Ads by Google Ads by Google

Avea Oe ma Ta’imua e Lavea’i

Ulua’i Ta’ita’i A’oga Maualuluga Umia Tusi Pasi NDPTC - Iunivesite o Hawaii

O le afiafi o le Aso Tofi na te’a, sa fa’ato’a taua’ao ai tusi pasi o le vasega o fanau a’oga maualuluga sa a’otauina fa’apitoa mo le tali atu i tagata ma tima’i fo’i i tagata i mea e ao ina faia i taimi o puapuaga ma fa’alavelave fa’afuase’ fa’anatura. O ituaiga fa’alavelave fa’anatura lea ua a’oa’oina ai i latou i mea e ao ina faia vave lava mo nisi, e aofia ai galulolo ma mafui’e.

Ua le aofia i nei a’oa’oga fa’apitoa, ituaiga fa’alavelave tau kasa o’ona, vaila’au o’ona e ono a’afia ai nisi e to’atele ona ua fa’apaina se tasi se fale ma a’afia ai i se mu, ma isi fa’alavelave tuga fa’apena e fa’atupula’ia e se tagata terarisi.

Ina ua taumafai le susuga le ali’i faia’oga Papali’i Dr. Failautusi Avegalio e saili se vaega o tamaiti e avea ma Ta’imua i ni galuega tima’i mo tagata lautele, pe avea fo’i ma ni lavea’i e fa’atonutonua nisi i taimi vevesi ona ua o’o mai se fa’alavelave fa’afuase’i fa’anatura, sa ofoina atu e le faletua o le Kovana, Maryann Tulafono, lana vaega fa’apitoa o le Taitaitama, o e o lo’o avea ma ta’ita’i o vasega maualuluga o A’oga Maualuluga uma lava o le Teritori Amerika Samoa.

O aso e lua na faia ai lea a’oa’oga fa’apitoa, o le aso 16 ma le 19 o Aperila, 2012. Na fa’atautaia le a’oa’oga e le susuga Dr. Failautusi Avegalio ma CSM Moeituasivi Filipo Ilaoa o le NDPTC a le Iunivesite o Hawaii.

O le autu lava o A’oa’oga fa’apitoa sa faia, “O le a sau mea e fai i taimi ua fa’ailo mai se Galulolo?”

Na mae’a le a’oa’oga, ae toe faia lava le su’ega ina ia taua’ao le tusi pasi i le tamaitiiti a’oga, ae ua mautinoa o lo’o alagatatau ma le tomai ua ia maua, e tima’i ai i nisi, ma fesoasoani ai e fa’asao mai se soifua o se tasi, ae maise ai, o i latou o ta’ita’i o latou a’oga o i ai, e aoga mo le tima’iga o fanau a’oga i le mea e ao ina faia fa’avave ia fa’asaoina o latou soifua.

O le vaega lenei na tofia fa’apitoa, o le vaega fo’i lea a le Faletua o le Kovana, o lo’o fa’aaogaina i latou i le Polokalama a le PUDILC po’o le Prevent Underaged Drinking Initiative Leadership Council. Ua tofia mai ta’ita’i o a’oga maualuluga uma e sefulu ma le lua i le teritori, ina ia avea i latou ma ta’iala i le polokalama fa’asao mai le fanau mai le tagofia o le ava malosi ma fuala’au o’ona.

E pei ona tatou silafia, o le Polokalama fa’apitoa lenei a le Tina o le atunu’u, Le TAITAITAMA, ua matua 

logologoa ona tala’ave i le aoga tele i le a’oa’oina o tamaiti i tutumau i le olaga mama e le tagofia e i latou le ‘ava malosi ma fuala’au o’ona.

Ona o le vasega lenei o ta’ita’i mai a’oga maualuluga ta’itasi i Tutuila ma Manu’a, o lea ua ‘ese fo’i le iloga o le tula’i mai o nei fanau talavou i le latou vala’aulia fa’apitoa, e avea ma ‘avefe’au lelei mo nisi o taimi o fa’afitauli.

