I le alo atu o Amerika Samoa i le faamanatuina o le 239 tausaga, po o le aso fanau o le Iunaite Setete i le faaiuga o lenei vaiaso, ua lipotia mai le pisi o malaga a le kamupani vaalele a le Polenisia mo Samoa.

ASO MALOLO

I se tusitusiga faalauaitele, ua faailoa ai e le afioga i le kovana sili, Lolo Matalasi Moliga, faapea o le aso lenei, Iulai aso 3, o le a avea ma aso malolo a le malo o Amerika Samoa, e faamanatu ina ai le aso fanau  o le Iunaite Setete, lea e pa’u tonu lava i le aso 4 o Iulai - le aso To’anai.

Talu ai ona o le aso malolo lenei, aso Faraile, ua tapunia uma ai ofisa o le malo, aua le faamanatuina o le 239 tausaga o le Iunaite Setete o Amerika.  Mo tagata faigaluega a le malo e tatau ona galulue, o le a totogi i latou e  pei ona faatulagaina mai e le tulafono.

I le tulaga o kampuani tua mo le aso malolo, ua faailoa mai e le StarKist Samoa faapea e tapunia a latou galuega i le aso lenei faapea ma le aso a taeao mo le faamanatuina o le Aso 4 of Iulai, e maua ai le avanoa o tagata faigaluega  e fiafia ma o latou aiga i lenei aso faapitoa, o se faaliga lea mai le sooupu a le kamupani.

Mo le kamupani tu’u apa o le Talofa System Inc., e tapunia foi i le aso lenei a latou galuega faatasi ai ma le aso a taeao. O le Talofa System ma le StarKist Samoa o kamupani pulea e le Dongwon industries, e faamautu i Korea i Saute.

Ua faailoa mai e le Faletupe o Hawai’i ma le faletupe o le ANZ Amerika Samoa Bank faapea e tatala pea o latou ofisa i lenei aso, ae o le lala a le ANZ i Tafuna e tapunia i le aso To’anai. O le tele o pisinisi i le teritori, e aofia ai le Samoa News, e faaauau pea le galulue i lenei aso.

O le aso Lulu o le vaiaso lenei sa faailoa mai ai e le malo faapea o le aso ananafi sa tufatufa ina ai nisi o siaki o lafoga toe maua.

MALAGA MO SAMOA

Talu mai le amataga o lenei vaiaso i le aso Gafua, sa amata ona faaopoopo malaga e lua i le aso a le kamupani vaalele o le Polenisia mo faigamala i Apia, ona o le toatele o le mamalu o le atunu’u femalaga’i.

Taua e le susuga ia Toe Loia, le pule o le Polnesia i Amerika Samoa, e faapea o le vaitaimi lava lenei - o malologa o le tau mafanafana - e toatele ai tagata malaga mo Samoa ona o fonotaga a ekalesia ma faatasiga a aiga.

Ae peitai ua faaopoopo le toatele o tagata malaga mai Tutuila mo Apia, ona o au taalo a Amerika Samoa o lo’o agai atu i Papua Niu Kini mo Taaloga o le Pasefika lea e tatalaina i le faaiuga o le vaiaso i le laumua o Port Moresby.

Ua le gata i lea o le toatele o i latou mai Amerika Samoa o lo’o malaga i Apia aua taaloga aloaia i le aso Lulu o le vaiaso fou i le va o le Manu Samoa ma le Olopeleki e faia i le Apia  Park.

Saunoa le susuga a Loia e faapea, e 12 malaga i le aso - talu mai le aso Gafua o le vaiaso lenei - i le va o Pago Pago ma Samoa. Ma o lea tulaga e faaauau lava  i le faaiuga o lenei vaiaso.

O le vaiaso fou ua fuafua le kampupani vaalele e toe foi i le ta’i sefulu malaga i le aso, ae peitai o nei malaga o lo’o faatumulia pea ona o nisi o le atunu’u o lo’o fia maua le avanoa e maimoa ai i taaloga a le Manu Samoa ma le Olopeleki.

E le gata i malaga a va’alele i le va o Tutuila ma Upolu, ae o lo’o tautuaina foi e le Polenisia malaga i le va o Tutuila ma le Manu’atele, i lalo o se fa’atagana mai le fetarale, ona e leai se kamupani va’alele Amerika i totonu o le teritori e mafai ona faia lea tautua.