Ads by Google Ads by Google

ASPA-TEO POLOKETI O LE MALOSI’AGA FA’AELETISE MAI LE LA!

Ua mae’a asia nei e le Ofisa Enetia, le nofoaga ua fausia ai le tulaga mo panele e gaosia ai le malosi’aga fa’a-eletise e afua mai le malosi o ‘ave o le La i Tafuna, i le ulu o le malae va’alele, lea e fesaga’i tonu ma le Calvary Chapel i Happy Valley.

O se asiga na auai sui iloga o le Ofisa o le Enetia o le tatou Malo, lea e ona lea galuega fa’atulaga mai e le stimulasi, “po’o alagatupe fa’amatu’u mai e le malo tele ina ia fa’aleleia ai lea tautua mo le teritori,”  ma o panele fo’i nei sa tatali e toe fa’atauina mai i se Kamupani i totonu o Amerika, lea ua fa’ataunu’u ai le poloketi aoga tele lea mo le tatou malo.

O lea poloketi sa tatau ona mae’a i le taimi nei, peita’i, ina ua maua ane e le talafeagai le okaina mai o Panele mo lea galuega, o lea ua toe faia ai le oka fou ma ua tuai teisi ai lenei galuega ua tatau ona mae’a ma fa’aaoga loa.

O le susuga le Fa’atonu o le TEO Mauigoa Reupena Tagaloa sa auai ma le susuga Aukusitino Satele ma le tama’ita’i o Gee Tavai Sagapolutele na latou asia le nofoaga lea, ua toeititi lava mae’a atoatoa ona saunia laina paipa ma le fa’atutuina o nei panele e 500, e tusa lea ma le 13 pusa oloa tetele o lo’o fa’atumuina i nei panele.

O le susuga Tuni mai le ASPA sa i ai fa’atasi ma i latou nei, ina ia mautinoa ua fa’atalanoa lea mataupu, ma ua ia fa’aalia mai, ua toetoe lava to’ai taunu’u le uta fou o Panele sa’o mo le poloketi ma fa’atutu loa. Ua talafeagai lea mana’oga ma le va’aiga i le nofoaga ua mae’a tapena e le Young’s Electric Co. lea e fa’atauaia lea galuega.

E tusa ai ma se fa’aaliga a le sui mai le TEO, e asia fo’i e i latou nei panele i lona to’ai taunu’u mai, ae maise fo’i o le taimi e fa’atutuina ai, ina ia mautinoa o lo’o mulimulita’i le fa’atautaiga o le galuega, e tusa ai ma lona fa’avae ua mae’a aiaia ai e le galuega na toina mai le USTEO. Ua mautinoa, o le uta fou lenei o Panele, ua tonu ai ma usita’ia le aiaiga o le vaega tupe toina mai le ‘Tinoitupe e Fa’aleleia ai le Tamaoaiga’ [Stimulus] a le Peresetene i galuega atofa i le tatou ofisa enetia.

O le poloketi lenei ua fa’aigoaina o le “1.0 Megawatt” a le TEO, sa tu’uina aloa’ia i le ASPA, e fa’atula’ia ina ia fa’aaogaina e le tatou atunu’u, ae totogia atoa mai e le United States Energy Department.

O se tasi o aiaiga, e le toina atoa le tau o le poloketi ae fa’amatu’u auaua’i i ona vaega e tolu. Amataga o le poloketi pe a taua’aoina le Fa’atautaiga o le Galuega, vaega lua i le mae’a o le Vaega Muamua, ae fa’ato’a totogi ai le atoaga i le mae’a o le vaega lua o so’o se galuega pasia.

Ina ua atofa le galuega lea i le ASPA, sa fa’akonekarateina e le ASPA le Sunwize Technologies mai Niu Ioka latou te sapalaia Panele ma fa’atutuina fo’i ia mautu le galuega atoa.

O le Kamupani a le Youngs Electric lea ua fa’akonekarate e le ASPA e latou te fa’atutuina nei Panele mo le miti’ia o le malosi’aga o le La e fausia ai le eletise mo le teritori o Amerika Samoa.

O le toe to’ai taunu’u o nei panele sa’o, ua iloga ai, ua mae’a usita’ia fo’i e le Sunwize Technologies ma le ASPA aiaiga o le fa’atauga mo lea galuega lelei ma le aoga i le atunu’u, aua e mautinoa lava, o se tasi lea o galuega ua loa ona tatalia e le malo, ina ia fa’aitiitia ai le afaina o le atunu’u i le taugata o le Eletise e gaosia mai afi tetele e pei ona tatou fa’aaogaina ai le suau’u ma kesolini.