Ua faia e le Loia Sili a le malo se auala e mafai ai ona fa’amalosia le tulafono e taofia ai itula ova taimi o tagata faigaluega a le Ofisa o Femalagaaiga, e ala i le taofia o le toe fa’aaogaina o le uati sa fua ai taimi faigaluega sa i le Ofisa o Femalagaaiga i Utulei ma le malae va’alele, ae o le a fa’aaoga le uati o loo i luga o le Ofisa o le Loia Sili.

I se tusi sa tuuina atu e Talauega Eleasalo Ale i le Pulesili o le Ofisa o Femalagaaiga, afioga Peseta Dennis Fuimaono i le masina na te’a nei, o lo o ia fa’amaninoina ai le taua o le suiga ua faia.

Na taua e Talauega i lana tusi e fa’apea, o le a amata i le taimi lava na tuuina atu ai lana poloaiga le le toe fa’aaogaina o le uati e fua ai taimi faigaluega a le Ofisa o Femalagaaiga i lona ofisa autu i Utulei ma le malaeva’alele, ona o le taumafai lava ina ia taofia le fa’atupulaia o ova taimi e le o manaomia.

O le suiga e pei ona taua e le Loia Sili, e le o aofia ai tagata faigaluega o lo o galulue i le malae va’alele. Ae mo isi tagata faigaluega uma lava a le Ofisa o Femalagaaiga, o le taimi faigaluega e tatau ona galulue ai o le 7:30 i le taeao, ae manava i le 4:00 i le afiafi o aso ta’itasi. A i ai se isi taimi faigaluega i tua ma luma mai o taimi e pei ona taua, e tatau ona i ai se fa’amaoniga o lea suiga.

Mo le aufaigaluega o lo o galulue i le malae va’alele i Tafuna, ua taoto atu i a latou Ta’ita’i mo le fa’amauina i lalo o a latou taimi faigaluega, ma ia tuuina atu i a latou taimi faigaluega i vaiaso ta’itasi i le Ofisa o le Loia sili.

O le mataupu e fa’atatau i itula ova taimi a le malo, o le isi lea mataupu e le misi lava se fonotaga a le Kapeneta a le Kovana ma le talanoaina ai, ona o le taumafai lava ina ia taofia le soona galulue o ova taimi o tagata faigaluega a le malo.

Na taua e le afioga i le ali’i kovana ia Lolo Matalasi Moliga i se tasi o fonotaga a le Kapeneta e fa’apea, o suesuega sa faia e le malo ua maua ai, o ni isi o tagata faigaluega a le malo o lo o maua ova taimi, e mafua mai lea ona o gaioiga le fa’amaoni o loo latou faia, e pei o le pani o le pepa faigaluega i le itula e 6:00, ona evaeva solo ai lava lea, ae fa’atoa amata galuega a le malo i le 7:30.

Saunoa Lolo e fa’apea, e sili atu le fa’a faigaluega o isi tagata faigaluega fou latou te fa’atinoina galuega o lo o mafua ai ona galulue ova taimi isi tagata faigaluega a le malo, nai lo le galulue ova taimi o i latou nei ma latou  maua uma ai fa’amanuiaga tau tupe, ae o lo o tau saili galuega le to’atele o le atunu’u.