Na manino i le saunoaga a le afioga i le alii kovana ia Lolo Matalasi Moliga e faapea, ua avea ovataimi ma ‘compensatory time’ o lo o faaopoopo atu i tagata faigaluega a le malo, o le amataga lea o tulaga faafitauli i le tamaoaiga o le malo o Amerika Samoa.

I le taumafai ai o le alii kovana e puipui tupe a le malo ma lona tamaoaiga mai le aafia ona o tulaga i ova taimi ma ‘comp time’ a le malo, sa ia fautuaina ai loa Faatonusili uma o matagaluega ma ofisa a le malo, e ala i lana tusi i le aso 27 Ianuari 2014, ina ia latou sailia auala e faatonutonu ai tulaga e pei ona ia taua.

Na taua e Lolo i lana tusi e faapea, i le taumafai ai e taofiofi tulaga o ova taimi ma ‘comp time’, o le mafuaaga lea na ia faatulaga ai ta’iala i le ulua’i taimi ua mavae e taofia ai le toe i ai o ni ova taimi, ae tatala ai loa le avanoa e faa faigaluega ai ni isi tagata faigaluega fou mo le malo, ae foliga mai lava e i ai ni isi o faatonusili ma faauluuluga o ofisa ma matagaluega a le malo e le o manatu mamafa i lea tulaga.

“Ua tuuina atu le tusi lenei e faatonuina ai ina ia faia se auala e faaitiitia ai itula ova taimi ma ‘comp time’ i totonu o lau matagaluega ina ia tusa ai ma ala o le tulafono,” o se vaega lea o le tusi a Lolo i Faatonusili.

O se tasi o itu na taua e Lolo, e tatau i Faatonusili ona ave aso malolo mo tagata faigaluega i a latou matagaluega, ina ia sui mai ai le tulaga o lo o faia o le totogiina atu lea e le malo o o tupe mo ova taimi atoa ai ma ‘comp time’ a tagata faiglauega.

Sa toe faamanatu e Lolo i lana kapineta, e manaomia le pasia muamua o ova taimi ma ‘comp time’ ona faatoa tuuina atu ai lea i le tagata faigaluega.

Talu ai o faiga faavae a le malo ua maea ona taoto e faatatau i le mataupu lenei, o le a gafa ai le Faatonusili ma le totogiina o tulaga tau tupe pe afai e le amanaia faiga faavae ua mae’a ona faataoto.

“I le tapunia ai o le tausaga tupe lenei 2014, e na o ova taimi ma ‘comp time’ ua maea ona aloaia faaletulafono e mafai ona faaauau i totonu o faamaumauga a le malo mo le isi tausaga tupe fou o lo o sosoo ai nei,” o se vaega lea o le saunoaga a Lolo.

Na taua e le alii kovana e faapea, o lo o to’atele isi tagata Amerika Samoa o lo o tau saili ni a latou galuega, ae atili ai ona le maua nei avanoa pe afai e galulue ova taimi tagata faigaluega a le malo o lo o i ai, po o le ofoina atu fo’i i ai o ‘comp time’.

O le agaga maualuga o le ali’i kovana e pei ona ia faaalia i soo se taimi e fono ai lana kapeneta, ia maua uma e le toatele o tagata Amerika Samoa le avanoa e galulue ai i galuega, ina ia maua ai tupe e fesoasoani ai i le tausiga o a latou aiga.