I se ta’utinoga lava a Maryann Tulafono i le taimi o le a taua’aoina ai fa’ailoga i nei fanau agava’a, sa ia fa’ailoa ai, “Na ou fai lava ia Papali’i Dr. Avegalio, ‘aumai lau polokalama e fa’asalafa i la’u fanau fa’apitoa o le Taitaitama! Na ou iloa lelei, e tou te mafaia ona tau’avea nei tomai fa’apitoa, e fa’aatoatoa ai la outou auaunaga i fanau ua a’o’oga i tou a’oga ta’itasi pe a o’o i fa’afitauli fa’anatura e pei o mafui’e ma galulolo.”

Ina ua maua le avanoa o le ali’i faia’oga o le kosi lea, Dr. Avegalio, sa ia ta’utino, “O le fa’ato’a ou va’aia lea o ni pepa ua maua ai le sa’o uma i nei ituaiga o su’ega talu mai ona ou faia’oga ai! E tula’i mai e matua ‘ese lava le la’asaga lea ua o’o i ai le a’oa’oina o le kosi lea i le vasega fa’apitoa lenei, o ta’ita’i o A’oga Maualuluga ta’itasi a le teritori.  Ia aoga ma ia tou fa’aaogaina nei au’upega aoga tau le tomai ua folasia atu mo le fa’saoina o se ola i taimi faigata.”

O aoga uma sa i ai o latou sui i lenei a’oa’oga mo aso e lua, ma ua mae’a pasia lea kosi, ua taua’aoina fo’i o latou tusi pasi ia Aperila 19, 2012, e aofia ai: Fa’asao Marist High School, Faga’itua High School, Kanana Fou High School, Leone High School, Manu’a High School, Manumalo Baptist High School, Nu’uuli Voc-Tech High School, Pacific Horizons School, Samoana High School, SDA Iakina Adventist Academy, South Pacific Academy ma Tafuna High School.

O le fa’amoemoe taua lava, ia i ai se isi vaega o ta’ita’i e fa’aosofia lagona tima’i i mea e ao ina faia e le fanau a’oga i taimi o fa’alavelave fa’anatura i totonu o a’oga ta’itasi.

E aoga fo’i ona avea lava fanau a’oga e fili mai ai ni ta’ita’i e tima’ia le fanau a’oga lava latou, aua e malamalama i latou i fa’afitauli o po’ia ai le fanau a’oga, atoa ai ma mea e fiafia i ai i latou, aua o lo’o laina tutusa o latou olaga talavou.

O le aoga fo’i la lea o le fa’aaoga lava o le Vaega Fa’apitoa o Ta’ita’i i totonu o A’oga a le Taitaitama, e matua faigofie lava ona fa’aulu atu nisi fo’i polokalama aoga ma fa’a’au’upegaina atili ai pea le Youth in Action lea a le Taitaitama, ae a nisi tiute i le lumana’i o le Ta’ita’itama ma i latou o lo’o aofia i le YIA.

O i latou ua maua tusi pasi nei e aofia ai: Glorissa Blanco, Julie Wulf, Mau Brown Jr., Peato Pererira, Joshua Lafoa’i, Zimmerman Enosa, Destinee Afalava, Marcus Mamoe, Paepaeuli Tuiasosopo, Tautala Seti, Alexander Steffany, Bosnia Langkilde, Mariah Seva;aetasi, Saoimoana Fagaima, Alvin Liusamoa, Jedidiah Fuiava,Moke Eneliko, Sirarotonga Tagaloa, Tiresa Falelua, Angeline Maeli, Iva Telesia Tiapula, Kerriah Sekio, Trinity Lealofi, Colleen Vou, Fa’aletonu Letalu, Iosefa Su’a, Victoria Su’e, Niaz Addison, Teresa Lin, Annie Amosa, Christine Hall, Sina Puni, Tiaina Taliu, Jasmine Muasau, Miranda Galo, Naphtaliah Reed, Orlando Tagaloa, Jillianne Javier, Leo Pastorfide, Martin Park, Sei Yun Ki, Angel Ifopo, Jireh Kruse, Joseph Zodiacal ma Lottie Haleck.

Malo le fa’amalosi,  fa’afetai mo le fa’autaga loloto, ina ia avea ai nisi ma fa’aola i le fanau.