I le tuana’i ai o vaiaso e tolu o fetineia’i pea ni isi o fa’auluuluga o le Asosi Siisii U’amea mamafa a le atunu’u i le tau fa’amautuina lea o i latou e tatau ona avea ma ta’ita’i o le Asosi i Amerika Samoa, i le vaiaso nei na mafai ai ona fono fa’atasi sui uma o le Asosi, ma toe teuteu ai loa ni isi o tulaga sa tula’i mai i ni nai vaiaso ua mavae atu.

O le fa’aiuga na tasi i ai finagalo o le Asosi, o le a fa’aleaoga le palota sa faia i ni nai vaiaso ua mavae atu e sui ai Ofisa a le Asosi, ae o le a fa’aauau pea tofiga o lo o i ai i le taimi nei, e pei ona avea ai Ed Imo ma peresetene talu mai le 2014, fa’apea ai ma Gloria Ausage o lo o avea ma Teutupe, e fa’atalitali ai tofiga a le Asosi lea ua fa’amoemoe e faia i le masina o Iulai o le tausaga nei.

Ua malilie fo’i le Asosi e ave la latou faamuamua i le tapenaina lea o le au malaga mo taaloga siisii u’amea mamafa a le Pasefika, lea ua fa’amoemoe e talimalo ai le atunu’u o Fiti i le masina o Me o le tausaga nei.

A o le i taunu’u le Asosi Siisii i le maliliega e pei ona latou au tasi i ai, na muamua siisii felafolafoaiga i le va o sui o le Asosi i le taimi o le fonotaga sa faia e saili ai le tofa ma le fa’autautaga loloto i mataupu e manuia ai le Asosi, lea na fa’atautaia i le potu fono a le Asosi Siisii i Tafuna, i lalo o le taitaia a le susuga Ed Imo, o ia fo’i lea o le peresetene a le Asosi Siisii.

O le mataupu e pei ona vavao ai sui o le Asosi Siisii U’amea mamafa, o le mataupu e fa’atatau i le fonotaga lea na usuia i le tolu vaiaso talu ai a le Asosi, ma faia ai loa tofiga mo Ofisa fou e taitaia le Asosi mo le isi lua tausaga.

O ia tofiga e aofia ai le tofiaina o le susuga a Emmanuel Sitagata e avea ma Peresetene, Pau Roy Ausage o le sui peresetene, Gloria Ausage mo le Teutupe, ma le tama’ita’i o Monica Afalava e avea ma Failautusi.

E lei auai le susuga a Imo i le fonotaga lea, e ui sa fa’amaonia mai e sui o le Asosi i le Samoa News, sa logoina Imo i se tusi e fa’ailoa i ai le fonotaga, peita’i na filifili o ia e le auai atu.

Na taua e le Faiaoga a le Asosi Siisii ua Tomane Alo Fa’agu i le Samoa News e faapea, o le tofiaina o Imo e avea ma Peresetene o le Asosi Siisii e sui tulaga i le afioga i le ali’i fa’amasino ia Toetagata Albert Mailo na fa’amavae i le masina o Novema 2014, sa le tusa lea ma tulafono o lo o lima ta’ita’iina ai galuega fa’atino a le Asosi.

“O tulafono a le Asosi Siisii ua mae’a ona fa’amauina, o le taimi lava e fa’amavae ai le peresetene mai le nofoa, o le fonotaga e sosoo ai e filifilia ai loa e sui uma o le Asosi se tasi e avea ma peresetene”, o le saunoaga lea a Tomane.

“O le mafua’aga lena na matou manatu ai loa e talo le fono sa usuia i le tolu vaiaso talu ai, ina ia tofia ai se tasi na te tauaveina le tofi peresetene, o le matou ulua’i fonotaga fo’i lea talu ona fa’amavae Toetagata mai le tofi peresetene”, o le isi lea saunoaga a Tomane.

Ae na fa’ailoa e Imo i le fonotaga sa usuia i le vaiaso nei e fa’apea, o tofiga fou e pei ona faia e sui o le Asosi Siisii i le tolu vaiaso talu ai e saili ai tofi ma sui ai le peresetene, e le o tusa ai ma tulafono a le Asosi Siisii.

“O le tulafono a le Asosi Siisii o lo o i ai, o le taimi lava e fa’amavae ai le peresetene mai le nofoa, e otomeki lava ona se’e atu le sui peresetene e avea ma peresetene, e fa’atali ai le taimi e toe sui ai tofi a le Asosi, i le palota tele e auai uma ai ona sui lesitala”, o le saunoaga lea a Imo na fa’ailoa i luma o le fonotaga i le vaiaso na te’a nei.

Na faamalulu Imo e tusa ai o ni fa’amatalaga sa ia faia i luga o le Samoa News, lea ua mafua ai ona salalau tala e uiga i fa’aletonu o lo o tula’i mai i le lotoifale o le Asosi, peita’i i lona talitonuga, e le taua le feeseesea’i o sui o le Asosi, ae tatau ona ave le fa’amuamua i le tapenaina o le au malaga a le fanau mo ta’aloga a le Pasefika i Fiti.

O le to’atele o sui lesitala o le Asosi na maua avanoa e saunoa ai i le taimi o le fonotaga, sa latou fa’ailoa sa’o ia Imo o latou lagona fa’anoanoa, i le tele o masina talu ona ia tauaveina mai le tofi peresetene, peita’i e lei vaaia lava o ia i le taimi o koleniga a au ta’aalo a le Asosi sa koleni mai i le tausaga ua mavae fa’apea ai ma le tausaga lenei.

“O lea ua savali i le lua tausaga talu ona e tauaveina mai le tofiga peresetene, ae matou te le o vaaia lava oe o e sau e te fesoasoani ai i le koleniina o a tatou au ta’aalo, o le mea lea, ou te ta’u sa’o atu ia te oe, ou te le mana’o e avea oe ma peresetene o le Asosi Siisii, e le o oe o se tagata siisii, e le o sau ta’aloga fo’i lea, o le mafua’aga lena ou te le mana’o ai ta te galulue fa’atasi”, o le saunoaga lea a Tomane ma lona si’ufofoga ua si’isi’i i luga.

E ui i le siisii o saunoaga i le taimi o le fonotaga a le Asosi, ae na mafai lava ona toe foia ma toe teuteu i le fa’aiuga o le fono, ma ua moni ai upu a le atunu’u, “e tetele lava i pisaga ae matua i le o”, ina ua mafai ona toe fa’aleleia feseeseaiga na tula’i ai i le va o totino o le Asosi, ae ua toe galulue fa’atasi le Asosi mo le manuia o le atina’eina o taleni a fanau.

O le masina o Iulai o le tausaga nei lea ua fa’amoemoe le Asosi e faia ai loa le latou paloga mo le suiga o a latou tofi mo le isi 2 tausaga o lo o lumana’i nei.