Ua ‘ausia fo’i e se tasi o fanau a Alo o Amerika Samoa se isi matati’a fou i le fa’agatama o le Pesipolo, ma o se mea ua fa’afiafiaina atoa ai le Auaiga Sa Tuioti i Aoloau, Amerika Samoa.

“O lenei tama o Brandon o le ulumatua lea o le fanau a Liuneta [Netta] Tuioti Smith i Irvine Los Angeles, Kalefonia.”

O se mea na fa’ate’ia ai le ‘auaiga uma i Aoloau, o lo’o sauni le uso ma le aiga i le fa’au’uga o lenei tama tino malosi o Brandon e faia i le aso 20 Iuni, 2012.

“O se mea lelei o fanau ae i’u lelei o latou olaga i fa’amanuiaga mai le Atua e ala i taleni ua fa’au’upegaina ai i le soifuaga o tauvaga i ta’aloga fa’apei ona maua ai nei tala fiafia.” O se fa’amama’i lea a le faletua o Aufata Lavata’i o Nu’uuli ma Aoloau,  i le taumafaiga a le tama matua a si ona uso o Liuneta Tuioti Smith.

O Netta Tuioti Smith, le tina o Brandon na avea o se tasi o le vasega fa’au’u mai Leone High School i le tausaga 1978, ma ua avea fo’i nai ona alo, o ni fa’amanuiaga ma se fa’aeaga o le tatou atunu’u. O Liuneta Tuoti o lo’o ua mae’a fa’aipoipo atu i le ali’i o Neil Smith o Irvine, ma o lo’o soifua uma ai i latou i lea a’ai e o’o mai i le taimi nei.

O le a’oga maualuga i Woodbridge lea sa ta’alo ma a’oa’oina ai Brandon ma ua tele ona maka lelei i lona soifua ta’alo mo lana a’oga i le ta’aloga o le Baseball i lana ‘au ua fa’aigoaina o le Warriors. Ua fa’ailoa mai o le Washington Nationals lea ua latou filifilia nei o ia e avea ma se latou piki lona 15 i lenei tausaga mo le latou ‘au pesipolo fa’apolofesa.

Peita’i, e toe 15 aso o lo’o totoe, e faia ai le fa’ai’uga a Brandon pe mata e na te ‘avea le ofo a le Washington Nationals pe o le a fa’aauau ana a’oa’oga i le Iunivesite o Grand Canyon ma fa’aauau pea ona ta’alo i le au Pesipolo a lea Iunivesite, i le ta’ita’iga a le ali’i faia’oga o Andy Stankiewicz.

I sona lagona fa’aalia ua lomia lea i le nusipepa a le “Orange County Register” ua ia fa’ailoa ai, “Afai e mae’a ona ou fa’au’u ia Iuni 20, ona toe lea o le masina e ao ina faia ai la’u fa’ai’uga, peita’i, afai ou te sainia le feagaiga lea ma Washington Nationals, o lona uiga ou te alu lava na’o o a’u ou te nofo i Orlando ma ta’alo Pesipolo lava i aso uma, peita’i, e ao lava ina mua’i talanoa lelei a’u ma o’u matua i se la’ua fo’i fautuaga mo a’u.”

O le ‘au na ta’alo ai Brandon Tuioti Smith o le Warriors a Woodbridge ma o le ‘au lea na siamupini i le tausaga e 2011. O le matua lelei fo’i o fa’amatalaga na fa’ailoa mai e le fa’atonu ma le faia’oga o lea ‘au i le vaega fa’asalalau a lea a’ai, e tusa ai o le soifua tauva o Brandon i le Pesipolo i lona tausaga mulimuli lenei.

Ua fa’ailoa mai ana fa’amaumauga e fa’apea: O ana ta e .429 ma ana steals e 21 ma ua tu’uina ai o ia i le 2.95 ERA i taimi e 9 na ta ai.

Ua i ai lona avanoa mo le Iunivesite o Grand Canyon peita’i o lo’o i ai fo’i ana sikolasipi mai le Long Beach State ma Sacramento State. Ua fa’ailoa mai, o lo’o una’i mai fo’i se avanoa mo lea alo o le atunu’u e le UC Santa Barbara ma Loyola Marymount.

E ui ina tele nai avanoa matagofie mo lea alo, peita’i, ua iloga mai le tula’i ese o lea avanoa mai le Washington Nationals, ua iloa patino ai fo’i, ua mae’a sailiga ma ua iloa moni e le to’atele o fa’atonu ma faia’oga o le Pesipolo fa’apolofesa, o lo’o i ai se iloa maoa’e o Brandon Smith i le ta’aloga lea.

Ua mae’a ta’alo Brandon i le Dodger Stadium i lona tausaga o se Junior i lana a’oga maualuga, ma ua soso’o mai ma lona tausaga fa’aiu i le a’ogamaualuga ua avea na ‘au pesipolo ma siamupini o le liki lea, ua atili ai ona mata’i e le vasega polofesa nei lea alo o le atunu’u.

“I sa’u fa’amatalaga o lona faia’oga i lea fa’agatama, ua alagatatau le fa’alauiloaga ua i ai nei a le Washington Nationals mo Brandon Tuioti Smith, o se tasi e maoa’e lona atamai ua i ai nei i le Pesipolo fa’apolofesa pe afai e fa’aauau pea i le mea o i ai nei!”