Atugalu Sui Fofoga Fetalai i suiga a le Matagaluega o Aoga

O le masina na te’a nei na tuuina atu ai e le afioga i le Sui Fofoga Fetalai o le Maota o Sui ia I’aulualo Fa’afetai Talia sana tusi i le Faatonusili o Aoga a le malo ia Dr. Vaitinasa Salu Hunkin Finau, e faailoa atu ai nisi o ona atugaluga i suiga ua fuafua le Matagaluega o Aoga e tatau ona faia mo le aoaoina o fanau aoga, aemaise ai lava le faaaogaina lea o le gagana Samoa e aoao ai fanau.

 

Na taua e Iaulualo i lana tusi ia Vaitinasa e faapea, o le fuafuaga e faaaoga le gagana Samoa e aoao ai fanau i totonu o potu aoga, ina ia faaopoopo i le gagana peretania o lo o i ai, o se tasi lea o mataupu na mamafa i ai le tele o felafolafoaiga sa faia i le Fonotaga a Aoga i le masina o Oketopa.

 

E pei ona silafia, e le’i i ai se palota na faia i le taimi o lea Fonotaga, e taliaina ai le fuafuaga faataoto a le Komiti, e faatatau i le faaaogaina lea o le gagana Samoa, o se tasi o gagana e aoaoina ai fanau i totonu o potu aoga.

 

Na faailoa e I’aulualo ia Vaitinasa e faapea, e ui sa auai i le fonotaga atoa, peitai e le’i finagalo e faalauiloa sona manatu e faatatau i lenei mataupu, ina ne’i faauiga e se isi ona manatu i le itu faapolokiki, ae i lona taofi, na te fesiligia pea le faaaogaina o le gagana Samoa e aoao ai fanau i totonu o potu aoga, pe a oo mai i le aoaoina o mataupu e pei o le Saienitisi, Numera ma le Suesueina o le atamai faaonapo nei (Technology).

 

Na taua e I’aulualo le faagaeetia o ia i folasaga sa mafai ona faasoa i le taimi o le fonotaga e uiga i le tatau lea ona faaaoga le gagana Samoa e aoao ai fanau aoga, faavae mai lea i mea moni sa mafai ona tuu faatasi i ni suesuega sa faia.

 

“Peita’i, e tumau pea ona ou fesiligia le ono mafai lea ona faaaoga le gagana Samoa i le suesueina o mataupu atoa o lo o aoaoina ai fanau, ona tatou te iloa, e le maua i le gagana Samoa nisi o upu o lo o faaaoga i mataupu e pei o le Saienisi, Numera atoa ai ma le Suesueina o le atamai faaonapo nei,” o se vaega lea o le tusi a le sui fofoga fetalai.

 

Saunoa le sui fofoga fetalai e faapea, e tele nisi fesili o lo o tulai mai pea i le faaaogaina o le gagana Samoa e aoao ai fanau aoga, ma, e le mafai ona vave tuuina atu lona lagolago atoatoa i lenei mataupu, sei vagana ua mafai ona auiliili nisi o mataupu o lo o tuu fesili ai lona mafaufau.

 

O se tasi o fautuaga na toe faamanatu e I’aulualo ia Vaitinasa, o le faanaunauga ina ia faagaioi le Matagaluega o Aoga o se Vaega Tumaoti a le malo, ina ia mafai ai ona tofia sana Fono Faafoe latou te iloiloina faaiuga lelei mo le manuia o fanau aoga i le atunuu.

 

“I le mataupu lea, ou te matua lagolagoina lou finagalo, e tatau ona avea le Matagaluega o se Vaega Tumaoti a le malo, ou te manatu o se auala lea o le a mafai ai ona faaitiitia nisi o faafitauli i le aafia ai o faiga faapolokiki i tulaga o aoga a le fanau,” o se vaega lea o le tusi a I’aulualo ia Vaitinasa.

 

I le avea ai la o le Ofisa o Aoga ma Vaega Tumaoti a le malo ma le faaaoga o le gagana Samoa, o se tasi o fesili ua tulai mai e pei ona taua e le sui fofoga fetalai, pe faamata e siitia ai i luga tulaga o aoaoga a le fanau aoga.

 

“Ou te le iloa tonu lava poo le a se gaioiga e tatau ona faia ina ia foia ai tulaga faaletonu o lo o alia’e mai i le faatulagaina o aoaoga a le fanau i le matagaluega o aoga a le malo,” o le isi lea saunoaga a I’aulualo, ma ia taua ai le tele o se galuega e tatau ona faia ina ia faaleleia ai polokalame mo le aoaoina o fanau, nai lo le taumafai e fofo manaoga o lo o tula’i mai i se taimi vave.

 

O finagalo o le alii sui fofoga fetalai e pei ona faaleo i lana tusi ia Vaitinasa, na faavae mai lea i ni folasaga na tuuina atu e le tamaitai faatonu faapea ai le peresetene o le Kolisi Tuufaatasi, i le Fonotaga o Aoga.

 

I ia folasaga e pei ona saunoa le sui fofoga fetalai, na taua ai e faapea, o le 90% o fanau aoga e faauu mai i le Vasega 12 mai aoga maualuluga ma agai atu i le Kolisi Tuufaatasi, latou te toe aveina mataupu pito i lalo ina ia mafai ai ona tapena i latou e ave mataupu o lo o aoaoina i le kolisi, ma o se tulaga na taua e I’aulualo ua ia maitauina le pau maualalo ai o auala o lo o aoaoina ai fanau aoga i le teritori, pe a faatusatusa i tulaga o lo o i ai faaiuga o aoga a fanau aoga i isi vaega o le Iunaite Setete.

 

Mai le tele o mafuaaga na taua e I’aulualo o lo o mafua ai nei faaletonu, o se tasi o itu na ia faamanino i lana tusi ia Vaitinasa, e le gata e le o lava le lagolago atu a le malo i le itu tau tupe, ae laititi foi le fesoasoani a matua ma tagata uma i le unaia lea o fanau i a latou meaaoga.

 

Ua i ai le finagalo o le sui fofoga fetalai, o le a mafai ona faaleleia atili nisi o nei mataupu o lo o ia atugalu ai i se taimi la te feiloa’i ma faasoa ai ma le tamaitai faatonusili o aoga.

 

Comment Here