Ads by Google Ads by Google

AUALA E TAUSI LELEI AI FANAU LAITI

E 6 auala ua faailoa mai e tatau ona tausia ai le soifua maloloina o fanau laiti, ina ia soifua maloloina ma aua ne’i tino puputa i latou.

I le mau na o’o mai ma sui iloga o le National Head Start Program ina ia matatuina ma mulimulita’ia e le tatou fo’i Polokalama o A’oa’oga Amata a le Fanauiti, ia manuia ma toe talia le latou talosaga mo lona fa’atupega.

O le ala muamua na fa’ailo, ia tausia lelei le “Soifua Maloloina ‘Aua le so’ona puputa!”

O lea itu, ua matauina e amata mai lava i le taimi o pepe ai fanau, o lo’o matua mamafa na’ua pepe Samoa. Peita’i, e i ai le isi faiga e mafai ona fesuia’i ai latou tausami pe a amata ona savavali ma fa’asolo i le 3 tausaga, e mautinoa ai, ua fa’asolo lea tino lelei ina tupu u’umi ai i latou ae le toe puputa vale.

O lea a’oa’oga fa’apitoa, ua tu’ua lea i le itu o le Matagaluega o le Soifua Maloloina, latou te tau’avea, e so’otau ‘au i ai ma le DHSS i a latou tautua mo le fanauiti, e ala i le Polokalama a le WIC. O i’ina e fa’atautaia ai talavai mo fanau, ona fa’ato’a pasia lea e maua latou WIC, o i’ina e fa’aaoga tatau ina ia fautuaina lelei ai tina ma sui o latou aiga o omai ma le fanau e faia siakiga, ina ia fa’aititia le so’ona fagaina o fanau.

O le mau lona lua, o le “fa’atulaga tutusa lea o ala e a’oa’oina ai le fanau” mai lona laititi mai!

O lea itu, ua tu’uina lea i nofoaga o tausia fa’apitoa ai fanau, Day Care Centers ma i latou o lo’o tausia ai fanau i na nofoaga, Care Providers! O le isi vaega o tagata nei, o matua lava o le fanau, ma ua tatau ai ona vave feso’ota’i matua o lo’o latou tausia lava latou fanau, ma ala ua a’oa’oina ai fanau i totonu o nofoaga nei, ia mautinoa ua sauni lau tama e alu i le ECE pe a tolu ona tausaga.

O le mau lona tolu, o le fa’amalosiga lea, o le tutusa lelei o fa’atino o le Polokalama fa’ataoto mo le a’otauina o fanauiti i totonu o vaipanoa uma o le atunu’u, ia mautinoa o usia’ita uma nei a’oa’oga fa’ataoto.

O le lona fa, o le toe fa’aolaola lelei mai lea o tu ma agaifanua a Samoa e a’ota’u ai fanauiti, ia le motusia lo latou so’otaga ma o latou tama ma tina matutua, fa’apea ma o latou aiga, ae maise lava i le itu o galuega alofilima ma pesega ma siva. O le so’otaga lea e le tatau lava ona fa’anenefu i le fanau, aua o le lumana’i lea o lona olaga, ia iloa ona tau’avea lana aganu’u ma lana gagana ia tautala ai.

 O le lona lima, ia mataituina le tulaga o tautua lea e fa’ao’o mai mo le fanuaiti, o lo’o ‘au’au i mea e fa’aleleia atili ai lo latou Soifua Maloloina lelei. O le a lava mea o fa’ao’o ane e fa’atino ai tautua mo fanauiti a le atunu’u, ia mua’i sailia lelei, pe o alagatatau ma aiaiga tau le soifua maloloina.

Ma le mau lona ono, o le galuega sili lea ona faigofie uma ai nei mea uma, “Pe afai e aofia Matua i so’o se tautua e fia fa’ao’o mo le fanauiti!” Ia iloa lelei e matua lea polokalama, ia iloa le aoga mo lana fanau, ma ia manino ia te ia, lana vaega e fa’atino ia mautinoa ai le aoga mo lona alo o lea fo’i taumafaiga.