Ua aloaia nei le avea o Amerika Samoa ma totino o le Faalapotopotoga o Turisi i le Pasefika (South Pacific Tourism Organization - SPTO), e pei ona faamaonia mai e le Faatonu o le Ofisa o Turisi i le atunuu, le susuga a David Vaeafe, e ui o se tasi lea o atunuu sa i ai i le ulua’i taimi na faatoa faavae mai ai lenei Faalapotopotoga i le 1980.

O le fonotaga lona 23 a le SPTO sa usuia i Samoa i le vaiaso na te’a nei, na aloaia ai loa le avea o Amerika Samoa ma totino o le SPTO, ina ua fulisia uma sui sa auai.

O sui o le atunuu na auai i lea fonotaga e aofia ai le afioga i le kovana sili ia Lolo Matalasi Moliga; Faatonusili o le Matagaluega o Alagamanuia ma Fefaatauaiga ia Keniseli Lafaele, Loia Sili ia Afoa L. Suesue Lutu, ma le Loia Sili lagolago ia Mitzie Jessop.

Na taua e le alii kovana i sana saunoaga i lea fonotaga e faapea, e ui o Amerika Samoa o se teritori o le Iunaite Setete, ae o se vaega o le Pasefika e ono mafai ona manuia pe a avea ma totino o le SPTO.

Sa ia taua foi e faapea, o lona auai i lea fonotaga, o le faailoaina atu lea o le faanaunauga o Amerika Samoa o lo o i ai, ina ia toe aloaia le avea o ia ma totino o le Faalapotopotoga o Turisi a le Pasefika, ina ia manuia ai pea le atina’eina o turisi i le atunuu.

E ui i tulaga vaivai ma le laititi o le tamaoaiga o le teritori, ae na taua e le alii kovana le taua o tulaga tau i le atina’e o le tamaoaiga, e ala i le faaaoga o taleni e tausinio ai le teritori ma isi atunuu o le pasefika o lo o malosi ai le atina’e o turisi.

O Amerika Samoa le atunuu lona 17 ua avea ma sui o le SPTO, ma o le ulua’i teritori fo’i lea a le Iunaite Setete ua mafai ona avea ma totino o lea faalapotopotoga, lea e silia i le 200 pisinisi tua mai vaega eseese o le Pasefika o lo o faipisinisi i le atunuu.

Na taua e Vaeafe e faapea, e tele se vaega o le a mafai ona aoaoina mai e Amerika Samoa, i le avea ai ma totino o lenei Faalapotopotoga.

O ni isi o taumafaiga e pei ona taua e Vaeafe o lo o unaia e le Ofisa o Turisi a le atunuu, o le unaia lea o tagata malaga asiasi mai i le teritori ina ia umi aso e nonofo ai i le teritori, ma latou molimauina ona foliga manaia ma le lanu lauava.

O ni isi o itu lelei e mafai ona maua mai i le avea ma totino o le SPTO, o auala e faaleleia ai le atina’e o turisi i le Pasefika, lea foi e talitonu le ofisa o Turisi a le atunuu e manuia atu ai ma le teritori.

I se ripoti na lomia e le Samoa Observer i le vaiaso nei e faatatau i lenei fonotaga, sa taua ai e le Pulesili o le SPTO ia Ilisoni Vuidreketi i lana saunoaga e faapea, e le gata ua avea nei Amerika Samoa ma totino o le SPTO, ae sa avea fo’i o ia ma sui sa auai i le ulua’i taimi na amata faavae mai ai lenei Faalapotopotoga i se vaitaimi o le 1980.

faaliliu: Ausage Fausia