A o ulufale atu le faigamalo a Lolo ma Lemanu i le tausaga lona lua lenei o le la nofoaiga, e tele ni lu’itau ua fa’atula’i e ni isi o le atunuu mo mataupu e ao ona ave i ai le la faamuamua, ma o ni isi o ia lu’itau e aofia ai le faaitiitia lea o le tau o oloa po o le sii i luga o totogi o tagata faigaluega.

O lea finagalo mai ni isi o le atunuu sa mafai ona faaalia i le Samoa News i le vaiaso nei, i le maea ai lea o se talosaga sa tuuina atu e le tofa Tuaolo M. Fruean i le alii kovana i le fonotaga a le Kapeneta i le vaiaso na te’a nei ina ia silasila toto’a i le tau o oloa po o totogi fo’i o tagata.

“Ou te talitonu ua o o i le taimi ua tatau ai ona toe vaavaai toto’a Lolo ma le faigamalo i le tau o oloa ua i ai i le taimi nei, ona ua fai lava si maualuga o le tau o le soifuaga ae maualalo totogi o tagata lima vaivai e i ai a’u,” o le molimau lea a Uputaua Te’o, o se tina e 45 tausaga le matua o Tafuna, e galue o se tali tupe i se tasi o faleoloa i le atunuu.

Na taua e Te’o e faapea, “e le mafai ona faatusatusa tagata e malolosi le tamaoaiga ma tagata lima vaivai, pe a o o mai i le tau o oloa ua i ai.”

Na taua e Antonio Ugapo o Pago Pago e faapea, o le tulaga lea ua i ai le tau o oloa i pisinisi a tagata Asia, toeititi o masina taitasi e sui ai le tau o oloa, e le o iloa fo’i e taitai o le atunuu le tulaga pagatia ua i ai tagata lautele ona o le fesuisuia’i o le tau o oloa.

“Na pau lava le auala e mafai ona foia ai le faafitauli lenei, afai loa ua le mafai e le malo ona faatonutonu le tau o oloa, e sili ai loa pe a sii totogi amata o tagata, ina ia gafatia e tagata lima vaivai le taugata o le soifuaga ua tatou i ai i le taimi nei,” o le saunoaga lea a Ugapo.

E to’alua isi alii leoleo sa laua faailoa i le Samoa News e faapea, e le o taitai talafeagai totogi maualalo o lo o i ai ma le tau ua i ai le soifuaga i Amerika Samoa.

“E fai o le taugata o oloa ua i ai ae oo fo’i i le tele o pili o lo o totogi i le taimi nei, o mea fai a le lotu, saogamea a le aiga, aemaise ai aoga a tamaiti ma le tausiga o le aiga, ua sili ai loa pe a tuu ma le tiga o le ulu,” o le saunoaga lea a le tamaitai faiaoga ia Orepa Tunufa’i ma soisoi.

O ni isi na fesiligia e le Samoa News i le mataupu lenei, e ui e le i finagalo i latou e faailoa o latou suafa ma nuu e o mai ai, peitai o lo o latou lagolagoina le manatu ua o o i le taimi ua tatau ai ona ave le faamamafa a le malo i le soifuaga o tagata lautele i le taimi nei, ina ne’i manatu le malo o lo o sologa lelei mea uma, ae le iloa o lo o pologa ma oi tagata lima vaivai.

Na taua e le tofa Tuaolo i le alii kovana ia Lolo Moliga i luma o le fono a le kapeneta i le amataga o le vaiaso nei, ua o o i le taimi ua tatau ai ona silasila toto’a le faigamalo i le tulaga ua i ai le tau o le soifuaga i le taimi nei, ua fai lava si maualuga.

Ae afai e le o le itu lea o lo o finagalo le malo e silasila i ai, fai mai Tuaolo, e manaia la ae vaai sina vaega tupe o totoe e faaopoopo ai totogi o nai tagata faigaluega, ona ua taugata le soifua ma ua tele foi pili e totogi.

Na taua e le alii kovana ia Lolo i luma o le kapeneta e faapea, o se tasi o itu lelei ua fesoasoani atu ai Ofisa Tumaoti a le malo e pei o le ASPA ma le ASTCA, o le tulaga faaitiitia lea o ni isi o a latou pili mo tautua o lo o ofoina atu mo le atunuu.