Ua tasi le faaiuga a le Iuni Lakapi a Amerika Samoa (ASRU) i lana fonotaga faapitoa lea na faia i le Aso Lua na te’a nei, o le a le auai le kalapu lakapi mai le afioaga o Vailoa i le taamilosaga ta’ito’a 7 o le fu’a lea e faatautaia a le kalapu a Malisi, le TMO Marist Pago 7.

O le faaiuga a le ASRU o lo o faavae mai i se vevesi na aafia ai le au a Vailoa i ni tausaga ua mavae, peitai e oo mai lava i le taimi nei e le’i tuuina atu i ai se faasalaga a le Iuni e tusa ai o aiaiga ma tulafono a le IRB o lo o faafoe ai taaloga lakapi mo Iuni ua avea ma totino o le IRB.

E le o manino lelei i le Samoa News le vevesi e pei ona sa aafia ai le kalapu a Vailoa, pau le faamatalaga na tuuina mai e sui o le ASRU, o se fusuaga na tulai mai i le va o Vailoa ma se tasi o kalapu lakapi i se la taaloga sa faia i le Stadium i Tafuna lea ua mafua ai le faaiuga a le Iuni.

O le faaiuga sa faia e le komiti faafoe a le Iuni Lakapi ananafi, o le a le auai Vailoa i le taamilosaga ta’ito’a 7 o le fu’a lea e faia i le aso 12 & 13 Aperila, ae o le a maua se avanoa o le Iuni e feiloai ai ma sui o le kalapu i se fonotaga o le a faatulaga, ma faailoa atu ai le latou faasalaga.

O le fautuaga a le ASRU, o le a i ai se taimi e nofovaavaaia ai le kalapu i lalo o tuutuuga e faapea, ia latou totogia se sala i le ASRU, ae o tama taaalo ma faiaoga sa aafia i le vevesi, o le a le toe talia i soo se taaloga a le Iuni.

O le fonotaga na taitaia e le Taitaifono a le ASRU, le afioga i le matua ia Togiola Tulafono ma sui na auai e pei o le peresetene o le ASRU ia Aumoeualogo Te’o J. Fuavai; Peseta Sa Mavaega; Leonard Liufau; Puletuimalo D. Koko ma Faagata ‘Lasi’ McClusky.

Na taua e Togiola i lea fonotaga e faapea, ina ua fa’aalia le fia auai o Vailoa i le Ta’ito’a 7 a Malisi, sa ia fautua i ai ina ia faaauau pea le tuuina atu o le latou lesitala ia Malisi mo le taliaina o le latou kalapu, ae se’i fono le Iuni ona faatoa tuuina atu lea o se faaiuga mo i latou.

Na faamanino e Togiola i sui o le Iuni e faapea, e ui e matuia le gaioiga sa faia e le au a Vailoa, peitai o le itu taua o lo o i lona loto, o le avanoa e mafai ai ona faaauau pea le taleni o lo o i ai i ni isi o tama taaalo o le au mo le fia faaleleia o le latou taleni lakapi.

Fai mai Togiola, atonu e le o tama uma o le au na aafia i le vevesi, ai o se vaega toaititi sa aafia ae o le toatele o lo o naunau e faaauau pea le taalo lakapi.

O nei lea ua faamoemoe e tuuina atu ai le faaiuga tusitusia a le Iuni ia Vailoa e tusa ai o le fonotaga.

Na saunoa Aumoeualogo e faapea, e le o le agaga o le Iuni ia faasala se au, ae tatau ona mulimulita’i le Iuni i tulafono ma ta’iala ua faataoto mai e le IRB e faatino ai le faafoeina o ana taamilosaga.

Fai mai Aumoeualogo, e leai se eseesega o le faaiuga o le a faia ia Vailoa ma le faaiuga sa faia ia Nuuuli ma Fagatogo, ona o faafitauli fo’i na aafia ai kalapu nei i se taimi ua sola, ae o lea ua faamalieina le isi vaega o le faaiuga sa tuuina atu i ai, pau le itu o lo o faaauau pea o le tulimata’i lea o gaioiga uma ina ia mautinoa e le toe tulai mai se isi faaletonu i le lumanai.

Ina ua fesiligia le peresetene o le kalapu a Malisi ananafi, na saunoa ai Toleafoa Isitolo Wulf e faapea, ua maea ona totogi le lesitala e $200 a Vailoa, peitai sa ia faailoa i ai, o le a totogi pea le latou lesitala, ae sei faatali i se faaiuga e tuuina atu e le Iuni ma o le faaiuga lava e tuuina atu e le Iuni ia Vailoa, o le faaiuga lena e mulimulita’i i ai Malisi.

“E le mafai e Malisi ona fai se faaiuga e aunoa ma le finagalo o le Iuni, ona o tulafono uma o lo o faafoe ai taamilosaga a Malisi o lo o tuuina mai i tulafono a le IRB lea fo’i e mulimulita’i i ai le Iuni lakapi a Amerika Samoa,” o le saunoaga lea a Toleafoa.

O le taimi nei, e 10 au mai Amerika Samoa ua maea ona lesitala mo le taamilosaga, 13 mai Samoa ma le tasi mai Fiti.