Ua malaga a’e i luga le mea lea! Ioe le mafaufau ua tatau ona fa’asa’o, aua ua amata ona tigaina au’upega a le taua a nisi o tama’ita’i, ae le o maua tonu e i latou le tamaoaiga o lo’o totogia! Talofa la, aua o lea e va’ai atu, sa oso fo’i i’inei lea faiga, ma ua mae’a ona fa’ao’o i a’ao o leoleo a le Malo Tele, ma ua mae’a fa’asalaina nisi i lenei mea, ae o lea fa’ato’a maoga a’e i luga i Samoa, ae foliga mai ua leva ona fai ai!

Ia o le fa’amasinoga ua fa’aauau nei, e leai se tasi e toe faia sona loto, e o’o mai lava le a’ao malosi o le tulafono e fa’asa’o mea fa’apenei. Pau o le mea, o le ave o nei fanau, e siaki lelei, ma toe fa’amama ona fa’ato’a toe tu’u ai lea e savalivali solo, aua o ai na ia iloa, e sese atu fo’i i ai nisi ae o i latou fo’i ua sipoki lelei i na ituaiga o faiga.

O le masalosaloga o Toso, pe ana fai e maua sa’o e ia le tamaoa’iga, ailoga lava e toe pisa, e fai fai ai lava ua manaia. E lua itu o le tupe, e tatau ona va’ai uma i nei itu e lua, fa’ato’a faia ai se fa’ai’uga a i ta’ua.

Se’i va’ai toto’a Pe o Tutusa Tagata Uma?

Ua ta fiu e tau fuafua i lota mafaufau, pe aisea ua tele na’ua ai le tupe e faia ai pepa fanau o lata fanau fai, ae ua alu tausaga ma tausaga o saili se tupe ia lava e fa’atino ai lea auaunaga. Peita’i, o le mea e ofo ai, e nofonofo lava le aiga tua’oi ma le latou pepe na maua mai le fafine o le latou aiga e te’i lava ua lapo’a, ae tete’i fo’i matou ua toe meli atu ae le’i atoa se masina i fafo, ma le tala ua mae’a ona faia pepa!

O lo’u sui ua sau lo’u le fiafia, vala’au atu loa i le vaega lea e tatoso latou pa, ae aua le pisa, pe aisea? O le tali lenei na ‘aumai. Ua moni lau fa’asea, ae ou te fesiligia oe, “Na fai mai e a le tusi e tusa ai o mea nei o fanau? Ioe, fai mai aua e te mana’o fua i le atali’i po’o le afafine o le lua te tuaoi. Ua uma lava si au fanau, gata ai i’ina si ou mana’o, to’aga e a’oa’o i latou ma e saofa’i lelei, toeititi fua mai le niu a tamaiti e fiu e fai lena ma o tamaiti. Masalosalo lava fo’i Toso, ai lava o nei mea o penefiti e mafua ai ona e saili tamaiti ma la’u i fafo! Sole o le faigaluega sa’o lava ma ‘ai si ou afu, e maua ai le tonu.”

O le tala i le tamaititi a lou aiga tuaoi, ‘ia soia le va’ava’ai vale fua, e fiu lava le amio leaga e sola, ae tulituligia lava ma toe fa’aletonu mai. Ai o lena tamaititi ua na’o na fai lava o le maliliega e tausia ai, ae le’i fa’amae’aina pepa uma e liliu ai, fua i le vave, ae afai ua sa’o lau masalo, sole, tate ofo i le le popoi, o le ofisa lea, e o’o lava i la’u fanau na fanaua ma le tiga mai lota manava, ua silia ma le 18 tausaga, ua ou alu atu e talosaga se pepa fanau, ua le mafai, na matua pa ai lava si o’u va’a!

Aisea? O mea nei na ou finau ita ai! O la’u tama e le’i fafagaina lava i se uiki mai lona pepe se’ia ma tete’a ua malaga atu i vaega au. Lua e le’i ‘ai fo’i i le Food Stamp e mafai ai ona fa’apea se isi e agava’a ai i le va’ava’aiga lea ua i ai nei, ina ne’i ou tago e fai lona pepa e talosaga ai se tasi.

O nai a’u lava tupe sa saili i lota valea a lota tigaina e savali solo  na fafaga ai le fanau, ae o lea ua se’ia fa’atama a manu si a’u aia tatau mai la’u fanau!

Fesili loa ma lo’u tagata vaivai ma le taumafai, “Afai e tutupu mai mea matuia i le olaga o le fanau, e tali le malo i ai, pe tali pea la i ai le matua lea ua leai sa’u aia i lona pepa fanau?” E foliga mai e le faigofie ia te a’u na ou talia le ma ua i ai, ae fesiligia lemalo i le o’o fua o pepa fanau i lalo i le matagaluega o le Homeland Security, o le tali mai, “Leaga ua to’atele i latou ua o mai avatu pepa fanau apalai ai pepa o isi ma fai ai solitulafono matuia!”

I si o’u tina vaivai, e le o’o lota valea i lena mea, “a a’afia le tagata ua e avea i ai le pepa fanau, ae toso ai fo’i ma si ou alo lea e matua leai lava ma sana mea o fai i launa ua e sailia!”