E ui o lea ua taoto atu i le kovana sili se talosaga a nisi o le au ave taxi, ina ia taofi le tulafono e faasa ai ona toe faaaoga tint i tioata o ta’avale la’upasese, peitai na taua e le Komesina o Leoleo e faapea, e iloa gofie lava le tagata amio leaga e tint lana taavale.

O le saunoaga lea a Tuaolo M. Fruean i le taimi na faapaia ai le vaa fou a le Matagaluega o Leoleo i le vaiaso nei, e tali atu ai i faasea mai nisi o ave taxi e faatatau i le tulafono lea ua faasa ai ona toe faaaoga tint i tioata o a latou taavale la’upasese.

Na faailoa e Tuaolo ia Togiola e faapea, sa ia faalogo i le isi taeao o faasea se ave taxi e faatatau i tint, ma faapea lana tala, o a latou meatotino ia o le a aveesea pe afai e taofi le faaaogaina o tint.

“Oi, afai la tou te manana’o i le tint ae faafefea ona siaki e leoleo outou poo fusi a outou fusipa’u pe afai e tint uma tioata o a outou taavale,?” o le saunoaga tuu sa’o lea a Tuaolo i ave taxi o loo faasea.

“Aisea e mana’o ai fua e tint,?” o le saunoaga lea a le tofa Tuaolo. “E iloa gofie lava tagata amio leaga e tint a latou taavale, ae o le tagata amio lelei ia e faamalamalama lana faamalama,” o le isi lea saunoaga a Tuaolo.

Na faailoa e nisi o le au fai taxi i luga o le polokalame a le kovana i le lua vaiaso talu ai e  faapea, e mafua ona latou naunau e faatint tioata o a latou taavale, leaga e fesoasoani le tint e faamalu ai le ea i aso mugala, e le gata foi i lea, o le tint e faaaoga e isi ave taxi e teuteu ai a latou taavale faamanaia.

Ae na taua e Togiola i lana tali i le au fai taxi na valaau atu i lana polokalame, e tele mafuaaga e ala ai ona naunau le malo e taofi le ituaiga tint lea ua ova le pogisa, leaga e fia iloa foi e le malo mea o loo fai i totonu o le tint.

Ae na saunoa Tuaolo e faapea, “o le isi mafuaga e ala ai ona aveese tint, ina ia manino i le vaai a le leoleo o loo fusi le fusipa’u a le ave taxi.

Fai mai Tuaolo, o lana manulauti talu ona tofia o ia e fai ma Komesina o Leoleo, ia usita’i i le tulafono ma tausisi i ai.

“O le faamaoniga o la’u tala lea, talu lava ona avea a’u ma komesina o leoleo, ou te le iloa pe ua ou tatalaina i tua se tagata ua avatu e loka i tai i le falepuipui,” o le saunoaga lea a Tuaolo.

“Ua toatele tagata e o atu ia te a’u ma talosaga atu se’i tatala i tua pai ma lafai, ae tasi lava la’u tala e fai i ai, o le galuega a Tuaolo ma leoleo o le loka o le tagata, ae o le galuega a le faamasinoga o le tatala i tua o le tagata,” o le isi lea saunoaga a Tuaolo.

Fai mai Tuaolo, afai e mulimulita’i ma usitai tagata uma i le tulafono, o le manuia fo’i lena o le malo.