Ua mae’a le galuega tele sa feagai ma le Vaega o Mataupu Fa’asaeanisi e a’otau ai le fanau i a’oga tulaga lua ma a’oga maualuluga i le Teritori ae ua tamau fo’i avanoa mo e auina atu i fafo mo le tauvaga o nei galuega fa’atino fa’asaeanisi a le Iunaite Setete, lea ua filifilia ai Ambika Murali mai Leona High ma Marcella Fitisone mai Tafuna High mo Me, 2013.

Mai le 14 o Galuega Fa’atino Fa’asaeanisi a Tafuna High sa fa’aulu mai i le tauvaga o Poloketi Fa’asaeanisi a le Teritori o Amerika Samoa, e to’aiva i lautogia mai vaega ta’itasi e tauva mo se avanoa e fa’ao’o atu i fafo mo le National Science Fair.

O lo’o fa’aauau pea lava ona malosi mai le una’i a Tafuna High i lea fo’i itu o galuega fa’atino fa’asaeanisi, ma o se fiafiaga lea o ali’i ma tama’ita’i faia’oga o lea fo’i mataupu i lea a’oga maualuga i le teritori.

Mai a’oga tulaga lua e 154 poloketi na fa’amasinoina e le vasega o fa’amasino tofia e le Vaega o Mataupu Fa’a-Saeanisi a le Matagaluega o A’oga ma e 14 fo’i vaega sa fa’atulaga e fa’aofi mai ai ni galuega fa’atino a le fanau: Behavioral and Social Science, Biochemistry, Botany, Chemistry, Computer Science, Earth/Space Science, Engineering, Environmental Science, Marine Science, Math, Medicine/Health, Microbiology, Physics and Zoology.

Mai a’oga maualuluga e 125 poloketi na fa’amasinoina, ae 14 ona vaega sa fa’atulaga ai le tauvaga, lea e to’aiva ai i latou na maua tulaga muamua mai Tafuna High. Ina ia una’ia lava le naunau o fanau a’oga i le teritori, o lea sa malaga mamao mai ai le ali’i o John Cruickshank, o se tasi o taiulu fo’i i le National Science Foundation i Uosigitone DC, ma o lenei fo’i le ali’i o lo’o ia fa’atautaia mai fa’atupega o galuega po’o poloketi o su’esu’ega fa’asaeanitisi i le Iunaite Setete atoa lava.

O le polokalama ua ia so’oupu ai i le tatou va ma le malo tele ua fa’aigoaina lea o le “STEM” lea e fa’aumi e fa’apea: “Science,Technology,Engineering & Mathematics.”

O se isi mea ua maofa ai John, ona o lo’o i ai se aganu’u matagofie sa ia le mua’i taga’i i ai, ae ua ia matauina le so’otaga o olaga o le fanau talavou ma latou aiga e matua to’atele na’ua. E tusa ai o galuega fa’atino ua ia fesiligia ai le fanau a’oga, ua maofa o ia i le mafai e le fanau ona fa’atino nei galuega, i le limiti fo’i o mea faigaluega o fa’aaogaina e i latou.

I le tele o fa’amatalaga a nisi o le fanau o lo’o faia latou poloketi, sa latou fa’ailoa le fesoasoani tele a latou matua, ae maise o latou faia’oga. Pe afai e auina atu nisi o tatou fanau ma latou galuega fa’atino e tauva i Phoenix, talosia ae manuia mai se tasi o i la’ua o le a fai ma tatou sui, aua o le fa’ailoga e silia ma le $3miliona.