Ua a’e se tofa i le afioga i le kovana ia Lolo Matalasi Moliga ma le faigamalo, o le a autu polokalame o le fu’a o lenei tausaga 2015 i le fa’atauaina lea o fitafita o le taua.

Saunoa le tofa i le to’oto’o ia Lolo i le fonotaga a le Kapeneta i le vaiaso na te’a nei e fa’apea, e leai se isi taimi e tatau ai i le malo ona avatu lana fa’aeaea ma le fa’afetai i fitafita sa tautua i le taua, aemaise ai fo’i fitafita o lo o tautua pea i le taimi nai lo le taimi lenei.

“O le mafua’aga lena ua ma manatu ai ma le afioga i le ali’i Lutena Kovana Lemanu Peleti Sialega Mauga ina ia avea le fu’a o lenei tausaga, o se avanoa lelei lea tatou te fa’amamalu ma fa’ataua ai i latou uma o lo o tautua i vaega ‘au a le malo tele, aemaise ai fo’i i latou sa tautua i vaega ‘au ma ua malolo litaea mai i aiga, ina ia fa’ailoa atu i ai lo tatou fa’afetaia o le tautua toto sa latou ofo atu mo le atunu’u ma le lalolagi, lea lava o lo o fa’aauau mai pea lava i le taimi nei”, o se vaega lea o le saunoaga a Lolo.

“E ui o lo o i ai le aso ua fa’apitoa e le malo tele e fa’ataua ai le tautua a fitafita o le taua, ae tatau lava i le malo ona i ai se aso fa’apitoa latou te fa’afetaia fa’apitoa ai le auaunaga sili sa ofo mai e nei tama ma tina, tainane nai fanau o lo o tautua pea lava e o o mai i le taimi nei”, o le isi lea saunoaga a le ali’i kovana.

I le silasila mamao a le ali’i kovana i le tulaga sa i ai le tautua a Amerika Samoa i vaega ‘au a le malo tele i tausaga ua tuana’i e o o mai lava i le taimi nei, sa ia saunoa ai i luma o le kapeneta e fa’apea, e leai se isi atunu’u e pito sili ona loto nu’u e pei o tagata Samoa, o le mafua’aga lena e le taitai manana’o ai le Iunaite Setete e fa’ama’amulu ese fifitafita Samoa, leaga ua latou talitonu i le lotonu’u ma le naunau e tautua le malo tele atoa ai ma Amerika Samoa.

Na fautuaina e le ali’i kovana sui o lana kapeneta, ina ia galulue fa’atasi e fa’atumau pea le lagona lotonu’u lea i finagalo o Amerika Samoa, e le gata i tagata matutua ae faapea fo’i i tupulaga talavou, ina ia latou lagona le taua o le lotonu’u atoa ai ma le fia fai mea lelei mo le atunu’u.

“E faigofie lava ona tupu a’e le lagona lotonu’u i tagata lautele pe afai e silasila mai, o lo o tau solomua le malo i le unaia o polokalame e fa’atumau ai lagona tautua ma le lotonu’u o tagata Amerika Samoa, ae a tausolomua tatou i le fa’avaivai, e fa’avaivai fo’i lagona o tagata”, o le isi lea saunoaga a le ali’i kovana i le kapeneta, ma ia taua ai fo’i le tele o suiga ua maitauina i le taimi nei talu mai le 10 ma ona tupu tausaga ua tuana’i, o isi ia auala e atagia mai ai le tumau pea o le lotonu’u o tagata.

Mo se fa’ata’ita’iga i le tele o tausaga ua mavae, sa vaaia le paepae solo o lapisi i le atunu’u, toeitiiti tumu vaega eseese o magaala i le lapisi, peita’i o le taimi nei, ua mama vaega eseese o le atunu’u, e mafua mai ina ua galulue fa’atasi tagata ma le malo e unaia polokalame e fa’amama ai Amerika Samoa, ma, o isi na vaaiga e afua mai ai le lotonu’u o tagata.

O le isi fonotaga a le kapeneta e fa’alauiloa aloaia ai loa polokalame o le fu’a mo lenei tausaga, ao sauni atu Amerika Samoa e fa’amanatu le 115 tausaga talu ona sisi le fu’a a le malo tele i ona laufanua.