O le ifoga e pei ona avea ma se tasi o aganuu a Samoa, o se tasi lea o tu ma aga a Samoa e uia ese aiga, nuu poo se itumalo, e auala atu ai sa latou faatoesega pe afai ua matuia se gaioiga sa faia e se tasi i se isi tagata, nuu poo se itumalo foi.

O se auala fai mai nisi e faigofie ona faatino ae faigata ona talia, peitai o Samoa lava ia ma ana tu ma agaifanua, soo se taimi lava e pulou ai se tagata i le ietoga, le ia o le ola poo le measina a le atunuu ona o se amioga ua le tusa ona fai, ua atagia mai ai iina lagona o lea tagata ia faamagalo o ia ma lona aiga, o lona nuu ma lona itumalo.

E seasea tupu se ifoga ae faatoa tupu lava pe afai e matuia se mea sa tupu ua mafua ai ona maliu se tagata pe ua oo foi se tulaga matuia ma le ogaoga i se isi tagata.

E le’i i ai se ifoga na tupu i si o tatou atunuu i lenei vaiaso peitai i Samoa, e lua ifoga tetele sa faatautaia ai i le va o afioaga se lua, faapea ai malo ma se tasi o afioaga, ona o ni faalavelave ogaoga na manunu’a ai nisi ae i’u ai le ola o le isi.

VEVESI VA O LEOLEO MA FALEATIU

O le aso Lulu na te’a nei na faia ai se faaleleiga i le va o sui o le Matagaluega o Leoleo a le malo o Samoa, ma alii ma faipule o le afioaga o Faleatiu, e mafua mai i le faalavelave lea na maliu ai se alii Faleatiu ae manunu’a ai ni leoleo se to’atolu i le masina na te’a nei.

O le alii o Rapi Vaili, e toafitu ona alo na maliu i le taeao lea na tulai mai ai se taugafana i le va o leoleo ma tagata o lona nuu, ae manunu’a ai leoleo e to’atolu, ma e oo mai i le taimi nei, o loo faagasolo pea suesuega i le mafuaga na maliu ai lenei ali’i.

O loo manatu leoleo e saili pe na maliu Vaili i se pulu na fana atu e leoleo, pe sa maliu i se pulu na fana mai e nisi o lona nuu sa auai i le tauga fana.

Ina ua fesiligia se faamaoniga mai le Matagaluega o Leoleo ma Falepuipui i Samoa e uiga i lenei mataupu, na faamaonia mai ai e le afioga i le Sui Komesina ia Leaupepe Fatu Pula lea tulaga.

“Ua maea ona faia le faaleleiga i le va o le Matagaluega ma le aiga, ma ua taliaina foi ma faaleleia mea sa faaletonu i le va o itu e lua, o le taimi nei ua amata faagasolo suesuega a le matagaluega e uiga i le faalavelave na tulai mai,” o le saunoaga lea a Leaupepe.

“O suesuega ua faagasolo o loo faaauau lea i le mataupu na tafana mai ai e tagata leoleo ina ua alu atu sa latou osofaiga e sailia ai laau mariuana i le masina na te’a nei.

E lei i ai se mea na toe gase poo se faalavelave na toe alia’e mai ina ua uma le faaleleiga i le va o le ofisa o leoleo ma le afioga, ma ua taoto atu nei le mataupu i aao o leoleo mo suesuega.

O le leleiga e pei ona saunoa Leaupepe na tomua lava i tu ma aga masani a Samoa e pei o le ‘ava o feiloaiga, sosoo ai loa lea ma upu e aui ai le aso tainane le vevesi e pei ona tulai mai.

O sui o le afioaga o Faleatiu na auai i lenei feiloaiga e aofia ai le alii taua o le nuu ia Talimatasi Setu, atoa ai ma isi tamalii taua e aofia ai le tuafafine o le alii ia Tagaloasa Filipaina lea o loo tuli sona faasalaga faafalepuipui, le tamaitai o Mugi Satuiolosega Mo’a.

Sa i ai ni sala na salalau ae lei taunuu le leleiga e faapea, o le a nofo sauni mai Faleatiu ma fana e faatali ai le taunuu atu o leoleo, ona o le mea na maliu ai le alii o Rapi peitai ina ua taunuu leoleo i le nuu, sa toafilemu mea uma ma o loo sologa lelei foi suesuega a leoleo o loo faia i le taimi lenei.

VA O APIA MA SALELOLOGA

O le vaiaso foi na te’a nei na talia ai e le afioaga o Salelologa se ifoga mai le afioaga o Apia, i le mae’a ai lea o se vevesi na tulai mai i le taimi o le tuuga fautasi o le sisiga fu’a na mae’a atu nei, ina ua faaaoga e nisi o le au va’a a le Little Rina mai Apia foe sasa ai nisi o le au va’a a Saleologa, Le Tolotolo o le Tama Uli.

O lea faalavelave na mafua ai ona manunu’a nisi se toa 12 o le auva’a a Salelologa e aofia ai le alii e to’atasi lea na manu’a tigaina, ma le maua ai se tulaga lelei a le latou va’a e pei ona taua e le alii kapeteni ia Ivan Pauli.

Na faamaonia mai foi e le afioga ia Leaupepe le maea lea ona faia o se leleiga i le va o Apia ma Salelologa ma ua taliaina foi e Salelologa le ifoga a Apia.

“E to’alua matai mai Apia na agai atu mo le faatinoina o le ifoga i le vaega na api ai le au vaa a le Tolotolo o le Tama Uli, ma e lata i le itula talu ona pulolou matai ae faatoa talia e Salelologa.

O matai e toalua mai Apia e aofia ai le afioga ia Pauli Enitima Pauli ma Lima Soifua Puaaefu.

O le ifoga lenei na taumafai muamua i ai le au vaa a Apia ma nisi o matai i le afiafi o le aso lava lea na tulai mai ai le faalavelave, ae tusa ai ma ni ripoti mai Samoa, na taua ai le teena e matai a Salelologa o le faatoesega i le aso lea, ona e lei aofia uma i ai matai taua o le afioaga, aemaise ai, e le o i ai matai taua e ono mafai ona o latou pupuluina se vevesi e tulai mai i le va o nuu e lua.

Saunoa Leaupepe, o le agaga faafetai na faaalia e sui o Apia ina ua talia e Salelologa la latou savali mo se faamagaloga.

O le vevesi na tulai mai ina ua oso le Little Rina i le alavaa a le Tolotolo o Tama Uli, ma amata ai loa le vevesi, ma faaaoga ai loa e le au vaa a Apia foe e sasa ai isi o le au vaa a Salelologa, ma pauu ai isi i le sami e aofia ai ma le alii ta atigi palau.