Ads by Google Ads by Google

E “Facebook” pagota ae fa’atoese ai le Sui Komesina

Na fa’amaualalo le Sui Komesina o le Matagaluega o Leoleo i luma o le Komiti o le Puipuiga o le Saogalemu a le Senate i le taeao ananafi, e fai ai o ia ma sui o le Komesina ma le Matagaluega o Leoleo, ona o le mataupu e fa’atatau i pagota ia na maua o faia a latou pu’ega ata ma tu’u i luga o feso’otaiga tau initaneti, e taua o le “facebook”.

O le iloiloga lea na faia i le taeao ananafi i luma o le Senate, na mafua ai ina ua salalau ripoti fa’asaga i ni pagota o lo o tuli ni a latou fa’asalaga i le to’ese, ae sa molimauina ni a latou pu’ega ata i luga o le facebook, atoa ai ma ni fa’aupuga e pei ona molimauina i le tausaga na tea nei.

Ina ua fesiligia e le komitia na saunoa ai le Sui Komesina ia Leseiau Laumoli, o le faafitauli e pei ona tulai mai i le toese, na mafua mai i le faatamala o leoleo i le faatinoina o latou tiute.

“Ou te faamalulu atu i le mamalu o le komiti ona o le faaletonu e pei ona tulai mai i le toese, o le mea moni, ua le atoatoa le faatinoina o galuega a i latou o loo pulea le toese i Tafuna, ma mafua ai loa ona tulai mai le faafitauli ina ua oo atu le laptop i totonu o le toese ma faaaoga ai e se tasi o pagota,” o le saunoaga lea a Laumoli a’o la nonofo faatasi ai ma le pule o le toese i luga o le nofoa molimau, tofa Lt. Lesa Lumana’i Maifea.

E tusa ai o le molimau a Leseiau na ia taua ai e faapea, ua toeitiiti lava maea le  suesuega a le Matagaluega o Leoleo e uiga i le mataupu lenei, ma ua i lalo foi o le vaavaaiga a leoleo le laptop lea na faaaoga e pagota e faasalalau ai ata ma faaupuga i luga o le ‘facebook’.

Sa ia taua, afai ae mae’a le suesuega o lo o fa’agasolo a leoleo e uiga i le mafua’aga na o’o ai le laptop lenei i totonu o le to’ese, ona toe fa’afoi lea o le laptop a le aiga e ana.

Ina ua fesiligia e Senatoa Paogofie Fiaigoa le pule o le falepuipui poo fea le nuu o le pagota lea na maua i ai le laptop, na tali Lesa, o le Vaitogi.

Ina ua fesiligia e le komiti pe na fa’apefea ona taunuu le laptop i pagota, ae na fa’apefea foi ona iloa e leoleo le mea sa tupu, na saunoa ai Lesa e faapea, o le aso 16 Novema 2011 na telefoni atu ai se leoleo ia te ia e faailoa atu ni ata o ni alii pagota o loo i luga o le ‘facebook’.

Na taua e Lesa lona faatonuina o le leoleo e ta’u atu igoa o pagota ia o loo i ai o latou ata i luga o le facebook, ina ia mafai ai ona fai se gaioiga a lona ofisa.

“O le taimi lava na matu maua ai le igoa o le pagota lea, sa ou faatonuina ai loa lo’u ofisa e saili le sela lea o loo loka ai le alii lea, ma maua atu ai loa le laptop e pei ona taua,” o le saunoaga lea a Lesa, faatasi ai ma le isi ana molimau, e na o le tasi lava le laptop na maua i totonu o le toese i le taimi lea, e ui e le’i faia se asiasiga mo le falepuipui atoa ina ua tula’i mai lea faalavelave.

E talitonu afioga i Senatoa, ua mafua ona sao le laptop i totonu o le toese o le faamatala o le pule o le falepuipui ma lana taupulega.

Saunoa Senatoa Alo Dr. Paul Stevenson e faapea, e ui o le faatamala o le matagaluega i le faatinoina o latou tiute ua mafua ai le faaletonu, peitai o faafitauli lava foi nei o loo tulai mai i isi vaega o le malo.

Sa ia faafetaia le Sui Komesina ma le pule o le toese e tusa ai ma galuega lelei o loo fai mo le atunuu, peitai e i ai lona talitonuga e tatau lava ona siitia i luga le faatinoina o galuega aua e i ai le talitonuga e mafua  mai lava i totonu o le lotoifale o le toese le mafuaaga o lenei faafitauli.

Saunoa Leseiau, e anoanoa’i faafitauli o loo mafua ai ona tutupu faalavelave i totonu o le toese, ma o nisi o ia faafitauli e aofia ai le le lava o le aufaigaluega, faaletonu fale o loo loka ai pagota, aemaise ai e le o lelei le nofoaga o loo tu ai le toese, e le gata i le latalata i nofoaga e toatele tagata e nonofo ai, ae faapea ai ma le alatele, aua e mafai lava ona alu atu se tagata ma togi atu se mea i totonu o le falepuipui, ona mafai lea e pagota ona faaaoga.

I le faaiuga o le iloiloga, ua talosagaina ai loa e le komiti se ripoti mai le matagaluega o Leoleo, e faailoa atu ai faafitauli ma tulaga faaletonu uma o loo feagai ma le matagaluega, ae o a foi auala ua latou manatu o loo mafua ai ia faafitauli.

O le faanaunauga o afioga i Senatoa, ia mafai ona ofo atu e le Fono se auala e fesoasoani ai i le matagaluega o leoleo ma le latou tautua mo le atunuu.