Ads by Google Ads by Google

Aumai faanana aisa ma mariuana i totonu o apa tamato

O vaega o fualaau faasaina e i ai mariuana ma le pauta o le aisa lea o lo o tuuaia na aumai faanana mai totonu o ni apa tamato sa maua mai i le meli i le vaiaso na te’a nei, ua i lalo nei o le vaavaaiga a le Ofisa o Leoleo, ae ua taofia i le toese i Tafuna le alii na alu atu e piki mai le pusa sa aumai ai apa tamato nei.

O le taeao ananafi na tulai ai i luma o le Faamasinoga Faaitumalo le alii o Folasa Galea’i, ina ua faila e le malo moliaga mamafa e lua faasaga ia te ia, ona o le faalavelave lea na maua ai e alii Ofisa o le Tiute vaega o fualaau faasaina, i totonu o se pusa na alu atu e piki mai, i le aoauli o le Aso Faraile na te’a nei.

O moliaga e lua ua tuuaia ai le ua molia e le malo e aofia ai le umia faasolitulafono o fualaau faasaina o le  aisa ma le mariuana ma le faamoemoe e faatau atu i isi tagata.

E tusa ai ma faamaumauga a le faamasinoga o lo o taua ai e faapea, o lenei mataupu na  tauaao atu e le Ofisa o Tiute i le Vaega e Taulimaina Mataupu tau Fualaau faasaina a le Ofisa o leoleo, ina ua maua i totonu o ni apa tamato sa aumai i se atigipusa na faamoemoe Galea’i na te pikiina, ia se vaega o aisa ma mariuana.

Ina ua fesiligia Galeai e alii Ofisa o le Tiute pe na te iloa mea o lo o i totonu o le atigipusa, na tali le ua molia e leai.  Na tatala e Alii Ofisa le atigipusa ma latou vaaia ai meaai eseese e aofia ai apa tamato, peitai o le itu na masalomia ai nei mea’ai, ona sa fai lava si mama o apa tamato nei, o lea na fafesootai ai loa le vaega o le K-9, ae  o le taimi foi lea na fai atu ai Galeai, se’i alu e aumai lona uncle lea e ana le atigipusa.

E lei umi ona alu le ua molia  ae toe foi atu na o ia ma le talosaga a lona uncle e kilia le pusa ma avatu i tua.  Sa fesiligia foi e alii Ofisa le ua molia pe aisea ua aumai mamao ai apa tamato a lona  uncle ae o lo o tele nei oloa i le atunuu, sa leai se tali a Galeai, sei vagana ai le faataupupula i le alii Ofisa  foliga mai ua le mautonu.

I totonu o le atigipusa sa i ai ni apa tamato se 8, o pepa chips, keke ma lole. E fa apa tamato sa tusia ai numera o le 2,4, 8 ma le 5 i le pito i luga, ae o isi apa e lua sa tusia ai le upu “clear”.

O apa sa tusia ai fuainumera i luga sa maua i ai pepa iila sa i ai lau mariuana i totonu, ae o apa e lua sa tusia ai le upu “clear” sa maua i ai  pepa iila sa i ai vaega o le pauta faasaina o le aisa.

Ina ua fesiligia e le alii Ofisa o le Tiute le ua molia po o ai le igoa o lona uncle, sa musu le ua molia e faailoa, sei vagana ai lona faapea atu, o lona uncle e igoa ia “Milton”.

E ui foi sa ta’u pepelo e le ua molia lona igoa i le uluai taimi na fesiligia ai o ia, peitai ina ua toe fesiligia o ia e alii Ofisa, sa toe  faasao i ai lona igoa, o ona  tausaga e 19 atoa ai ma lona nuu o Leone.

Fai mai le malo, e 11 pepa iila sa i ai le pauta o le aisa i totonu, ae 12 pepa iila sa i ai lau mamago o le mariuana, ma o mea uma ia sa aumai i totonu o apa tamato sa faafefiloi mai lalo ma chip i totonu o le atigipusa sa alu atu Galea’i e piki mai.

O le Aso Tofi lea ua faatulaga e faia ai le uluai iloiloga o lenei mataupu i luma o le faamasinoga faaitumalo, ma o loo taofia pea le ua molia i le toese sei vagana ua ia  totogiina le $100,000 ua faatulaga e le faamasinoga ona faatoa mafai lea ona tatala o ia i tua mai le toese.

Ae afai ae mafai ona tatala o ia i tua, ua poloaina e le faamasinoga o ia ina ia aua nei ona toe tagofia ni fualaau faasaina pe na te toe soliina foi se tulafono a le malo, a ia fesootai vavalalata ma lana loia ma auai i soo se taimi e valaauina ai lana mataupu.