Ads by Google Ads by Google

ASOA - CNR 4H - Fa’au’u le Au Su’isu’i

E to’a sefululua i latou na taua’aoina i ai Tusi Pasi o le Su’isu’i mai le CNR 4H a le Land Grant o le tatou Kolisi Tu’ufa’atasi i le aso Lua, o sui totino i latou o le ASOA, ina ua mae’a lelei le 3 masina o fa’atautaia latou a’oa’oga i lea fo’i taleni aoga tele mo tina o se aiga.

O le faia’oga sa nafa ma le a’oa’oina o lea tomai taua i tina nei o le faletua o Diana Tarrant ma nisi sa fesoasoani tele, ae o le fa’auluuluga lava latou o le polokalama e tapua’ia o latou faiva mai le Ofisa autu o le CNR 4H i le Land Grant i Malaeimi.

O le ASOA o le sosaiete lea a Tagata Matutua i Amerika Samoa, ma o i latou ua mae’a atofa fo’i se latou Ofisa autu e le afioga le Kovana Sili Togiola Tulafono i totonu o atu falega a le Malo i le Paka Liona, ma o i’ina lea sa fa’atautaia ai latou a’oa’oga Su’isu’i i aso Lua taitasi mai le itula e 9:00 i le taeao se’ia pa’ia le itula e 12 i vaiaso ta’itasi mo le 3 masina.

E ese mai le ASOA, e i ai isi mafutaga a tina e tolu sa fa’atautaia fa’atasi a latou nei a’oa’oga su’isu’i e le tina o Diana Tarrant, ma fa’atulaga fo’i latou fa’au’uga i le fa’ai’uga o lenei masina.

 O le sauniga pu’upu’u sa faia i le Ofisa Autu o le ASOA i Tafuna sa mafuta atu uma i ai tina ua fa’amanuiaina nei a latou a’oa’oga su’isu’i, o latou aiga ma sui iloga fo’i o le ASOA i le latou laulauafono, ae maise le fa’auluuluga o le Polokalama a le CNR 4H a le Land Grant o le tatou Kolisi Tu’ufa’atasi, ma faia’oga o le su’isu’i sa galulue ma nei tina e to’a 12 mo le 3 masina atoatoa.

O le tatalo na tu’uina lea i le susuga le Faife’au Mulimuli Malau’ulu o Taputimu. Ina ua mae’a, ona fa’ato’a tu’uina lea o le avanoa i le tama’ita’i faia’oga su’isu’i mo lana tautalaga fa’afetai i le ASOA mo le avanoa e tu’uina i ona totino e a’oa’oina ai i lea taleni, fa’atasi ai ma le agaga fa’afetai i le vasega ua fa’au’uina, ona o le mata’alia ma le fiafia e a’oa’oina ma ua iloga le “usiusita’i ma le fa’amaoni i a’oa’oga, o le fa’aeaina e taua’ao lona tusi pasi i le taeao nei.”

O le vasega na taua’aoina fa’apitoa latou tusi pasi e lo latou faia’oga, ua aofia ai:

Aisalini Vaoga, Dynasty Ma’ae, Fa’asolo Ma’ae, Fatumalala Al Sherai, Marilyn Ah Ching, Marysita Brown, Mataitoa Malauulu, Moala Latianara, Siliama Malakai, Therosita Maulupe , Tuli Afualo ma Tuli Ene.

O le aiga fiafia sa fa’atasia uma ai i latou nei ina ua mae’a lea sauniga e tufatufaina ai tusi pasi o nei fa’ailoga.