O le aso Tofi ua te’a na tatala ai le fa’aaliga a Matafao Elementary sa eseese lona fa’atinoga mai le ituaiga o aso fa’asamoa e masani ona fa’atautaia e nisi a’oga.

“O le taumafaiga ua faia i lenei tausaga, o le mautu lelei lea o le gagana i mafaufau o le fanau e ala i le tusitusi ma le tautala ae maise le fa’atinoga o le gagana Samoa,” o se fa’amatalaga lea a le alii faufautua o le Komiti o le Gagana Samoa i Matafao, Taule’ale’a Ropeti Moliga.

I le fa’atautaiga o le polokalama sa vaevaeina i vaega e lua, ma e lua fo’i masina sa fa’atino atoa ai. I le masina o Fepuari sa fa’asolo ai tusitusiga i le Gagana Samoa, ma sa amatalia mai i le vasega ECE ma le Level K5.

“O vasega amata nei e lua sa taumafai le tamaitiiti e tusia se fuai upu e tasi e fa’amatala ai le ata sa ia tusia. Mai le fa’amasinoga o galuega a le fanau, na tula’i mai ai e togisilia le tama’ita’i o Rosebelle Nuu o le Level K5,” se tala lea a Taule’ale’a.

O le Vaega 1 ma le 2, sa tauva i le tusiga o le Parakalafa e tasi i le gagana samoa. Ua mae’a fa’amasinoina fo’i nei palakarafa na tusia e le fanau, ae ua togisilia ai le galuega a le ali’i o Fareti Ropati mai le Level 2.

O le vasega 3, 4, ma le 5 sa tauva ai i le tusiga solo fa’asamoa. O le galuega lea e fai si fita o le fa’amasinoina o galuega, peita’i, ua tasi moemoe le taofi o i latou na fa’amasino e togisilia le solo na saunia e le ali’i o Vaega Taulapapa o le level 5.

Mai le vasega 6, 7 ma le 8 na tauva ai le fanau i le tusiga o le Tala Fa’asamoa.  Na matua malilie fa’amasino e tu’uina le tulaga muamua i le ali’i o Sanerivi mai le level 7.

I le masina lenei o Mati 24, 2016, o le aso Tofi na te’a nei, na fa’atino ai loa le toe vaega o lenei fa’amoemoe i le Gagana Samoa i le tautala ma le fa’atinoga e le fanau o tauloto o parakarafa, tauloto ma fa’atino solo ae maise o le fa’atinoga ma fa’amatala tala fa’asamoa sa tusia.

Mai le fa’atinoga o tauloto sa a’oina e fanau i le vasega 1 ma le 2, sa iloga ona tutusa lelei nei taumafaiga e tusa ai ma fa’ai’uga a ali’i ma tama’ita’i fa’amasino.

I le vasega 3, 4, ma le 5 sa fa’atinoa Solo sa fa’ailoa mai e manumalo le taumafaiga a le vasega 5. A’o le vasega 6,7, 8 lea sa latou fa’atinoa le Tala Fa’asamoa sa fa’ailoa mai ua tutusa lelei fo’i fa’atinoga a nei vasega uma i le fa’ai’uga o a latou fa’atinoga na saunia lelei.

O le fa’afetai na fa’ao’o e le Komiti o le Gagana Samoa i Matafao Elementary aua o se aso uiga ese le matagofie i galuega fa’atino a le fanau mo a’oa’oga aua ua atagia le tomai o le fanau e tautala ma fa’atino mea uma i lana gagana, e pei fo’i ona latou mafaia ona tusia ma fa’amauina. O lea Komiti o le Gagana Samoa e to’a 18 o latou sui totino, ae o le tama’ita’i o Anne Brown Posala o le ta’ita’ifono, ae faufautua ai le ali’i o Taule’ale’a Ropeti Moliga.

O le aofa’iga o le seleni sa tu’ufa’atasia i le a’ao foa’i o matua mai le amataga se’ia o’o i le fa’ai’uga na gafatia ona totogia ai mea uma sa fa’aalu ae tula’i mai ai le tupe mama e $1,800.

Na auai mai fo’i le sui o le OCIA mai le Gagana Samoa o Alex Skelton e maimoaina le taumafaiga a Matafao Elementary ina ia toe fafagu ma taofi le pito maea o le Gagana Samoa i agaga o le fanau a’oga i lea laumua.