E toalua ni alii ua taofia nei i le toese i Tafuna, ona o tuuaiga i lo la auai lea i se taumafaiga e aumai faanana ai se vaega tele o le laau faasaina o le mariuana i totonu o le teritori, lea na auala mai i le aso Tofi o le vaiaso nei i le malaga a le Lady Naomi mai Samoa.

O i laua e toalua e aofia ai le alii Seila o le vaa a Samoa, le Lady Naomi ia Liki Kerisimasi, ma le alii mai Aoloau ia Fatu Vagana.

Talu mai le aso Tofi na taofia ai i laua e leoleo, o ananafi na faatoa faila ai moliaga a le malo faasaga i lenei mataupu.

O moliaga mamafa ta’ilua ua faia faasaga ia i laua nei e aofia ai le umia faasolitulafono o vaega o le laau faasaina o le mariuana, atoa ai ma le umia faasolitulafono o mariuana ma le faamoemoe e tulei ma faatau atu i nisi tagata.

O le moliaga o le umia faasolitulafono o fualaau faasaina, e mafai ona faasala ai se tasi i le toese mo le umi e le itiiti ifo i le lima tausaga, pe faasala foi i le salatupe e le itiiti ifo i le $5,000.

Ae o le faasalaga o le umia faasolitulafono o fualaau faasaina ma le faamoemoe e tulei ma faatau atu i isi tagata, e mafai ona faasala ai se tasi i le toese mo le umi e mafai ona oo atu i le 20 tausaga.

E talitonu le Samoa News, o le afiafi ananafi na faila ai e le malo moliaga faasaga ia i laua nei, ma ua maea foi ona tuuina atu e leoleo kopi o moliaga atoa ai ma tuuaiga faasaga i nei alii, ao taofia ai i laua i le toese i Tafuna.

O lenei mataupu na masalomia e leoleo ina ua tau saili le auala o lo o sao mai ai mariuana mai Samoa, lea o lo o masalomia o lo o aumai pea i le va’a i le tele o taimi.

I le aso Tofi na te’a nei, sa aga’i atu ai leoleo mo le faataunuuina o le latou siaki masani i le uafu i Fagatogo, ma latou tuli mata’iina ai loa gaioiga e pei ona afua mai ai lenei mataupu.

Na taua i faamaumauga a le faamasinoga e faapea, sa maitauina uma lava e leoleo gaioiga a le alii Seila atoa ai ma Vagana, i le taimi na ulufafo mai ai le Seila ma le afifi ma tuuina atu ia Vagana i se nofoaga e le mamao ese mai le uafu.

I totonu o le afifi lea sa tuu atu e le Seila ia Vagana, e tolu nisi afifi lapopo’a o lo o i ai i totonu, ma o ia afifi o lo o kava uma i pepa iila ina ia faigata ona lagona le manogi.

E le o se taimi muamua lenei ua aafia ai Seila mai le vaa o le Lady Naomi i ni solitulafono i totonu o le teritori.

O le tausaga na te’a nei na molia ai se Seila i lona faia lea o ni uiga mataga i se teineitiiti sa malaga mai i luga o le va’a, e aofia ai lona ave o ia i toton o se potu ma la fai’aiga ai.

O le tausaga nei fo’i na molia ai se isi Seila i lona aumaia faanana lea o se vaega o le laau faasaina o le mariuana, a’o lea fo’i ua toe alia’e mai le isi mataupu e pei ona aafia ai se tasi o Seila i le vaiaso na te’a nei.