Ads by Google Ads by Google

ASRU: Sauni malo e faaaoga le fale ma le fanua ua lisi atu

“E MANA’OMIA ASRU SE MALAE LAKAPI AE LE O SE FALE”

 

A’o sauni ai le Matagaluega o Tupulaga Talavou ma Tama’ita’i a le malo latou te faaaogaina le isi fale lea o lo o i luga o le fanua a le malo lea ua lisi atu i le Iuni Lakapi a Amerika Samoa (ASRU), na taua ai e le Faatonusili tofia o lea Matagaluega ia Pa’u Roy Ausage e faapea, ua faatonuina e le kovana le matagaluega e o loa e faaaoga le fale ae se’i la feutana’i ma le Taitaifono o le Iuni i le faaaogaina o le fale.

 

“E i ai le manatu e aoga tele le fale lenei mo aoaoga a le Matagaluega, aua e le manaomia e le Iuni se fale ae latou te manaomia se malae lakapi e koleni ma fai ai taaloga a kalapu lakapi i le atunuu,” o le saunoaga lea a Pa’u i le Samoa News.

 

O le fesili pe aisea ua naunau ai lava le Matagaluega o Tupulaga ma Tama’ita’i e faaaoga le fale lenei ae o lea ua maea ona lisi atu i le Iuni Lakapi, na taua ai e le alii faatonusili ia Pa’u e faapea, o le talafeagai o le fale mo le faia ai o aoaoga faapea ai le tele o le malae e paka ai taavale, o le isi lea mafuaaga na finagalo ai le kovana e faaaoga le fale lea mo aoaoga a le matagaluega.

 

O aoaoga o le a faia i le nofoaga lenei mo tina ma tamaitai e aofia ai aoga su’isu’i, aoga kuka, aoga tui teu, aoga lalaga ie aemaise ai o le faiga o le elei.

 

“O le toatele o tina e le maua so latou avanoa i taimi o le aso ona e tuatuagia i galuega, ae naunau lava i latou e fia auai i aoaoga nei e fesoasoani ai e faalautele lo latou tomai i isi matata faatina i totonu o le aiga, o le mafuaaga lena ua a’e ai se manatu i le Matagaluega, e saili se isi nofoaga e ese mai i fale ma ofisa o le malo e faataunuu ai aoaoga faapitoa nei mo tina ma tamaitai o le atunuu,” o le saunoaga lea a Pa’u.

 

Ae mo aoaoga ua faapitoa mo tupulaga talavou, o le Kolisi Tuufaatasi o lo o aoaoina ai fanau i matata e pei o le kamuta, fai eletise, palama, inisinia ma isi lava galuega, ae o le nofoaga lea o le a faatinoina ai galuega faatino (practical).

 

O le fesili la po o fea o le a o le Iuni Lakapi e fausia ai le latou Ofisa autu, ona o le fale lea ua fuafua le Iuni e fausia ai lona ofisa, na taua ai e Pa’u e faapea, e le gata ua tatala e le alii kovana le avanoa i le Iuni Lakapi latou te faaaogaina ai le malae taalo i Tafuna, le VA Stadium mo a latou koleniga ma faamalosi tino, ae mafai foi ona ofoina atu e le malo se isi fale talafeagai e fausia ai le Ofisa autu mo le Iuni Lakapi.

 

Na taua foi e Pa’u e faapea, o le isi silasila mamao a le alii kovana ia Lolo Matalasi Moliga ua faataoto mo le Iuni Lakapi, o le fausia lea o se malae lakapi i le nofoaga o lo o i ai le malae o le OMV i Tafuna, ina ia faapitoa ai lava se malae lakapi e fai ai taamilosaga ma taaloga a le Iuni lakapi a le atunuu.