Ua to’ai taunu’u le malaga masi’i mai a le afio’aga o Sa’anapu mai Savai’i i Samoa, e tali fa’aaloalo i le vala’au na fa’atalau’ula atu e Amerika Samoa, e ala atu i se afioaga e tofia e le Palemia o le malo o Samoa.  O le valaaulia e fa’afiafia i le Sisigafua o lenei tausaga.

“O se fa’aaloalo maualuga, e le fa’atauagavale fo’i la le tapenaga ua masi’i mai ma le aumalaga a Sa’anapu, aua e ui i nu’u e fia o Samoa Tuto’atasi, ua vala’au le matou Palemia, e tali e Sa’anapu lea fanoga taua tele na fa’alele atu!” O se tala fiafia lea a le afioga Tafafuna’i Akapo Poloai, o le  Ali’i Matua o le aumalaga ua tali fa’aaloalo nei e le afio’aga o Matu’u ma Faganeanea.

O le sao ua tapena i ai Sa’anapu e ala i le pese ma le siva, ma ua latou talosaga fo’i i le afioga le tama matua ia Savea ma le afioga le Fofoga Fetalai, Savali Talavou Ale, e fia maua se aso i le malae a le malo i Tafuna, le Veterans Memorial Stadium, e fa’ata’ita’ia ai fa’afiafiaga lea na tapena i Samoa.

I le aumalaga e to’a 360 i latou, o le sui pito i matua o auai mai e 77 tausaga le matua, ae o le sui pito i itiiti e na’o le 12 tausaga, peita’i, e leai se tasi e le aoga i le fa’amoemoe o masi’i mai ma i latou nei.

E to’alima failauga o lo’o auai i lea aumalaga, o fetalaiga a le faletolu e aofia ai Lauvi Isa’ako, Lesa Niko ma Matu’u Mati, a’o o tofa i aiga e lua o Vole 2AP ma Alo Gaugau, o i latou ia e nafa ma upu o le aumalaga.

O tamali’i lava latou e to’a ono e aofia ai ma le afioga le Ali’imatua Tafafuna’i Akapo Poloai, Mati Fou, Lea’ana Soali’i, Seve Ailima, Mulitalo Parataiso ma Tafafuna’i Ioane.

Ina ua fesiligia i sona iloa, pe aisea ua filifilia ai e le Palemia i latou e malaga mai, sa ia fa’ailoa mai, “Ou te mautinoa lava, o se talileleia lea a le matou Palemia e tusa o le leleiga ua autasia ai nei le matou nu’u, aua e tusa pe 10 tausaga e le o i ai se loto tasi pe galulue fa’atasi o le matou nu’u. Peita’i ina ua umusaina le matou alatele sa fa’aleleia e le malo, na o’o atu ai le Palemia mo lea fa’amoemoe, ae ua matou autasi i lena galuega tele ua mae’a ma na ia filifilia ai loa i matou e fa’atinoa lenei fa’amoemoe lelei. O lona uiga o se samiga lea o le matou leleiga.”

Ina ua fesiligia se fe’au o ‘aumaia i le pese, ae sa fa’ailoa mai, “Ou te le manatu e vave fa’ailo lea tulaga, ina ne’i fa’alogo atu i le pese fa’apea, ua ou iloa lea mea, ae sili ai ma lililo pea faiva o Pili, se’ia o’o i taimi o fa’afiafiaga, ona e sa’afi lea Amerika Samoa i ni fe’au ua fa’ao’o mai fa’afautuaga, ae maise o se fa’afetai maualuga mo le vala’aulia fa’aaloalo, ua matou pale ai i lenei tausaga.”

Pau lava mea ua mafai ona fa’ailoa mai o le taualuga o le latou fa’afiafiaga e sausaunoa ai le faletua o Tavai Anapu, ae o le fuataimi o Fia’ai Ta’amale Aipovi o se alo e fa’asino i le Aiga Sa Aiono mai Fasito’outa ma Falealili.