Ads by Google Ads by Google

ASO SA POGISA MO SAMOA MA SAINA

MAUA LE ISI MATAPOGIA TOGAVAO AE MAUA LE ISI MALIU LUGA MOEGA

O le aso Sa na te’a nei, o se aso Sa fa’anoanoa lea mo se aiga Samoa i Aua fa’apea ai ma se aiga i Saina, ona o ni fa’alavelave se lua na a’afia ai ni ali’i se to’alua e pei ona tula’i mai i le vaveao o le aso Sa.

O le ali’i mai Aua na maua e lona to’alua o ta’atia i se togavao e le mamao ma le latou fale o lo’o matapogia fa’atasi ai ma ni manu’a tuga i lona ulu, ae o le ali’i Saina na maua e leoleo o lo’o maliu i luga o lona moega.

O le ali’i e 32 tausaga o lo’o taofia pea i le falema’i i le taimi nei ona o manu’aga tuga i loa tino, e mafua mai i le fa’alavelave lea na tula’i mai i Aua i le faaiuga o le vaiaso, na taua e se tasi o lona aiga i le Samoa News e fa’apea, o le to’alua o le ali’i lea na toe mauaina lona tino o ta’atia i lalo o le fau i tafatafa ane o le fale, ina ua mae’a ona fa’ao’olima i ai tamaiti o le isi auaiga o le latou nu’u.

O loo faaauau pea i le taimi nei suesuega a le Vaega Suesue o le Ofisa o Leoleo e uiga i lenei mataupu, peitai o loo taofia pea i le potu tigaina o le falemai a le LBJ le o loo manu’a, ona o manu’aga tuga i lona ulu atoa ai ma ona foliga.

Na taua e se molimau i le Samoa News e faapea, ina ua ia taunuu i le vaega sa tupu ai le faalavelave, sa ia vaaia ai se tagata o taatia i luga o le mutia ma ona foliga o loo pisia uma i le toto.

“Sa ou vaaia le tagata lea e leai ma se minoi, na o le taatia faasasa’o lava e foliga mai o loo matapogia, e le’i umi ae taunuu loa ma le taavale falema’i, ona matou siia loa lea o lona tino i totonu o le taavale ma auina atu loa o ia i le falemai,” o le faamatalaga lea a le molimau i le Samoa News.

E tusa ai ma le faamatalaga a le alii leoleo lea na amataina i le suesueina o lenei mataupu, o le vevesi na tula’i mai ina ua mae’a se fiafia sa faia i le aso fanau o le toeaina o le aiga, ae fa’ai’u puta ai ina ua toe taua’i fusu tamaiti o le aiga, ae ina ua fesiligia e le Samoa News se tasi o le aiga o le alii o loo manu’a, sa ia teena ai lea faamatalaga.

Na taua e le tamaitai lea, o ia fo’i o le tausoga o le alii o loo lavea e faapea,, o tamaiti ia na fasia si ona tei o loo lavea e o mai i le isi aiga o le latou nu’u, e le’i i ai fo’i latou i le fiafia a le latou aiga sa faia.

O lana faamatalaga e faapea, e taape atu le fiafia a le latou aiga ae vaaia loa tamaiti o le aiga lea o loo tumutumu mai i luma o le faleoloa tuufua lea o loo i luma atu o le latou fale.

“Faapea lava matou ua leva ona moe le alii lea (le ua molia) ae ina ua alu atu lona to’alua e saili mai o ia, na maua atu ai o taatia mai lona tino o loo matapogia i tua atu o le togavao, i tafatafa o le fau o loo i luma o le faleoloa o loo i luma o le alatele,” o le faamatalaga lea a le tausoga o le alii o loo lavea.

Na taua e le uncle o le alii o loo manu’a, e fai lava si tuga o manu’a o loo aafia ai lona nephew, ma ua i ai foi le fuafuaga e ave i fafo e fai ai sona taotoga ona.

E oo mai i le taimi nei e le’i i ai lava se tasi ua taofia ma tuuaia e le malo ona o lenei faalavelave.

Na taua e le alii kapeteni ia Cpt. Lavatai Taase Sagapolutele lea o loo faauluulu i ai le Vaega Suesue a Leoleo, o loo faaauau pea i le taimi nei suesuega a leoleo i le mafuaaga o lenei faalavelave.

“Afai loa ae maea suesuega o loo faia e le matou vaega, ona tuuina atu loa lea o le ripoti i le Ofisa o le Loia Sili mo le latou faaiuga,” o le saunoaga lea a Cpt. Lavata’i.

Ae mo le mataupu e uiga i le alii Saina lea na maua atu o maliu i luga o lona moega i Satala, ua talosagaina e le Vaega Suesue a le Ofisa o Leoleo le Ofisa o le Loia Sili mo le faia o se suesuega i le falema’i e sailia ai le mafuaaga o le maliu o lenei alii.

Na taua e Cpt. Lavata’i Taase Sagapolutele lea o loo faauluulu i ai le Ofisa Suesue a leoleo, e le o mafai lava i le taimi nei ona iloa manino le mafuaaga o le maliu o lenei alii sei vagana ua maea suesuega o loo faagasolo i le taimi nei.

Na pau le itu lea ua faamaonia mai, o le alii Saiuna ua maliu o Zhang Qi Hui, 56 tausaga le matua, e nofo toatasi foi na o ia i le fale lea sa mautotogi ai i Satala.

Na taua e se molimau i le Samoa News, o le tamaitai na alu atu e piki mai le tupe o le rent o le fale na ia faafesootaiina le ofisa o leoleo, ina ua fiu e tu’itu’i le faitoto’a o le fale e le’i tatalaina lava e lenei alii.

“O le aso Faraile na ou vaaia ai le tamaitai e ana ia le fale o sau ma tu’itu’i le faitoto’a, sa faapena fo’i i le aso Toona’i, ma ia valaauina ai loa le ofisa o leoleo i le taeao analeila (taeao o le aso Sa na te’a nei),” o le faamatalaga lea a Tiana Tamaseu.

Na taua e le molimau e faapea, ina ua agai atu ma lona aiga ma nonofo i Satala i le 1982, sa ia vaaia ai ua le tamaloa ua maliu ua leva ona nofo i le fale lea. Fai mai Tamaseu, o le tamaloa ua maliu ua tete’a ma lona to’alua, ae o lana fanau e toalua o loo nonofo i Amerika i laua i le taimi nei.