Ads by Google Ads by Google

E le fou fa'afitauli fetaia'i pea ma pasese Lady Naomi

Na taua e le afioga i le tama'ita'i faipule ia Vui Florence Saulo e fa'apea, o le fa'afitauli e pei ona tula'i mai i le tuai lea ona kilia le pasese a le va'a mai Samoa, le Lady Naomi i le vaiaso na te'a nei, e le o se fa'afitauli fou, ae o se fa'afitauli ua tele tausaga o tula'i mai pea e aunoa ma le faia i ai o se fa'aiuga e foia ai.

 

O le vaiaso nei na tu'uina atu ai se tusi mai le afioga a Vui, o ia fo'i lea o le Ta'ita'ifono o le Komiti o Mataupu tau Tulafono a le maota o sui, i le Loia Sili a le malo ia Talauega Eleasalo Ale, e fa'ailoa i ai lona fa'anoanoa tele ona o le fa'aletonu na tula'i mai i le aso Tofi na te'a nei, ina ua tuai ona kilia le pasese a le Lady Naomi ina ua taunu'u mai i lana malaga mai Samoa, ma tula'i mai ai ni nai fa'afitauli laiti, e le gata i le va o tagata faigaluega a le malo, ae o fa'aupuga na lafo e ni isi o tama matutua o le pasese, e mafua mai i le le fiafia i le tuai lea ona kilia le va'a.

 

O lenei mataupu na ripoti e le Samoa News i le aso Faraile atoa ai ma le aso To'ona'i na te'a nei.

 

Talu ai o le loia sili o lo o avea ma pule o le Ofisa o Femalagaaiga i le taimi nei, o le mafua'aga lea na tu'uina atu ai e Vui lana tusi ia te ia, ina ia maua ai sona finagalo e tusa ai o lenei mataupu.

 

"E pei ona e silafia, o le mataupu e fa'atatau i le tuai lea ona kilia le pasese a le Lady Naomi, e le o se mataupu e fou, ae ou te iloa ma talitonu, o le a avea le tofia o oe e fa'auluulu i ai le Ofisa o Femalagaaiga ma auala o le a mafai ai ona maua se fofo o lenei fa'afitauli", o se vaega lea o le tusi a Vui.

 

Na taua fo'i e Vui ni isi o saunoaga mai sui o le pasese ina ua tupu lagona ita ma le le fiafia, i le tuai lea ona kilia le va'a ae ua silia ma le itula talu ona taunu'u le va'a i le uafu.

 

Na taua e se tasi o tama matua e le i finagalo e fa'ailoa lona suafa e fa'apea, e le tatau i le faigamalo a Amerika Samoa aemaise lava i le Ofisa o Femalagaaiga ona fai fa'apea tagata mai Samoa, e le o i latou o ni manu, ae o tupu ma tamali'i, o matua fo'i e fa'apelepele i ai isi fanau e pei fo'i o matua ma fanau i Amerika Samoa nei.

 

Na taua e Vui e fa'apea, i aso ua mavae, e fa'atali lava pisinisi ma faleoloa se'i tatala ofisa o le malo ona fa'atoa tatala fo'i lea o le latou tautua, e faapena fo'i pe a taunu'u le Lady Naomi mai Samoa i le ta o le 6:00, e fa'atali lava se'i loga e tatala le malo i le 7:30 po o le 8:00 fo'i ona fa'atoa kilia lea o le va'a.

 

Na taua e Vui e fa'apea, i lona talitonuga, e le talafeagai lea faiga, o se tulaga fo'i e lagona ai le fa'anoanoa i lona mafaufau.

 

"O passe nei, sa malaga mai i le po atoa, sautia i luga o le va'a ma maluluina ao malaga mai i le po mai Samoa, pau le la'asaga mulimuli o lo o latou fa'atali ai pe a taunu'u mai i le atunu'u, o le toe fa'atali mo le isi lua itula e fa'atali ai le taimi e kilia ai le pasese a le va'a", o le saunoaga lea a Vui.

 

Sa taua fo'i e le tama'ita'i faipule e fa'apea, o i latou nei o tama ma tina matutua, o fafine fo'i ma fanau laiti, pau le itu o lo o faanaunau i ai latou, o le fia taunu'u o le va'a ae o loa e vaai ma feiloa'i ma latou aiga, ma fai sina malologa ua alu le po o sautia i luga o le vasa, ae le o le toe fa'atali se i ta le 9:00 ona fa'atoa kilia lea o le pasese o le va'a, i le taimi e taunu'u ai sui o le Ofisa o Femalagaaiga.

 

Na taua e Vui e fa'apea, i le avea ai o ia ma tagatanuu o Amerika Samoa, ae o se sui fo'i o le Fono Faitulafono, e lagoa lona fa'anoanoa ina ua ia mautinoa o lenei fa'afitauli o se mea ua masani ai le malo o Amerika Samoa, ae i lona talitonuga, e tatau i ta'ita'i o le atunu'u ma le malo ona tutu fa'atasi e saili se fofo o lenei fa'afitauli.

 

Na fa'aiu le tusi a Vui ia Talauega i lona talosagaina lea o le loia sili, e fia vaai i se fofo o lenei fa'afitauli, ina ia mafai ai ona foia le toe tula'i mai o lenei fa'afitauil i lumana'i.