Ads by Google Ads by Google

Auiliilia Fa’alavelave Tutupu & A’afiaga Lautele

“O se mea sili ona taua, o le a’otauina lea o le atunu’u ina ia nofo sauni e fa’ataututu atu i le fita ma a’afiaga e ono o’o i ai le soifua lautele, pe afai ae lutia lo tatou olaga i fa’alavelave fa’afuase’i fa’anatura pe o ni faiga fa’aterarisi, pe ona ua i ai se lape i fausaga o fale, auala, nofoaga lautele ma tautua lautele a le atunu’u e afua i le suavai taumafa, eletise ma suavai ma lapisi lafoa’i a le atunu’u.” O le saunoaga amata lea a le susuga Joe Couch, le faia’oga mai le TEEX i Texas sa fa’akonekarate e le Homeland Security a le Malo Tele, e o mai ma lona soa Monroe Manley, e a’oa’o le vasega o i latou e taulamua i le taumafaiga e fa’ata’oto se fuafuaga tamau a le teritori, e ao ina mulimulita’ia i taimi fita pe’a o’o mai.O sui na auai i le a’oa’oga sa tu’u lea i matagaluega ta’itasi fa’apea ma Kamupani tetele e tofia mai e i latou mo lea fa’amoemoe. O se tala mai e tofu masina o le tausaga, ma le a’oa’oga fa’apitoa e faia mo lea vasega, ina ia lava tapena i latou, ia le motusia le una’i malosi, o le fa’amauina lea o se “Fuafuaga Fa’ataoto mo Amerika Samoa i taimi e tutupu ai Fa’alavelave Fa’afuase’i, ia sailia ala o a’afiaga, fa’ailoa mai ni lape ua afua ai ona afaina tele le atunu’u, ma ala e mafai ona fa’afo’ia ai ni fa’aletonu e ono tutupu mai, ae maise o mea e ao ina faia e le atunu’u, ia le tetele ai ni a’afiaga e o’o i le gasologa masani o le soifua, pe a tutupu mai nei mea faigata.”Na amata mai le a’oa’oga lenei i le aso 28 Ianuari, se’ia o’o i le aso 1 Fepuari, 2013 ma o se a’oa’oga e le faigofie fo’i ona mautu i a’ai o finagalo, pe afai e le auai i se aso se tasi o lenei a’oa’oga. O le isi vaega tele o lenei a’oa’oga, o ala e tapena ai ma vailiili le aotelega o mea ua fa’aleagaina, fa’ataoto loa ma le fuafuaga e mafai ona fa’aleleia ai, ma ia tamau lea fuafuaga e fa’ataunu’u e tagata uma, va’ai mea faigaluega e fa’aaoga ia lava ma totoe, ma ia mata’i nisi a’afiaga e ono tutupu mai e nofo sauni e tali atu i ai, ia toe fa’aleleia vave le aluga o le soifuaga masani o tagata uma sa a’afia.“O le nofo sauni, ma fa’ata’ita’i fa’ata’ita’i ma saga fa’ata’ita’i o le gaoioiga e faia pe a fa’aolioli mai ni fa’alavelave fa’anatura, pe a o’o fo’i ina lutia mai fa’afuase’i i fa’alavelave fa’aterarisi, o se mea e ao ina faifai so’o lava, ia mautinoa, e le toe fesili pe oso sese se tasi, ae ia oso tatau ma ia mautonu i taimi fa’aletonu fa’apena!” O se tala lea a Monroe Manley, le tasi o faia’oga fa’apitoa mai le TEEX.O sui ta’itasi sa auai mai matagaluega eseese fa’atasi ai ma le Star Kist ma le Nusipepa sa mafai ona fa’ai’uina lelei lenei a’oa’oga fa’apitoa, ma o le a toe vala’auina i nisi fo’i a’oa’oga e soso’o mai! O lea a’oa’oga, sa fa’atautaia lea e le Matagaluega Homeland Security Amerika Samoa ma tatalaina lava e le Fa’atonu sili Iuniasolua Savusa i lona amata mai, ae sa auai pea Esther Savusa Savini, So’oupu o A’oa’oag mo le AS-HSL ma le TEMCO ina ia mautinoa ua fa’amae’a lelei nei a’oa’oga mo sui tofia o auai.