Mai sui na auai i le fonotaga fa’apitoa mo le vaega a le US Coast Guard i le aso Lulu, sa mafai ona fa’afofogaina ai nisi o atugaluga e aoga ona fetufa’i ai i latou ma le US Coast Guard.

“O le matou va’ai atu i ai, ua tauau e tutusa le aiaiga o i matou, o va’a laiti e tele lava ina fagota mo matou lava aiga, pe fa’atau fo’i na’o sina vaega o matou faiva, ae ua fa’atusalia nei tulafono tamau nei e ao ina usita’ia e i matou ma va’a fagogota tetele e fa’atau uma lava latou faiva. Aisea?” O le fesili lea a le ali’i faifaiva ia Fu’ega Moliga.

“E le o tutusa, ua na’o ni nai tulafono e fa’amautinoa ai lo outou saogalemu, e le taitai tutusa tulafono ua fa’atulaga mo outou e le Coast Guard ma tulafono tamau mo va’a fagota tetele aua e to’atele fo’i latou auva’a, ma e iloa lelei, e tele fo’i le tupe o lo’o latou maua,” o le tali lea a le Coast Guard.

Ina ua mae’a malamalama lea tulaga, sa toe fa’ailoa mai, “O lo’o tulituli atu pea le tou saogalemu i taimi o tou faiva, ina ne’i a’afia mai se tatou va’a fagota i mea o lo ua mae’a lisia i fa’amaumauga a le Coast Guard mo isi setete uma o Amerika ma ona teritori, se’i vagana ai Amerika Samoa, o lo’o fa’amaumauina e le vaega a le Marine Patrol fa’alavelave i le gataifale.”

Sa le mafai ona fa’ao’o ane se tali i le fa’afesili, pe aisea ua le fa’amaumauina ai e le Coast Guard fa’alavelave i gataifale o Amerika Samoa, fa’apei o i si uma setete ma teritori. Sa fa’aalia fo’i, ua i ai nei le taumafaiga ina ia aofia ai ma Amerika Samoa i lea fa’amaumauga a le Coast Guard, peita’i, o lea fo’i ua toe suia le tofi Komesina o Leoleo, ua le mautinoa pe fa’aauau pea la lea taumafaiga pe leai.

Na fa’ailoa mai fo’i se talosaga a se tasi o ali’iva’a, “Fa’amolemole atu e tau tali le vala’au mai i totonu o le Ofisa o le Marine Patrol, e tele ina vala’au mai, o lo’o i ai se mea e mo’omia, po’o le fia malamalama ae o le tele o taimi le tali atu le sui o lo’o tiute.”

O se isi taimi na fa’amaonia mai e  se tasi o faifaiva, “E le tali atu le ali’i tiute i le Marine Patrol ae tago ia vili le isi va’a, ma fa’ailoa i ai lo’u va’a lea sa ia talia le uaealesi, o lo’o afaina ma fa’ailoa i ai le tulaga o maua atu i ai lo’u va’a,” o se talosaga mai lea a Va’a o le failautusi o le Pago Alia Fishermen Association[PAFA].

I le lisi umi o mea faigaluega i totonu o va’a fagota alia taitasi, lea ua fa’atulaga nei e ao ina pasia e le Coast Guard ae le’i o’o ia Oketopa 15, 2015, ua aofia ai ma le va’a fa’aola e tasi i va’a fagota.

Mai feutagaiga e tusa o le taugata o nei va’a fa’aola, ua maua ane ai, e tusa lava pe usita’ia ele tagata faifaiva le talosaga ina ia o fa’apa’aga ma se tasi va’a fagota ua mae’a laisene e le tatou malo ma pasia fo’i i ana mea faigaluega ua fa’atulaga mai, e i ai lava nai vala e mafai ai ona le usita’ia e le aufai faiva lea fa’atulagaga a le Coast Gaurd.

“E pau lava le mea e mafai ai ona le fa’atau ai sou va’a faola pe afai e te lua sainia le maliliega o lo’o lua fagota fa’atasi ma le isi alia fagota ua mae’a pasia ma laisene i le tatou malo,” o se tala mai lea a le US Coast Guard.

Ina ua fesiligia, pe mafai ona sainia lea maliliega, ae fa’ailo atu mea o lo’o fagota ai va’a e lua e le o tutusa le nofoaga, “E fagota le tasi i le sone A ae fagota le tasi i le sone B?” Ua le mafai ona talia, se’i toe aiaia fa’aleleia lea fo’i vala o tulafono mo le ‘au faifaiva, toe felogoa’i ai.

O se talosaga na fa’aleo e le e Fu’ega Moliga, “Pe mata e sili atu ona fa’auia uma e le Coast Guard a latou aiaiga mo le ‘au faifaiva i le Matagaluega o le Puipuiga o le Gataifale ma le Vaomatua, aua o i latou nei o lo’o matou galulue fa’atasi lava i matou faiga faiva. O i latou e aoina le aotelega o matou faiva, e fesoasoani mai fo’i mo i matou e ala i fesoasoani ua matou maua mai le tatou malo ma tupe toina mai fafo mo le ‘au faifaiva. E lelei fo’i lea mo le matou feso’ota’i i o matou lagona i atugaluga lava e tau i le tagata faifaiva ae vaivai le tamaoaiga maua. Peita’i, e matou te le suia ai aiaiga fa’aletulafono e ao ina pasia lava e le Coast Guard, o la outou tiute lea e ao ina fa’atino.”

Ua aoga lea fonotaga, ua tele ni mea ese’ese o le a toe fa’aleleia i le va o e faifaiva i va’a alia i Amerika Samoa ma le vaega a le Coast Guard, le NOAA ma le vaega a le Marine Patrol, ina ia ‘aua ne’i i ai ni lape i le auaunaga, ma maumau ai se soifua i le alamoana.

Ua i ai nei se isi fonotaga o le a toe logo atu ai le ‘au faifaiva e fa’atasi ai fo’i ma le Coast Guard i le masina fou.