Ads by Google Ads by Google

AVEA FANA, AISA MA MARIUANA MA FA’AFITAULI I SAMOA

APIA, SAMOA - O se tasi o faafitauli ua maitauina le faatupulaia i Samoa i le taimi nei, o le umia faasolitulafono lea o aupega matautia, atoa ai ma fualaau faasaina e pei o le aisa ma le mariuana.

O faalavelave e lua ia na maliliu ai ni isi i Samoa i le masina nei e aafia ai laau malosi, ua alia’e ai se fesili tele mai le Matagaluega o Leoleo, Falepuipui ma le Tineimu, poo fea e aumai ai laau malosi o lo o faaaogaina i solitulafono nei.

O le faalavelave muamua lea na tagatavaleina ai se alii ave taxi ina ua maea ona ia agalelei i le alii o lo o tuuaia na fanaina o ia, atoa ai ma le faalavelave lea o lo o tuuaia ai se alii i lona faaoo lea o le oti i lona lava tuafafine e ala i le faaaogaina o se laau malosi, ua ae ai se manatu i le matagaluega o leoleo i se auala e mafai ai ona foia le faafitauli i le umia lea e le atunuu o laau malosi.

I le tulaga o le umia o fualaau faasaina, o lo o taofia ai e leoleo i Tafaigata se alii faipisinisi, ina ua maua i ai se vaega tele o le pauta oona o le aisa ma mariuana i lona fale, ina ua osofaia e leoleo i le lua vaiaso talu ai.

E ese mai i le osofaiga a leoleo i le fale o le alii faipisinisi lea, o lo o galulue pea leoleo i le taofia o fefaatauaiga i mariuana o lo o faia i le maketi i Fugalei, faapea ai vaega eseese o le atunuu e aofia ai ma le uafu i Salelologa ma Mulifanua.

Na taua e le sui komesina o Leoleo, le afioga Leaupepe Fata Pule ina ua fesiligia e le Samoa News, o lo o taumafai pea le matagaluega o leoleo e saili auala e faaitiitia ai le faatupulaia o solitulafono eseese nei i le atunuu.

Sa ia taua e faapea, o solitulafono o lo o aafia ai laau malosi, o lo o matua silasila totoa i ai le matagaluega ina ia mautinoa e maua se auala e faafoi atu ai e le atunuu laau malosi o lo o i ai i o latou aiga, ina ia mafai ai ona mautinoa le saogalemu o le atunuu lautele mai le aafia i ni faalavelave matuia faapenei.

O lo o masalomia vaa e le o ui mai i le taulaga ae o lo o taula i ogasami i totonu o le atunuu, o le isi lea auala o lo o ofi mai ai fana o lo o vaaia i le atunuu.