Aloaia Ofisa Aoga faiaoga ua ausia tulaga maoa’e

O le po o le Aso Faraile na te’a nei na faia ai se sauniga faapitoa a le Matagaluega o Aoga a le malo, e aloaia ai ni alii ma tamaitai faiaoga ua avea ma Faiaoga o le Tausaga 2012-2013.

O se sauniga na faatumulia i le mamalu o alii ma tamaitai faiaoga o aoga eseese i le atunuu, uo ma aiga, faapea ai sui o le malo.

O faailoga na tufatufaina i lea po, e le gata sa aloaia ai faiaoga uma sa filifilia mai i Aoga Maualululuga ma Aoga Tulaga Muamua e avea ma faiaoga o le tausaga 2013, ae na aloaia ai foi ma le faiaoga ua filifilia e avea ma faiaoga o le teritori, o le susuga lea ia Iose Muasau Afu, mai le Aoga Maualuga i Tafuna.

O se sauniga lotu puupuu na saunia e le susuga Rev. Ssemo Tapaleo mai le Ekalesia EFKAS i Aoloau na tatalaina ai lenei faamoemoe, ma sosoo ma le saunoaga autu o le po mai le Faatonusili le Tumau o le Matagaluega o Aoga, Dr. Jacinta Galea’i, e fai ai o ia ma sui o le Loia Sili o lo o avea ma Kovana le Tumau e le’i faatasi atu i lea faamoemoe.

O le autu o le faamoemoe e pei ona lomia i le polokalama o lea po, o lo o taua ai fuaitau e faapenei, “Faiaoga, fagota i le tai loloto e manuia ai ou faiva.”

Na taua e le tamaitai foma’i ia Dr. Galea’i i lana saunoaga e faapea, o le galuega faa faiaoga e le o se galuega e faigofie, ma e mafua lea tulaga ona e talitonu Dr. Galea’i, e le o potu aoga uma e fou, o isi potu e maua le ea malulu ao isi potu e leai.

“E i ai vasega e na o le toa 10 tamaiti ao isi vasega e au lava i luga i le 40 tama ma teine, o isi tamaiti e usitai ao isi e tele le taimi a le faiaoga e ta aoai ai le amio, e eseese foi tulaga e i ai tamaiti aua o isi tamaiti e lelei le faitau ma le tusitusi ao isi e vaivai lava le tulaga o lo o i ai, ae o le luitau lena i faiaoga, ia saili ni auala eseese e aoao uma ai tama ma tine aoga,” o le saunoaga lea a Dr. Jacinta.

Na taua e Dr. Galeai e faapea, e iloa gofie le faiaoga e alualu i luma lana taumafai o le faiaoga lena o lo o naunau i lana galuega.

“O le faiaoga faamaoni, e lava le tomai i le galuega, e fiafia foi i lenei galuega, o le faiaoga lena e vaaia le alualu i luga o togi o lana vasega, o isi faiaoga e feololo, atonu e fou ma o lo o taumafai lava ina ia maua se laasaga fou i le tomai mo alo ma fanau, ao isi faiaoga, o le tala moni lava, e le lelei, atonu o taleni ua tuuina atu ia i latou e le o le faa faiaoga, ae ese le galuega e tatau ona i ai,” o le saunoaga lea a Dr. Galeai.

Na maea le saunoaga faalauaitele a le tamaitai fomai, ona agai lea o lana faafetai faapitoa i faiaoga ua filifilia e avea ma faiaoga mo le teritori i le tausaga.

Saunoa Dr. Galeai, e ui ua faapitoa lea faamoemoe mo faiaoga o le teritori i le tausaga, ae o le faafetai e momoli i faiaoga uma lava i totonu o le Matagaluega o Aoga, i lo latou faamaoni lea i le aoaoina o fanau aoga a le atunuu, ma ua vaaia lo latou faamaoni ma le fiafia e aoao fanau a le atunuu.

Fai mai Dr. Galeai, afai ae popoto fanau aoga e le gata e manuia ai aiga, malosi le malo toe manuia ai ma le tamaoaiga o Tutuila ma Manu’a.

“Ae afai ae le popoto fanau aoga, o le a le tulaga manuia le lumana’i o Amerika Samoa, e le manuia fo’i le lumana’i o alo ma fanau a le atunuu,” o le isi lea saunoaga a Dr. Galeai.

Na faafetaia e le susuga ia Iose le filifilia o ia e fai ma faiaoga o le teritori mo le tausaga, ma ua sauni foi e ofo atu lona malosi ma le atamai e aoao ai fanau a le atunuu, ina ia o latou maua se lumanai manuia.

O i latou na filifilia e avea ma faiaoga o le tausaga 2012-2013 e aofia ai le susuga ia Iose lea ua filifilia e avea ma faiaoga o le teritori mo vaega o Aoga Maualuluga; o Ulualo L. Tautala mai Laulii Elementary ua fai ma sui o Aoga Tulaga Muamua, ma Faatulia F. Sione mai Masefau ECE ua avea ma sui o aoga ECE uma i le atunuu.

O isi faiaoga sa faapaleina i faailoga i lea po mai Aoga Tulaga Muamua e aofia ai Pamata VonDinklage mai Alofau; Larry Gutu mai Masefau; Lisa Vaivao-Ino mai Matafao; Maxine Salevao mai Faleasao; Mine Taufetee mai Leone; Faalili Potasi Leulua’i mai Ofu/Olosega; Cora T. Afalava Soosemea mai Siliaga; Siaea Osa mai Tafuna ma Douglas Calvin Berquist mai le Aoga Maualuga a Leone