kamupani o lo o aafia i le tulafono lenei na taua ai e Sullivan e faapea, “o kamupani uma lava o lo o latou gaosiina taumafa e maua mai i le i’a o le tuna, e tatau ona faamaonia latou te le o faaaogaina le ituaiga i’a o le tafolå, e pei ona taua i le teuteuga fou o le tulafono a le feterale ua tuuina mai.”

 

E pei ona silafia, o le Tri Marine lea ua latou faaaogaina le nofoaga tuai sa i ai le kamupani i’a ua tapunia nei o le COS Samoa Packing i Atuu, ma ua faamoemoe o le tausaga fou e tatalaina ai la latou lala fou lea, i lalo o le faatautaiga a le isi ona lala e taua o le Samoa Tuna Processor Inc.

 

Pau le isi vaega taua o le a faamautuina ai le faaauau o le tautua fou a le Samoa Tuna Processor Inc, o le talia lea e le vaega a le U.S Army Corps of Engineer o le talosaga mo se pemita latou te toe fausia ai vaega o sima o lo o siomia ai le kamupani ua amata ona solo i lalo.

 

Ina ua fesiligia Sullivan i le tulaga ua i ai la latou galuega lea sa ia taua ai e faapea, o lo  o latou galulue soosoo tauau pea le Vaega o Inisinia a le U.S Army Corps mo le taliaina o le latou talosaga, ma o lo o i ai le faamoemoe e tatau ona talia i le masina fou lea talosaga.

 

O le masina na te’a nei na tatala aloaia ai le faleaisa a le kamupani lea ua faamoemoe e teu i ai i’a pe a maua mai e vaa fagota, ma le faamoemoe ia fesoasoani i le faaleleia atili o le tautua a le kamupani mo le gaoisina lea o taumafa i totonu o le atunuu