Ads by Google Ads by Google

AVEA LE SAMI MA TUUGAMAU E LE ELIA

Ua avea le sami ma tuugamau e le elia mo nisi e pele i loto ma agaga, aemaise lava pe afai e siliga taliiseu se lavea’i mo i latou pe afai e tafefea i le sami.

“E le pepelo lena upu ae o se upu foi e faigata ona talia i loto o aiga o i latou ua tafefea i le sami ma maliliu ai, na oo lava foi ia te a’u sa le mafai fo’i ona ou taliaina lenei tala ina ua ou inu i le ipu lenei ua inu ai foi nisi o aiga o le atunuu i lenei vaiaso,” o le molimau lea a le tina o Seiafiafi Penehuro.

O Seiafiafi ma avea ma tasi e taula’i i ai upu faamafanafana ma upu faalaeiau ina ua siliga taliiseu foi se lavea’i mo si ona to’alua na tafea i le sami i Nuuuli i le 2004, ae feagai ai ma se latou lama i le po ma nisi o taulele’a o le latou aiga.

Fai mai Seiafiafi, o le mapuna a’e o le tala faanoanoa i le vaiaso na te’a nei ina ua le manuia sailiga mo le alii o Falefasa Mata’utia, 15 tausaga o Vaitogi, atoa ai ma le alii faifaiva ia Lauina Mala, 44 tausaga o Afono, na toe fafagu mai ai i lona loto lagona ootia ma le faavauvau na oo foi ia te ia, ina ua taia i lana faalogo le tala e uiga i lona toalua o Reupena, ua tafea i le sami.

Na taua foi e se tasi o tamalii o le atunuu e lei finagalo e faalauiloa lona suafa, e leai lava  se poto o se tagata soifua e fai i le malolosi o peau o le vasa, pe afai lava ua le mafai e lona malosi ona faafetaui le malolosi o peau.

“Le mafuaaga lena ua faaigoa ai le sami o le tuugamau e le elia, aua foi o le taimi lava ete goto atu ai i le sami, ua mautinoa lava e le toe maua lou tino, o le a leai foi se avanoa e mafai ai e lou aiga ona faailoa atu toe alofaaga ma toe saafiafiga mo le ua maliu,” o le saunoaga lea a lea tamalii.

O lagona faavauvau lava foi ia na mafai ona faasoa mai e le tina o Sa’o Mata’utia e faatatau isi ana tama pele o Falefasa na tafea i le aso Tofi o le vaiaso na te’a nei, lea e oo mai lava i le taimi nei e le’i maua lona tino i ogasami soua o Vaitogi.

E lei manuia taumafaiga mo se faamatalaga mai le aiga o le alii faifaiva mai Afono ia Lauina, peitai na taua e nisi o le nuu e iloa ma masani lelei i lenei alii, o ia o se tagata e agamalu ma tauagafau ona uiga, e galue malosi foi i le tausiga o lona aiga, aemaise si ona toalua ma le la tama e to’atasi.

Na taua e Seiafiafi, e  ui i le matuitui o le oti, peitai e sili atu le maliu o se pele i le loto a’o mafai ona vaai atu i lona tino i ona toe sauniga, nai lo le faamavae atu ai i luga o le sami e aunoa ma le toe vaai atu i ai.

“O uiga lava na o tagata Samoa latou ia, tusa lava pe matuitui le tiga o le oti, ae a vaai atu lava i le tino o le tagata o loo pele, ua mafanafana foi le loto o loo mafai ona faatofa atu i ai i ona toe taimi, peitai o le tafea i le sami e aunoa ma le toe vaai i ona foliga, ua avea ai le sami o se tuugamalu e le tau eliina, ae na o le lafoa’i lava i ai o le tino ma lilo atu i le vaai i se taimi vave lava,” o mafaufauga ia o le tina o Seiafiafi.

Ae fai mai le talitonuga a se tasi o alii talavou e malosi lona talitonuga i le soifuaga faalelagi, tusa lava pe maliu le tagata i le sami, afai e mautu le talitonuga o le tagata ua maliu i le Atua, e i ai le taimi o le a toe feiloa’i ai o ia ma lona aiga na o latou valavala ona o le faalavelave faafuase’i na mafua ai ona maliu.