O le suiga fou lea ua manatu le malo e fa’amalosia ai tagata mai fafo pe a fa’afou a latou I.D, o se taumafaiga ina ia iloa ai tagata o lo o faila a latou lafoga i fafo, e le gata i tagata ae fa’apea fo’i i pisinisi.

O ni isi o ia suiga fou e aofia ai le tatau lea i le tagata mai fafo ona fa’aali le pepa sa faila ai lana lafoga i tausaga uma e fa’afou ai lona I.D, ina ia fa’amaonia ai o lo o ia usitaia tulafono tau lafoga a le teritori.

I se vaega o le ripoti sa tuuina atu e le afioga i le ali’i kovana ia Lolo Matalasi Moliga i luma o le Fono Faitulafono, ina ua tatala aloaia le ulua’i tauaofiaga o le nofoaiga lona 34 a le Fono i le amataga o le vaiaso nei, o lo o taua ai e le faigamalo lea suiga fou, ina ia mautinoa e foia ai le fa’afitauli o le fa’aitiitia lea o tupe maua a le malo mai lafoga, ma ia mautinoa ai fo’i e usitaia uma e tagata faila lafoga atoa ai ma pisinisi tulafono tau lafoga i le teritori.

E le gata o lo o fa’aauau pea su’esu’ega mo ni isi o kamupani o lo o fa’atautaia a latou auaunaga i Amerika Samoa ina ia mautinoa o lo o latou usitaia tulafono tau lafoga, ae o lea fo’i fa’atoa taliu mai i fanua le Teutupe mai se fonotaga ma le Ofisa o Lafoga a le malo tele i Uosigitone (IRS), mo le fa’amautuina o ni isi o mataupu tau lafoga.

Saunoa le ali’i kovana e fa’apea, ua amata nei ona galulue le Teutupe ma le Pule o le Ofisa o Lafoga e fa’atino lana fa’atonuga sa tu’uina atu i ai, ina ia faia loa feutanaiga ma tagata uma o lo o nofo aitalafu i tupe o lafoga i le malo, ina ia amata loa ona totogi atu tupe mo lafoga o lo o nofo aitalafu ai i le malo.

O se tasi o suiga fou na taua e le ali’i kovana o le a fa’amalosia i le tausaga lenei 2015, o le faia lea o se suiga i le tulafono tau lafoga, e fa’amalosia ai tagata faigaluega uma i le teritori, ina ia faila a latou lafoga a o le i mae’a so o se tausaga faigaluega i le atunu’u.

O se auala fo’i lea e mautinoa ma fa’amaonia ai, e le mafai ona toe fa’afou se laisene pisinisi se’i vagana ua fa’ailoa fa’amaoniga o le lafoga ua mae’a ona faila.

O le faiga fou lea ua faia mo tagata uma mai fafo e ulufale mai ma galulue i le teritori, e aofia ai ma i latou o lo o ulufale mai i lalo o tuutuuga faapitoa ma konekarate, o se tasi o tu’utu’uga e mafai ai ona toe fa’afou le I.D nofomau, o le fa’ailoa lea o le kopi o le pepa sa faila ai le lafoga, ona fa’atoa mafai lea ona fa’afou le I.D

“O suiga fou e pei ona fa’alauiloa, e tasi lava le fa’anaunauga autu, o le taumafai lea e fa’amalosia tulafono tau lafoga ina ia mafai ai ona si’itia le aofa’i o tupe e maua mai i lafoga faila”, o se vaega lea o le ripoti ua tu’uina atu nei i luma o le Fono.

I le tausaga e 2013, e 3,416 laisene pisinisi sa fa’amauina e le malo na mafai ona tu’uina atu i le atunu’u, ma o le 1,723 o nei laisene pisinisi, o pisinisi ia a tagata ta’ito’atasi.

I fa’amaumauga ua tu’uina atu e le malo i le fono o lo o taua ai, mai le silia i le 3,000 laisene pisinisi sa tu’uina atu i le 2013, e na o le 583 pisinisi na faila lafoga, tusa lea o le 33.8%, ae o le isi 66.2% e le i failaina ni lafoga.

E taitonu le malo, e tutusa lelei lava le fa’afitauli o lo o maitauina i pisinisi e le o faila ni lafoga, ma le to’atele o tagata faigaluega i le teritori e le o faila ni a latou lafoga i le malo.